ପୁରୀ ଅଫିସ,୫।୭:ରଥ ନିର୍ମାଣରେ ଲାଗୁଥିବା କାଠର ଅଭାବୀ ସ୍ଥିତି ସମସ୍ୟା ବଢ଼ାଉଛି। ପ୍ରତିବର୍ଷ ଶ୍ରୀଜୀଉଙ୍କ ପାଇଁ ନୂଆ ରଥ ନିର୍ମାଣ ହେଉଛି। ଫାସୀ, ଅସନ ଓ ଧଉରା କାଠ ପର୍ଯ୍ୟାପ୍ତ ପରିମାଣରେ ଆବଶ୍ୟକ ପଡ଼ୁଛି। ଧୀରେ ଧୀରେ ଏସବୁ କାଠ ଦୁର୍ଲଭ ହେବାରେ ଲାଗିଲାଣି। ଏପରିକି ଚଳିତବର୍ଷ ଏସବୁ କାଠ ଯୋଗାଇଦେବାକୁ ଭକ୍ତଙ୍କୁ ନିବେଦନ କରାଯାଇଥିଲେ ମଧ୍ୟ ପର୍ଯ୍ୟାପ୍ତ ପରିମାଣର ମିଳିପାରିନାହିଁ। ଏଣୁ ଏଭଳି ସ୍ଥିତିକୁ ଦେଖି ଗଜପତି ମହାରାଜା ଦିବ୍ୟସିଂହ ଦେବ ଚିନ୍ତା ପ୍ରକଟ କରିଛନ୍ତି। ଗଜପତି ମହାରାଜା କହିଛନ୍ତି, ରଥ ପାଇଁ କାଠର ଅଭାବୀ ସ୍ଥିତି ଏକ ବଡ଼ ସମସ୍ୟା। ଏହାର ସମାଧାନ ହେଉଛି ଜଗନ୍ନାଥ ବନ ପ୍ରକଳ୍ପ। ମହାପ୍ରଭୁଙ୍କ ରଥଯାତ୍ରା ପାଇଁ କେବେ ହେଲେ ରଥ କାଠର ଅଭାବ ହେବ ନାହିଁ, ଏହି ଉଦ୍ଦେଶ୍ୟରେ ରାଜ୍ୟ ସରକାର ଜଗନ୍ନାଥ ବନ ପ୍ରକଳ୍ପ ଆରମ୍ଭ କରିଥିଲେ। ଏହାକୁ ସଫଳ କରିବା ରାଜ୍ୟ ସରକାରଙ୍କ ଦାୟିତ୍ୱ। ଜଗନ୍ନାଥ ବନ ପ୍ରକଳ୍ପର ପୁନରୁଦ୍ଧାର ନିହାତି ଦରକାର, ନଚେତ୍ ଭବିଷ୍ୟତରେ କାଠ ଅଭାବ ସମସ୍ୟା ଆହୁରି ବଢ଼ିବ। ବନ ପ୍ରକଳ୍ପ ଅଧୀନରେ କେଉଁ କେଉଁ କାର୍ଯ୍ୟକ୍ରମ ହାତକୁ ନିଆଯାଉଛି ତାହା କିଛିବର୍ଷ ହେବ ଆମେ ଜାଣିପାରୁନାହୁଁ। ସରକାର ଆମ ସହଯୋଗ ଚାହିଁଲେ ଆମେ ସହଯୋଗ କରିବା ପାଇଁ ପ୍ରସ୍ତୁତ। ବନ ବିଭାଗକୁ ନେତୃତ୍ୱ ନେବାର ଆବଶ୍ୟକତା ରହିଛି। ବନ ବିଭାଗ ଚାହିଁଲେ ଜଗନ୍ନାଥ ବନ ପ୍ରକଳ୍ପ ସଫଳ ହୋଇପାରିବ ବୋଲି ସେ ପ୍ରକାଶ କରିଛନ୍ତି।
ଅନ୍ୟପକ୍ଷରେ ରଥ କାଠର ଅଭାବୀ ସ୍ଥିତିକୁ ଦୂର କରିବା ଉଦ୍ଦେଶ୍ୟରେ କେଉଁ କେଉଁ ପଦକ୍ଷେପ ନିଆଯିବା ଦରକାର ସେନେଇ ମହାରଣା ସେବକମାନଙ୍କ ସହ ଆଲୋଚନା କରିବା ଲାଗି ଗତ ଜୁନ୍ ୧୯ରେ ପୁରୀ ସମେତ ୭ଟି ବନଖଣ୍ଡର ଅଧିକାରୀ ପୁରୀ ରଥଖଳାରେ ପହଞ୍ଚିଥିଲେ। ଏହି ଅବସରରେ ଅଧିକାରୀମାନେ ସମୀକ୍ଷା କରିବା ସହ ମହାରଣା, ରଥ ଅମିନ ଓ ରଥ ମେକାପଙ୍କ ସହିତ ଆଲୋଚନା କରିଥିଲେ। ସେତେବେଳେ ଭୁବନେଶ୍ୱର ଆଞ୍ଚଳିକ ବନଖଣ୍ଡ ଅଧିକାରୀ ମନୋଜ ମହାପାତ୍ର କହିଥିଲେ, ପ୍ରଥମେ କେବଳ ନୟାଗଡ଼ ବନଖଣ୍ଡରୁ କାଠ ଆସୁଥିଲା। ଉପଯୁକ୍ତ କାଠର ଅଭାବ ହେତୁ ଗତବର୍ଷଠାରୁ ନୟାଗଡ଼ ସମେତ ଖୋର୍ଦ୍ଧା, ଘୁମୁସର, ପୁରୀ, ଭୁବନେଶ୍ୱର ସିଟି ଡିଭିଜନ୍ ଏବଂ ବୌଦ୍ଧ ବନଖଣ୍ଡରୁ କାଠ ଆସୁଛି। ଗତ ୧୦ରୁ ୧୫ ବର୍ଷ ହେବ ଜଗନ୍ନାଥ ବନ ପ୍ରକଳ୍ପ ହୋଇଛି। ବନ ପ୍ରକଳ୍ପ ଅଧୀନରେ ଲାଗିଥିବା ଗଛ ୬ ଫୁଟ୍ ଗୋଲେଇ ଓ ୪୦ ଫୁଟ୍ ଲମ୍ବ ହେବାକୁ ୧୨୦ରୁ ୧୪୦ ବର୍ଷ ଦରକାର। ଗଛଗୁଡ଼ିକର ବୃଦ୍ଧି ମଧ୍ୟ ସ୍ବାଭାବିକଠାରୁ କମ୍ ରହିଛି। ରଥ ନିର୍ମାଣ ଲାଗି ପ୍ରତିବର୍ଷ ପ୍ରାୟ ୯ଶହ ଗଛର କାଠ ଆବଶ୍ୟକ ହେଉଛି। ଏଣୁ ଜଗନ୍ନାଥ ବନ ପ୍ରକଳ୍ପ ଅଧୀନରେ ଲାଗିଥିବା ଫାସୀକାଠ ମିଳିବାକୁ ଆହୁରି ୬୦ରୁ ୭୦ ବର୍ଷ ଲାଗିବ। ଅନ୍ୟ କାଠ ଶହେ ବର୍ଷ ପରେ ମିଳିବ। ତେଣୁ ବନ ପ୍ରକଳ୍ପରୁ କାଠ ଆଣି ରଥ ନିର୍ମାଣ କରିବା ନିକଟ ଦଶନ୍ଧିରେ ସମ୍ଭବ ହୋଇ ନ ପାରେ ବୋଲି ସେ ପ୍ରକାଶ କରିଥିଲେ। ସମ୍ପ୍ରତି ରଥକାଠ ସମସ୍ୟାକୁ ନେଇ ଗଜପତି ମହାରାଜା ଉଦ୍ବେଗ ପ୍ରକାଶ କରିବା ପରେ ଜଗନ୍ନାଥ ବନ ପ୍ରକଳ୍ପର ସଫଳ କାର୍ଯ୍ୟକାରିତା କ୍ଷେତ୍ରରେ ରାଜ୍ୟ ସରକାରଙ୍କ ପଦକ୍ଷେପକୁ ସମସ୍ତଙ୍କ ଅପେକ୍ଷା ରହିଛି।
