ଯାଜପୁର ଅଫିସ,୨୩।୨: ଯାଜପୁର ଜିଲା ବଡ଼ଚଣା ବ୍ଲକ ଓଲରାସ୍ଥିତ ସାବିତ୍ରୀ ଇଣ୍ଡଷ୍ଟ୍ରିଜ ପ୍ରାଇଭେଟ ଲିଃ ଓ ମୟୁରଭଞ୍ଜ ଜିଲା କରଞ୍ଜିଆ ସାବିତ୍ରୀ ରାଇସ୍ ଇଣ୍ଡଷ୍ଟ୍ରିଜ ପ୍ରାଇଭେଟ ଲିଃ ଚାଉଳ ଦୁର୍ନୀତି ମାମଲାରେ ସମ୍ପୃକ୍ତ ଅଧିକାରୀମାନଙ୍କ ଅଡୁଆ ବଢିଛି। ଏହି ଦୁର୍ନୀତି ଉପରେ ଡିପାର୍ଟମେଣ୍ଟାଲ ପ୍ରୋସିଡିଂ ହୋଇଥିବା ତକତ୍ାଳୀନ ଏସିଏସ୍ଓ ପ୍ରହ୍ଲାଦ ସେଠୀ ଓ ମାର୍କେଟିଂ ଇନ୍ସପେକ୍ଟର (ଏମ୍ଆଇ) ବିଶ୍ୱଜିତ୍ ମିଶ୍ରଙ୍କ ସଂକ୍ରାନ୍ତରେ ଉଚ୍ଚ କର୍ତ୍ତୃପକ୍ଷଙ୍କ ନିର୍ଦ୍ଦେଶର କୌଣସି ଅନୁପାଳନ ହୋଇ ପାରିନାହିଁ। ଧରିତ୍ରୀରେ ଗତ ୧୧ ତାରିଖରେ ୬ ବର୍ଷ ହେଲା ଦୁର୍ନୀତିଗ୍ରସ୍ତ ଅଧିକାରୀଙ୍କୁ ସୁରକ୍ଷା ଶୀର୍ଷକ ଖବର ପ୍ରକାଶ ପାଇଥିଲା। ଏହାପରେ ଓଡ଼ିଶା ଷ୍ଟେଟ ସିଭିଲ ସପ୍ଲାଏଜ୍ କାର୍ପୋରେଶନ(ଓଏସ୍ସିଏସ୍ସି) ଲିମିଟେଡର ପରିଚାଳନା ନିର୍ଦ୍ଦେଶକ(ଏମ୍ଡି) ବିଶ୍ୱଜିତ୍ କେଶରୀ ଦାସ ଗତ ୧୯ ତାରିଖରେ ଉଭୟ ଯାଜପୁର ଓ ମୟୁରଭଞ୍ଜ ଜିଲାର ଯୋଗାଣ ଅଧିକାରୀ(ସିଏସ୍ଓ) ବା ଡିଷ୍ଟ୍ରିକ୍ଟ ମ୍ୟାନେଜର(ଡିଏମ୍)ଙ୍କୁ ଜବାବ ତଲବ କରିଛନ୍ତି। ତାଙ୍କ ପତ୍ରରେ ସେ ଦର୍ଶାଇଛନ୍ତି, ଉଚ୍ଚ କର୍ତ୍ତୃପକ୍ଷଙ୍କ ନିର୍ଦ୍ଦେଶକୁ ଅବଜ୍ଞା ଓ ଅସଦାଚରଣ କରାଯାଇଛି। ତେଣୁ ସରକାରଙ୍କ ପରବର୍ତ୍ତୀ ଅସନ୍ତୋଷର କାରଣ ଏଡାଇବାକୁ ତୁରନ୍ତ ଏହି ଦୁର୍ନୀତି ମାମଲାର ଅନୁପାଳନ କରାଯାଇ ବିହିତ ପଦକ୍ଷେପ ଗ୍ରହଣ କରିବାକୁ ଏମ୍ଡି ପୁଣିଥରେ ସୁଯୋଗ ଦେଇଛନ୍ତି।
ଉଲ୍ଲେଖଯୋଗ୍ୟ, ୨୦୧୫-୧୬ ବର୍ଷରେ ସାବିତ୍ରୀ ରାଇସ୍ ମିଲରେ ୪ କୋଟି ୪ ଲକ୍ଷ ୨୪ ହଜାର ୩୯୩ ଟଙ୍କାର ଚାଉଳ ହରିଲୁଟ୍ ହୋଇଥିଲା। ମିଲ୍ ମାଲିକ କୋର୍ଟ କଚେରୀର ଦ୍ୱାରସ୍ଥ ହେବା ପରେ ଯୋଗାଣ ବିଭାଗରେ କିସ୍ତି ଅନୁସାରେ ହରିଲୁଟ୍ ଅର୍ଥ ଜମା କରୁଛନ୍ତି। ତେବେ ଏଥିରେ ଅବହେଳା ଓ ଦୁର୍ନୀତିରେ ସାମିଲ ଏସିଏସ୍ଓ ସେଠୀ ଓ ଏମ୍ଆଇ ମିଶ୍ରଙ୍କ ବିରୋଧରେ ଡିପାର୍ଟମେଣ୍ଟାଲ ପ୍ରୋସିଡିଂ(ଡିପି) ନମ୍ବର ୧୮୨୦/୨୧ା୧ା୨୦୧୭ରେ ମାମଲା ରୁଜୁ କରି ବିଭାଗ ନୀରବ ରହିଛି ା ଇତିମଧ୍ୟରେ ଉଚ୍ଚ କର୍ତ୍ତୃପକ୍ଷ ଏକାଧିକବାର ସମ୍ପୃକ୍ତ ସିଏସ୍ଓମାନଙ୍କୁ ଆବଶ୍ୟକ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇ ଆସୁଛନ୍ତି। ହେଲେ ୨ ଅଧିକାରୀଙ୍କ ଅବସର ପର୍ଯ୍ୟନ୍ତ ସମୟ ଗଡ଼ାଇ ନେବାକୁ ମସୁଧା ହୋଇଥିବାରୁ ଜାଣିଶୁଣି ଉଚ୍ଚ କର୍ତ୍ତୃପକ୍ଷଙ୍କ ନିର୍ଦ୍ଦେଶକୁ ଅବହେଳା କରାଯାଇଛି ବୋଲି ମତପ୍ରକାଶ ପାଇଛି।
