ଆଜିକାଲି ଅଧିକାଂଶ ଲୋକ ଘରେ ଗଛଲତା ରଖିବାକୁ ପସନ୍ଦ କରୁଛନ୍ତି। ଏହାଦ୍ୱାରା ଘରର ବାତାବରଣ ସ୍ବଚ୍ଛ ହେବା ସହ ସକରାତ୍ମକ ଉର୍ଜା ଆସିଥାଏ। ବାସ୍ତୁ ଶାସ୍ତ୍ର ଅନୁଯାୟୀ କିଛି ଗଛ ଏପରି ରହିଛି ଯାହାକୁ ଘରେ ଲଗାଇବା ଦ୍ୱାରା ସମସ୍ତ ଚିନ୍ତା ଦୂର ହୋଇଥାଏ। ଘରେ ମା’ ଲକ୍ଷ୍ମୀଙ୍କ ବିଶେଷ କୃପା ରହିବା ସହ ରୋଗର ମୁକ୍ତି ମିଳିଥାଏ। ଆସନ୍ତୁ ଜାଣିବା ସେ ସମ୍ପର୍କରେ…
ତୁଳସୀ: ଅଧିକାଂଶ ଲୋକ ଏହି ଗଛକୁ ଘରେ ଲଗାଇଥାନ୍ତି। ହିନ୍ଦୁ ଧର୍ମାବଲମ୍ବୀମାନେ ତୁଳସୀକୁ ପୂଜା କରିଥାନ୍ତି। ବାସ୍ତୁଶାସ୍ତ୍ର ଅନୁଯାୟୀ ଏହି ଗଛକୁ ଲଗାଇବା ଦ୍ୱାରା ନକରାତ୍ମକ ଉର୍ଜା ଦୂର ହୋଇଥାଏ। ହେଲେ ଏହାର ରକ୍ଷଣାବେକ୍ଷଣକୁ ନେଇ ବିଶେଷ ଧ୍ୟାନ ରଖିବା ଜରୁରୀ। ଏହାକୁ ପୂର୍ବ-ଉତ୍ତର ନଚେତ ଉତ୍ତର ଦିଗରେ ଲଗାଇବା ଉଚିତ। ଘର ଅଗଣାରେ ବି ଏହାକୁ ରଖି ପାରିବେ। ଏହାର ଆଖପାଖରେ କଣ୍ଟାଜାତୀୟ ବୃକ୍ଷ ଲଗାନ୍ତୁ ନାହିଁ। ତୁଳସୀ ଗଛ ନିକଟରେ ସନ୍ଧ୍ୟାରେ ଦୀପ ନିଶ୍ଚିତ ଜଳାନ୍ତୁ। ଏପରି କରିବା ଦ୍ୱାରା ମା’ ଲକ୍ଷ୍ମୀଙ୍କ କୃପା ରହିଥାଏ।
ମନିପ୍ଲାଣ୍ଟ: ବାସ୍ତୁ ଅନୁଯାୟୀ ଏହି ଗଛ ବହୁତ ଶୁଭ। ଏହାକୁ ଲଗାଇବା ଦ୍ୱାରା ଆର୍ଥିକ ସ୍ଥିତିରେ ସୁଧାର ଆସିଥାଏ। ଏହି ଗଛ ଯେତେ ସବୁଜ ରହିବ ସେତେ ଭଲ। କାରଣ ଏହାକୁ ମା’ ଲକ୍ଷ୍ମୀଙ୍କ ରୂପ ବୋଲି କୁହାଯାଏ। ଏହାକୁ ସର୍ବଦା ଦକ୍ଷିଣ ପୂର୍ବ ଦିଗରେ ରଖିବା ଉଚିତ।
ଲାଜକୁଳି ଲତା: ଏହି ଗଛ ଶନି ଦେବଙ୍କ ପ୍ରିୟ। ବାସ୍ତୁ ଅନୁଯାୟୀ ଏହି ଗଛକୁ ମୁଖ୍ୟ ଦ୍ୱାରର ବାମ ପାର୍ଶ୍ୱରେ ଲଗାଇବା ଉଚିତ। ଏହା ଆଗରେ ସନ୍ଧ୍ୟାରେ ଦୀପ ଲଗାଇବା ମଧ୍ୟ ଶୁଭ। କୁହାଯାଏ ଏହି ଗଛ ଲଗାଇବା ଦ୍ୱାରା ଧାରଉଧାରରୁ ସହ ରୋଗରୁ ମୁକ୍ତି ମିଳିଥାଏ। ଏହି ଗଛ ଘର ତଥା ପରିବାରରେ ସୁଖ-ସମୃଦ୍ଧି ଫେରାଇ ଆଣିବାର କାରକ ସାବ୍ୟସ୍ତ ହୋଇତାଏ।
ବାଉଁଶ ଗଛ: ବାସ୍ତୁ ଅନୁଯାୟୀ ବାଉଁଶ ଗଛ ଲଗାଇବା ବହୁତ ଶୁଭ। ଏହା ଦୁର୍ଭାଗ୍ୟ ଦୂର କରି ସୌଭାଗ୍ୟ ବୃଦ୍ଧି କରିଥାଏ। ଏହି ଗଛ ଲଗାଇବା ଦ୍ୱାରା ଧନସତ୍ତି ବୃଦ୍ଧି ହୋଇଥାଏ।
