ରାଇଘର, ୧୦।୨(ଡି.ଏନ୍.ଏ.): ଦୀର୍ଘ ଛଅ ବର୍ଷ ହେଲା ଅନ୍ଧାରରେ ରହୁଛନ୍ତି ଛାତ୍ର। ସେମାନଙ୍କ ପାଖରେ ପହଞ୍ଚି ନାହିଁ ପାଣି, ବିଦ୍ୟୁତ୍। ଏଭଳି ସମସ୍ୟା ଦେଖିବାକୁ ମିଳିଛି ରାଇଘର ବ୍ଲକ ପାରୁଆ ଉଚ୍ଚ ପ୍ରକଳ୍ପ ବିଦ୍ୟାଳୟର ହଷ୍ଟେଲରେ।
ରାଇଘର ବ୍ଲକ ପାରୁଆ ଉଚ୍ଚ ପ୍ରକଳ୍ପ ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ମଧ୍ୟରେ ୪୧୭ ଜଣ ପିଲାଙ୍କ ପାଠପଢ଼ା ପାଇଁ ବ୍ୟବସ୍ଥା ରହିଛି। ସ୍କୁଲଠାରୁ ଅଧକିଲୋମିଟର ଦୂରରେ ୧୪୦ ଶଯ୍ୟା ବିଶିଷ୍ଟ ଏକ ଛାତ୍ରାବାସ ରହିଛି। ୨୦୧୫ରେ ତତ୍କାଳୀନ ବିଧାୟକ ସୁବାସ ଗଣ୍ଡ ଏହାକୁ ଉଦ୍ଘାଟନ କରିଥିଲେ। ଉଦ୍ଘାଟନକୁ ୬ବର୍ଷ ବିତିଯାଇଥିଲେ ମଧ୍ୟ ଏଠାରେ ଆଜି ପର୍ଯ୍ୟନ୍ତ ବିଦ୍ୟୁତ୍ ଓ ପାଣି ସଂଯୋଗ କରାଯାଇପାରିଲା ନାହିଁ। ଛାତ୍ରମାନେ ନିତ୍ୟକର୍ମ ପାଇଁ ନିକଟସ୍ଥ ପୋଖରୀ ଉପରେ ନିର୍ଭର କରୁଛନ୍ତି। ପିଇବା ପାଣି ପାଇଁ ହଷ୍ଟେଲ ପରିସର ବାହାରେ ୨ଶହ ମିଟର ଦୂରରେ ଥିବା ନଳକୂପ ଉପରେ ନିର୍ଭର କରିଥାନ୍ତି। ରାତିରେ ପାଣି ଜରୁରୀ ହେଲେ ପିଲାଙ୍କୁ ହଷ୍ଟେଲ ବାହାରକୁ ଯିବାକୁ ପଡ଼ିଥାଏ। ଅନ୍ଧାରରେ ହିଂସ୍ରଜନ୍ତୁ ଓ ସାପ ଆଦିର ଭୟ ରହୁଛି ବୋଲି ଅଭିଯୋଗ ହୋଇଛି। ବର୍ତ୍ତମାନ ଦଶମଶ୍ରେଣୀର ୪୦ ଜଣ ଛାତ୍ର ଏଠାର ରହୁଛନ୍ତି। ସେମାନଙ୍କ ସୁରକ୍ଷା ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି। ସେହିଭଳି ବିଦ୍ୟୁତ୍ ନ ଥିବାରୁ ସନ୍ଧ୍ୟାରେ ପାଠପଢ଼ା ପାଇଁ ପିଲାମାନଙ୍କୁ ଲଣ୍ଠନ ଓ ଡିବିରି ଉପରେ ନିର୍ଭର କରିବାକୁ ପଡିଥାଏ। ଏ ସମ୍ପର୍କରେ ଲୋକ ପ୍ରତିନିଧି ଓ ପ୍ରଶାସନକୁ ଜଣାଇଥିଲେ ମଧ୍ୟ କେହି ଗୁରୁତ୍ୱ ଦେଉ ନ ଥିବା ଗ୍ରାମବାସୀ କହିଛନ୍ତି। କରୋନା ପାଇଁ ଏବେ ସ୍କୁଲ ବନ୍ଦ ରହିଛି। ଆଗକୁ ସମସ୍ତ ଶ୍ରେଣୀ ଖୋଲିବ। ତାହା ପୂର୍ବରୁ ହଷ୍ଟେଲରେ ଥିବା ସମସ୍ୟାର ସମାଧାନ କରିବାକୁ ଗ୍ରାମବାସୀ, ଅଭିଭାବକ ଓ ସ୍କୁଲ ପରିଚାଳନା କମିଟି ସଦସ୍ୟ କହିଛନ୍ତି। ସରକାର ପିଲାଙ୍କ ଉନ୍ନତି ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଥିଲେ ମଧ୍ୟ ବିଭାଗୀୟ ଅଧିକାରୀଙ୍କ ଖାମଖିଆଲି ନୀତି ପାଇଁ ଅସୁବିଧା ହେଉଥିବା ବୁଦ୍ଧିଜୀବୀମାନେ ମତ ଦେଇଛନ୍ତି। ହଷ୍ଟେଲ ଦାୟିତ୍ୱରେ ଥିବା ଠିକାଦାର ପାନୀୟ ଜଳ ବ୍ୟବସ୍ଥା ଓ ବିଦ୍ୟୁତ୍ ସଂଯୋଗ କରି ସ୍କୁଲ କର୍ତ୍ତୃପକ୍ଷଙ୍କୁ ହସ୍ତାନ୍ତର କରିବା କଥା। କିନ୍ତୁ ଉଦ୍ଘାଟନ ସମୟରେ ଏଥିପ୍ରତି କେହି ଦୃଷ୍ଟି ଦେଇ ନ ଥିବାରୁ ଛାତ୍ରମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଯଥାଶୀଘ୍ର ସମସ୍ୟା ସମାଧାନ କରିବାକୁ ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ରାଇଘର ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ଅର୍ଜୁନ ନାୟକଙ୍କୁ ପଚାରିବାରୁ ହଷ୍ଟେଲରେ ଲାଗି ରହିଥିବା ଅବ୍ୟବସ୍ଥା ସମ୍ପର୍କରେ ଅବଗତ ଅଛି। ଆଇଟିଡିଏ ଅଧିକାରୀଙ୍କୁ ହଷ୍ଟେଲ ସମସ୍ୟା ସମ୍ପର୍କରେ ଜଣାଯାଇଛି। ଯଥା ଶୀଘ୍ର ସମସ୍ୟା ସମାଧାନ କରାଯିବ ବୋଲି ସେ କହିଛନ୍ତି। ବ୍ଲକ ଭାରପ୍ରାପ୍ତ ବିଡିଓ ବିଜୟ କୁମାର ସେଠୀଙ୍କୁ ପଚାରିବାରୁ, ସ୍କୁଲରେ ବିଦ୍ୟୁତ୍ ସଂଯୋଗ କାମ ପଞ୍ଚାୟତକୁ ଦିଆଯାଇଛି। ଜଲ୍ଦି ଏହି ସମସ୍ୟାର ସମାଧାନ ହେବ ବୋଲି ସେ କହିଛନ୍ତି।
