ପାଟଣା,୬।୨(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ ଟାଙ୍ଗରପଡ଼ା ପଞ୍ଚାୟତ ବାଲିବନ୍ଧ ଗ୍ରାମ ଅଙ୍ଗନଓ୍ବାଡି (କ) କେନ୍ଦ୍ର ପାଇଁ ଅଙ୍ଗନଓ୍ବାଡି କର୍ମୀ ନିଯୁକ୍ତିରେ ଅନିୟମିତତା ଅଭିଯୋଗ ହୋଇଛି। ଏ ନେଇ ଗ୍ରାମର ଶତାଧିକ ମହିଳା ମଙ୍ଗଳବାର ନବ ନିଯୁକ୍ତ କର୍ମୀଙ୍କୁ ଅଟକ ରଖିବା ସହ ଅଙ୍ଗନଓ୍ବାଡି କେନ୍ଦ୍ର ସମ୍ମୁଖ ଫାଟକରେ ତାଲା ପକାଇ ପ୍ରତିବାଦ କରିଛନ୍ତି।
ସୂଚନାଅନୁଯାୟୀ, ଉକ୍ତ ଅଙ୍ଗନଓ୍ବାଡି କେନ୍ଦ୍ରର କର୍ମୀ ଅବସର ଗ୍ରହଣ ପରେ ନୂତନ ନିଯୁକ୍ତି ପାଇଁ ଗ୍ରାମର ୩ ଜଣ ଏସ୍ସି ବର୍ଗରୁ ପ୍ରାର୍ଥୀ ହୋଇଥିବା ବେଳେ ଗାଲଫୁଲାରୁ ଏସ୍ଟି ବର୍ଗରୁ ଶୁକାନ୍ତି ନାଏକ ଆବେଦନ କରିଥିଲେ। ଗ୍ରାମର ୩ ଜଣଙ୍କ ପ୍ରାର୍ଥୀ ମଧ୍ୟରୁ ଜଣକୁ ନିଯୁକ୍ତି ଦାବିରେ ଗ୍ରାମବାସୀ ଅଟଳ ରହି ଜାନୁୟାରୀ ୨ ତାରିଖରୁ ଆଙ୍ଗନୱାଡି କେନ୍ଦ୍ରରେ ତାଲା ପକାଇଛନ୍ତି। ଫଳରେ ଏଯାବତ୍ ଅଚଳାବସ୍ଥା ଜାରି ରହିଛି।
ମଙ୍ଗଳବାର ଟାଙ୍ଗରପଡ଼ା ପଞ୍ଚାୟତ ଗାଲଫୁଲା ଗ୍ରାମର ସୁକାନ୍ତି ନାଏକ ନିଯୁକ୍ତି ପତ୍ର ଧରି ଆଙ୍ଗନୱାଡି କେନ୍ଦ୍ରକୁ ସ୍କୁଲ ଗେଟଦେଇ ପଶିବା ପରେ ଉତ୍ତ୍ୟକ୍ତ ମହିଳାମାନେ ସୁକାନ୍ତିଙ୍କୁ ଆଙ୍ଗନୱାଡି କେନ୍ଦ୍ରରୁ ବାହାରକୁ ବାହାର କରିଦେଇ ବିରୋଧ କରିଥିଲେ। ଏ ନେଇ ଘଟଣା ସ୍ଥଳରେ ଉତ୍ତେଜନା ଦେଖା ଦେଇଛି। ଖବର ପାଇ ପୋଲିସ ବୁଝାଶୁଝା ଜାରି ରଖିଛି।
