ଯାଜପୁର ଟାଉନ,୯ା୨(ଡି.ଏନ.ଏ.): ଯାଜପୁର ଜିଲା ମହୋତ୍ସବ ଓ ପଲ୍ଲିଶ୍ରୀ ମେଳା ଉଦ୍ଘାଟିତ ହୋଇଯାଇଛି। ବୁଧବାର ସ୍ଥାନୀୟ ବାଳାଶ୍ରମ ପଡ଼ିଆଠାରେ ଅନୁଷ୍ଠିତ ୧୧ତମ ଯାଜପୁର ଜିଲା ମହୋତ୍ସବ ସଂଗମ ଓ ପଲ୍ଲିଶ୍ରୀ ମେଳାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲ ମାଧ୍ୟମରେ ଉଦ୍ଘାଟନ କରି ଯାଜପୁର ଜିଲା ଏକ ଅନନ୍ୟ ଓ ଏହାର ସ୍ବତନ୍ତ୍ରତା ଭିନ୍ନ। ଏହି ଜିଲାର ଗରିମା ବହୁ ପୁରାତନ। ଏହି ଜିଲା ଅନ୍ୟତମ ସର୍ବଶ୍ରେଷ୍ଠ ଜିଲା ଭାବେ ପରିଗଣିତ ହୋଇଥିବାରୁ ମୁଁ ବକ୍ତିଗତ ଭାବେ ଗର୍ବ ଅନୁଭବ କରୁଛି ବୋଲି କହିଥିଲେ। ମହୋତ୍ସବରେ ଜିଲାପାଳ ଚକ୍ରବର୍ତ୍ତୀ ସିଂହ ରାଠୋର ସଭାପତିତ୍ୱ କରିଥିବାବେଳେ ସ୍ଥାନୀୟ ବିଧାୟକ ତଥା ବିଜେଡି ରାଜ୍ୟ ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ପ୍ରଥମେ ଭାଷଣ ପ୍ରଦାନ କରି ମୁଖ୍ୟମନ୍ତ୍ରୀ ଯାଜପୁର ଜିଲାକୁ ଯଥେଷ୍ଟ ଗୁରୁତ୍ୱ ପ୍ରଦାନ କରି ବିଭିନ୍ନ ପ୍ରକଳ୍ପ ପ୍ରଦାନ କରିଥିବାବେଳେ ଯାଜପୁର ଜିଲାବାସୀ ଓ ଜିଲା ନେତାମାନଙ୍କ ତରଫରୁ ମୁଖ୍ୟମନ୍ତ୍ରୀଙ୍କୁ ଅଶେଷ କୃତଜ୍ଞତା ଜ୍ଞାପନ କରିବା ସହ ଦୀର୍ଘାୟୁ ରହି ଓଡ଼ିଶାର ସେବା କରିଚାଲିଥାନ୍ତୁ ବୋଲି ମା’ ବିରଜାଙ୍କ ନିକଟରେ ପ୍ରାର୍ଥନା କରିଥିଲେ। ପରେ ବରୀ ବିଧାୟିକା ସୁନନ୍ଦା ଦାସ ଭାଷଣ ଛଳରେ କହିଥିଲେ, ଏହି ଜିଲାର ସଂସ୍କୃତି, ଐତିହ୍ୟ ଓ ପରମ୍ପରା ଅନନ୍ୟ, ଯାଜପୁର ଜିଲା ଅତୀତ ଗୌରବମୟ ଇତିହାସ। ଉଭୟ ଶାକ୍ତ ଓ ଗାଣପତ୍ୟ ସାମ୍ରାଜ୍ୟର ମିଳନର ସୃଷ୍ଟି ହେଉଛି ଯାଜପୁର ଜିଲା। ଜିଲା ପରିଷଦ ସଭାପତି ନଳିନୀପ୍ରଭା ଜେନା ଅନ୍ୟତମ ଅତିଥି ଭାବେ ଯୋଗଦେଇ ଯାଜପୁର ଜିଲା ଆଜି ସବୁକ୍ଷେତ୍ରରେ ଏକ ଅଗ୍ରଣୀ ଜିଲା ଭାବେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛି ବୋଲି କହିବା ସହିତ ଆର୍ଥିକ ଅଭିବୃଦ୍ଧିରେ ମଧ୍ୟ ଗୁରୁତ୍ୱପୂର୍ଣ୍ଣ ସ୍ଥାନରେ ପହଞ୍ଚତ୍ପାରିଛି ବୋଲି କହିଥିଲେ।
ଅନ୍ୟମାନଙ୍କ ମଧ୍ୟରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା, ରାଜସ୍ବ ବିପର୍ଯ୍ୟୟ ଓ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ, ଗ୍ରାମ ଉନ୍ନୟନ ଦକ୍ଷତା ବିକାଶ ଓ ବୈଷୟିକ ଶିକ୍ଷା ରାଷ୍ଟ୍ରମନ୍ତ୍ରୀ ପ୍ରୀତିରଞ୍ଜନ ଘଡ଼ାଇ, ବଡଚଣା ବିଧାୟକ ଅମର ପ୍ରସାଦ ଶତପଥୀ, ଧର୍ମଶାଳା ବିଧାୟକ ପ୍ରଣବ ବଳବନ୍ତରାୟ, କୋରେଇ ବିଧାୟକ ଅଶୋକ କୁମାର ବଳ ପ୍ରମୁଖ ଯୋଗଦେଇଥିଲେ ମଧ୍ୟ ସମୟ ଅଭାବରୁ କାହାରିକୁ କହିବା ପାଇଁ ସୁଯୋଗ ମିଳି ନ ଥିଲା। ଏହି ଅବସରରେ ‘ଯଯାତି’ ସ୍ମରଣିକା ଶୁଭ ଉନ୍ମୋଚନ କରାଯାଇଥିଲା। ସଭାକୁ ଉଦ୍ଭାସିକା ଭାବେ ପରିଚାଳନା କରିଥିଲେ ବଲିଉଡ୍ର ଅନ୍ୟତମ ଶ୍ରେଷ୍ଠ କଳାକାର ନେହା ଧୁପିଆ। ଏହି ସାଧାରଣ ସଭା ଶେଷହେବା ପରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା। ଏହି ମହୋତ୍ସବରେ ବଲିଉଡ୍ର ଅନ୍ୟତମ ଶ୍ରେଷ୍ଠ ଗାୟିକା ସୁନିଧି ଚୌହାନ୍ ‘ସାମି… ସାମି….’, ‘ବିଡ଼ି ଜଲେଇଲେ’ ”ହାଲକା ହାଲକା ସୁରୁର“ ”ତେରେ ହାଥ୍ ମେ ମେରା ହାଥ୍ ହୋ“ ଗୀତ ପରିବେଷଣ କରି ଲୋକମାନଙ୍କୁ ମନମୁଗ୍ଧ କରିଥିଲେ। ମହୋତ୍ସବକୁ ଦେଖିବା ପାଇଁ ଲକ୍ଷାଧିକ ଲୋକଙ୍କ ଭିଡ଼ ଜମିଥିଲା।
