ସୁନାବେଡା,୨୫।୪(ସ୍ବ.ପ୍ର.): ସାଧାରଣ ଲୋକଙ୍କ ସୁବିଧା ପାଇଁ ହାଲ ପ୍ରଶାସନ ବହୁ ଅର୍ଥ ଖର୍ଚ୍ଚ କରୁଛି। ମାତ୍ର ଲୋକେ ସେଥିରୁ ବିଶେଷ ଉପକୃତ ହେଉନାହାନ୍ତି। ଲୋକଙ୍କ ପାଇଁ ହାଲ ନିର୍ମାଣ କରିଥିବା ଏକ କଲ୍ୟାଣମଣ୍ଡପ ଲୋକଙ୍କ କାର୍ଯ୍ୟରେ ଲାଗି ନ ପାରି ଏବେ ଭୂତକୋଠି ପାଲଟିଲାଣି। ହାଲ ପରିସର ୱାଇ ଜୋନ ନିକଟରେ ଥିବା କଲ୍ୟାଣ ମଣ୍ଡପ ୨କୋଟି ଟଙ୍କା ବ୍ୟୟରେ ୪ ବର୍ଷ ତଳୁ ନିର୍ମାଣ ସରିଲାଣି। ଗତ କୋଭିଡ ସମୟରେ ସଂକ୍ରମଣକୁ ନିୟନ୍ତ୍ରଣ କରିବା ଲାଗି ଜିଲା ସାସ୍ଥ୍ୟ ବିଭାଗ ନିର୍ଦ୍ଦେଶରେ ୨୦୨୦ ଅଗଷ୍ଟ ୨୬ରୁ ଏହାକୁ କୋଭିଡ କେୟାର୍ ସେଣ୍ଟର ରୂପେ ବ୍ୟବହାର କରାଯାଇଥିଲା। କୋଭିଡ ସଂକ୍ରମଣ କମିଯିବା ପରଠାରୁ ଏବେ ସେଠାରେ ତାଲା ଝୁଲୁୁଛି। ସୂଚନାଯୋଗ୍ୟ, ହାଲ ରେ ଚାକିରି କରୁଥିବା ଏବଂ ଏହାର ଆଖପାଖ ଅଞ୍ଚଳର ଲୋକଙ୍କ ସାମାଜିକ କାର୍ଯ୍ୟକ୍ରମ ନିମନ୍ତେ ପୂର୍ବରୁ ଏକ ମାତ୍ର କଲ୍ୟାଣ ମଣ୍ଡପ ଏଠାରେ ରହିଥିଲା। ତେବେ ଆବଶ୍ୟକତା ଦୃଷ୍ଟିରୁ ଆଉ ଗୋଟିଏ କଲ୍ୟାଣ ମଣ୍ଡପର କଳ୍ପନା କରି ୨୦୧୭ରେ ୨.୫ କୋଟି ଟଙ୍କା ବ୍ୟୟରେ ଏହାକୁ ନିର୍ମାଣ କରାଯାଇଥିଲା। ପ୍ରଶାସନ ଏ ଦିଗରେ ପଦକ୍ଷେପ ନେଇ କଲ୍ୟାଣମଣ୍ଡପ କାର୍ଯ୍ୟକ୍ଷମ କରିବାକୁ ସାଧାରଣରେ ଦାବି ହେଉଛି।
