ପୁରୀ ଅଫିସ,୧୫ା୪ : ପରିକ୍ରମା ପ୍ରକଳ୍ପ ଅଧୀନରେ ଶ୍ରୀମନ୍ଦିର ଉତ୍ତର ଦ୍ୱାର ପାର୍ଶ୍ୱରେ ବେଆଇନ ନିର୍ମାଣ କାର୍ଯ୍ୟ ଚାଲିଥିବା ଶ୍ରୀଜଗନ୍ନାଥ ସେନା ଅଭିଯୋଗ ଆଣି ଶୁକ୍ରବାର ସିଂହଦ୍ୱାର ଥାନାରେ ଏତଲା ଦେଇଛି। ଏତଲାରେ ଦର୍ଶାଯାଇଛି ଯେ, ରାଜ୍ୟ ସରକାର ଓ ଜିଲା ପ୍ରଶାସନ ବିନାନୁମତିରେ ଶ୍ରୀମନ୍ଦିର ସିଂହଦ୍ୱାର, ପଶ୍ଚିମ ଦ୍ୱାର ଏବଂ ଦକ୍ଷିଣ ଦ୍ୱାର ପାର୍ଶ୍ୱରେ ମେଶିନ୍ ଦ୍ୱାରା ୩୦ରୁ ୪୦ ଫୁଟର ଗାତ ଖୋଳି ବିଶାଳ ନିର୍ମାଣ କାର୍ଯ୍ୟ କରାଯାଇଛି। ଫଳରେ ଶ୍ରୀମନ୍ଦିର ପ୍ରତି ବିପଦ ସୃଷ୍ଟି ହୋଇ ନାଟମଣ୍ଡପ, ଘଣ୍ଟି ଦ୍ୱାର, ବେହରଣ ଦ୍ୱାର, ଜଗମୋହନ, ଜୟ ବିଜୟ ଦ୍ୱାର ପ୍ରଭୃତି ସ୍ଥାନରେ ଫାଟ ସୃଷ୍ଟି ହୋଇଛି। ତେଣୁ ଉକ୍ତ କାର୍ଯ୍ୟକୁ ବିରୋଧ କରାଯାଉଛି। ଏ ନେଇ ହାଇକୋର୍ଟରେ ମାମଲା ଚାଲିଛି। ହାଇକୋର୍ଟ ରାଜ୍ୟ ସରକାର ଏବଂ ଏଏସ୍ଆଇକୁ ନୋଟିସ୍ ଜାରି କରିଛନ୍ତି। ୨୧ ତାରିଖରେ ଯୁଗ୍ମ ଅନୁଧ୍ୟାନ ଓ ସତ୍ୟପାଠ ଦାଖଲ ଲାଗି କୋର୍ଟଙ୍କ ନିର୍ଦ୍ଦେଶ ରହିଛି। ଏପରି ସ୍ଥଳେ ପ୍ରଶାସନ ଏସବୁକୁ ଖାତିର ନ କରି କାର୍ଯ୍ୟ ଜାରି ରଖିଛି। ସେହିପରି ପ୍ରତି ଶନିବାର ସଚିବ ପୁରୀ ଆସି କାର୍ଯ୍ୟ ତଦାରଖ କରୁଥିବାବେଳେ ଭକ୍ତଙ୍କୁ ପ୍ରାୟ ଦୁଇଘଣ୍ଟା ପର୍ଯ୍ୟନ୍ତ ଶ୍ରୀମନ୍ଦିରକୁ ଛଡ଼ାଯାଉନାହିଁ। ଭକ୍ତଙ୍କୁ ଦୀର୍ଘ ସମୟ ଠିଆ ହେବାକୁ ପଡୁଛି। ଏ ନେଇ ମୁଖ୍ୟ ଶାସନଙ୍କ ସମେତ ଜିଲା ପ୍ରଶାସନ, ଏନ୍ଏମ୍ଏ, ଟାଟା, ଓବିସିସି ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଶ୍ରୀଜଗନ୍ନାଥ ସେନା ଆବାହକ ପ୍ରିୟଦର୍ଶନ ପଟ୍ଟନାୟକ ଦାବି କରିଛନ୍ତି।
