ନୂଆଦିଲ୍ଲୀ,୧୨।୩: ଇରାନ ବିରୋଧରେ ଜାରି ରହିଥିବା ସାମରିକ ଅଭିଯାନ ଏବେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପାଇଁ ଅଡୁଆ ସୂତା ପାଲଟିଛି। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ରଣନୀତିକୁ ସମର୍ଥନ କରି ଟ୍ରମ୍ପ ଏବେ ପଶ୍ଚାତାପ କରୁଥିବା ପରି ମନେହେଉଛି। ବିଶେଷଜ୍ଞଙ୍କ ମତରେ, ଇରାନକୁ ଦୁର୍ବଳ ଭାବି ଆମେରିକା ଯେଉଁ ଯୁଦ୍ଧ ଆରମ୍ଭ କରିଥିଲା, ତାହା ଏବେ ଏକ ଦୀର୍ଘକାଳୀନ ସଂଘର୍ଷ ବା ‘ଭିଏତନାମ ଯୁଦ୍ଧ’ ପରି ରୂପ ନେଇପାରେ।
ଭେନେଜୁଏଲାରେ ସଫଳତା ପାଇବା ପରେ ଉତ୍ସାହିତ ଟ୍ରମ୍ପ, ନେତାନ୍ୟାହୁଙ୍କ କଥାରେ ପଡ଼ି ଇରାନ ଉପରେ ଆକ୍ରମଣ କରିବାକୁ ନିଷ୍ପତ୍ତି ନେଇଥିଲେ। ନେତାନ୍ୟାହୁ ଦାବି କରିଥିଲେ ଯେ ଇରାନର ପ୍ରତିରକ୍ଷା ବ୍ୟବସ୍ଥା ଓ ପରମାଣୁ କେନ୍ଦ୍ରଗୁଡ଼ିକ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଫେବୃଆରୀ ୨୮ରେ ହୋଇଥିବା ମିଳିତ ଆକ୍ରମଣରେ ଇରାନର ସର୍ବୋଚ୍ଚ ନେତା ଅଲି ଖାମେନେଇଙ୍କ ମୃତ୍ୟୁ ଘଟିଥିଲେ ମଧ୍ୟ ଯୁଦ୍ଧ ଶେଷ ହେବାର ନାଁ ନେଉନାହିଁ।
ଏହି ଯୁଦ୍ଧକୁ ନେଇ ଆମେରିକା ଜନସାଧାରଣଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ନ୍ୟୁୟର୍କ ଟାଇମ୍ସର ରିପୋର୍ଟ ଅନୁଯାୟୀ, ମାତ୍ର ୪୧% ଆମେରିକୀୟ ଏହି ଯୁଦ୍ଧକୁ ସମର୍ଥନ କରୁଛନ୍ତି। ଗ୍ୟାଲପ୍ ପୋଲ୍ ଅନୁଯାୟୀ, ପ୍ରଥମ ଥର ପାଇଁ ଆମେରିକାରେ ଇସ୍ରାଏଲ ଅପେକ୍ଷା ପାଲେଷ୍ଟାଇନ ପ୍ରତି ଅଧିକ ସହାନୁଭୂତି (୪୧%) ଦେଖିବାକୁ ମିଳିଛି। ଟ୍ରମ୍ପ କୌଣସି ସ୍ପଷ୍ଟ ‘ଏକଜିଟ୍ ଷ୍ଟ୍ରାଟେଜି’ ବା ଯୁଦ୍ଧରୁ ବାହାରିବାର ଯୋଜନା ନକରି ଏଥିରେ ଝାସ ଦେଇଥିବା ଅଭିଯୋଗ ହେଉଛି।
ଆମେରିକାର ଆକଳନକୁ ଭୁଲ ପ୍ରମାଣିତ କରି ଇରାନ ଏକ ଭିନ୍ନ ରଣନୀତି ଆପଣାଇଛି। ଇରାନ ନିଜ ସୀମା ବାହାରକୁ ଯୁଦ୍ଧକୁ ବ୍ୟାପ୍ତ କରି ଉପସାଗରୀୟ ଦେଶଗୁଡ଼ିକୁ ଏଥିରେ ସାମିଲ କରିଛି। ଫଳରେ ମାତ୍ର ୬ ଦିନ ମଧ୍ୟରେ ଆମେରିକାର ୧୧.୩ ବିଲିୟନ ଡଲାର ଖର୍ଚ୍ଚ ହୋଇଛି। ବିଶ୍ୱ ବଜାରରେ ଅଶୋଧିତ ତୈଳ ଦର ଆକାଶଛୁଆଁ ହୋଇଛି। ବିଶ୍ୱ ଅର୍ଥନୀତିରେ ମାନ୍ଦାବସ୍ଥାର ଆଶଙ୍କା ଦେଖାଦେଇଛି।
ଇସ୍ରାଏଲରେ ନେତାନ୍ୟାହୁ ନିଜର ଭାବମୂର୍ତ୍ତି ସଧାରିବା ପାଇଁ ଏହି ଯୁଦ୍ଧକୁ ଏକ ମାଧ୍ୟମ ଭାବେ ବ୍ୟବହାର କରୁଥିବା କୁହାଯାଉଛି। ଗାଜା ଯୁଦ୍ଧ ଓ ନିଜ ବିରୋଧରେ ଥିବା ଦୁର୍ନୀତି ମାମଲାରୁ ଦୃଷ୍ଟି ହଟାଇବା ପାଇଁ ସେ ଇରାନ ସହ ସଂଘର୍ଷକୁ ତେଜୁଥିବା ଚର୍ଚ୍ଚା ହେଉଛି।
ସାମ୍ପ୍ରତିକ ସ୍ଥିତି ଅନୁଯାୟୀ, ଇରାନ ଏବେବି ଶକ୍ତିଶାଳୀ ରହିଛି ଏବଂ ଯୁଦ୍ଧ କେବେ ଶେଷ ହେବ ତାହା ତେହେରାନ ସ୍ଥିର କରିବ ବୋଲି ଚେତାବନୀ ଦେଇଛି। ଏହା ଟ୍ରମ୍ପଙ୍କ ପାଇଁ ଏକ ବଡ଼ କୂଟନୈତିକ ଓ ସାମରିକ ପରାଜୟ ସାବ୍ୟସ୍ତ ହୋଇପାରେ।
