କଟକ,୨ା୪(ଶିଳ୍ପା ପ୍ରିୟଦର୍ଶିନୀ):ନିର୍ବାଚନ ପାଖେଇ ଆସୁଥିବାବେଳେ ରାଜନେତାଙ୍କ ଦଳଡିଅଁା ପର୍ବ ଜାରି ରହିଛି। ଏଥିରୁ ବାଦ୍ ପଡିନାହାନ୍ତି କେନ୍ଦ୍ରାପଡା ଏମ୍ପି ଅନୁଭବ ମହାନ୍ତି। ଦୁଇଦିନ ତଳେ ବିଜେଡିର ପ୍ରାଥମିକ ସଦସ୍ୟ ପଦରୁ ସେ ଇସ୍ତଫା ଦେଇଥିଲେ। ହେଲେ କେଉଁ କାରଣ ପାଇଁ ଦଳ ଛାଡିଲେ ଇସ୍ତଫାପତ୍ରରେ ସେ ଉଲ୍ଲେଖ କରି ନ ଥିଲେ। ସୋମବାର ଦିଲ୍ଲୀସ୍ଥିତ ଭାଜପା କାର୍ଯ୍ୟାଳୟରେ ବିଧିବଦ୍ଧ ଭାବେ ସେ ପଦ୍ମ ଧରିଛନ୍ତି। ଭାଜପା ଅନୁଭବଙ୍କୁ ବାରବାଟୀ-କଟକ ନଚେତ୍ ସାଲେପୁର ବିଧାନସଭା ଆସନ ପାଇଁ ଟିକେଟ ଦେବ ବୋଲି ସାଧାରଣରେ ଚର୍ଚ୍ଚା ହେଉଛି। ତେବେ ଏଭଳି ନେତା ଦଳ ଛାଡିବା ଓ ଦଳ ବିରୋଧରେ ମନ୍ତବ୍ୟ ଦେବା ନେଇ ଏକ କାର୍ଯ୍ୟକ୍ରମରେ ଯୋଗଦେଇ ଜିଲା ସଭାପତି ତଥା ରାଜ୍ୟ ସଭା ସଦସ୍ୟ ଦେବାଶିଷ ସାମନ୍ତରାୟ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ନିର୍ବାଚନ ଆସିଲେ ଦଳଡିଅଁା ପର୍ବ ଆରମ୍ଭ ହୁଏ। ୨୦୦୦ ମସିହାରୁ ଏହା ଦେଖିଆସିଛୁ। ପୂର୍ବରୁ ଯେଉଁମାନେ ଦଳ ଛାଡିଛନ୍ତି ସେମାନଙ୍କ ଅବସ୍ଥା ଏବେ ଯାହା ଅଛି, ଠିକ୍ ସେହିପରି ୨୦୨୪ ନିର୍ବାଚନ ସମୟରେ ଯେଉଁମାନେ ଦଳ ଛାଡିଛନ୍ତି ସେମାନଙ୍କ ଅବସ୍ଥା ସେଭଳି ରହିବ। ବିଜେଡିରୁ ଏଭଳି ନେତା ପଳେଇବା ଦଳ ପାଇଁ ଶୁଭ ହେବ ଏବଂ ଭଲ ଫଳ ମିଳିବ ବୋଲି ସାମନ୍ତରାୟ କହିଛନ୍ତି। ଏନେଇ ଅନୁଭବଙ୍କ ପ୍ରତିକ୍ରିୟା ମିଳିପାରିନାହିଁ। ସୂଚନାଯୋଗ୍ୟ, ପୂର୍ବରୁ କଟକ ଏମ୍ପି ଭର୍ତ୍ତୃହରି ମହତାବ, ଅରିନ୍ଦମ ରାଏ ବିଜେଡି ଛାଡି ଭାଜପାରେ ସାମିଲ ହୋଇଛନ୍ତି।
