ଖୋର୍ଦ୍ଧା ଅଫିସ, ୮ା୪: ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ (କେସିସିବି) ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ)ଙ୍କ ବିରୋଧରେ ଲକ୍ଷାଧିକ ଟଙ୍କାର ଆର୍ଥତ୍କ ଅନିୟମିତତା ଅଭିଯୋଗ ଆସିଛି। ବିଧାୟକ ଜ୍ୟୋତିରୀନ୍ଦ୍ର ନାଥ ମିତ୍ର ଏହି ଅଭିଯୋଗ ଆଣି ନିରପେକ୍ଷ ତଦନ୍ତ ଲାଗି ରାଜ୍ୟ ସମବାୟ ବିଭାଗ ଶାସନ ସଚିବଙ୍କ ନିକଟକୁ ଚିଠି ଲେଖିଛନ୍ତି। ଚିଠିରେ ଦର୍ଶାଯାଇଛି, କେସିସିବି ହେଉଛି ରାଜ୍ୟର ଦ୍ୱିତୀୟ ବୃହତ ବ୍ୟାଙ୍କ। ଏହି ବ୍ୟାଙ୍କର ସିଇଓ ଭାବେ ଅନନ୍ତ ସାମଲ ଅବସ୍ଥାପିତ ଅଛନ୍ତି। ନିକଟରେ ବ୍ୟାଙ୍କିଙ୍ଗ ଆସିଷ୍ଟାଣ୍ଟ ପଦବୀରେ ୨୬ଜଣଙ୍କୁ ଦିଆଯାଇଥିବା ନିଯୁକ୍ତିରେ ବେଆଇନ ଆର୍ଥତ୍କ କାରବାର କରାଯାଇଛି। ଯୋଗ୍ୟତା ଭିତ୍ତିରେ ନିଯୁକ୍ତି ଦିଆ ନ ଯାଇ ବ୍ୟାପକ ହେରଫେର ହୋଇଛି। ପରୀକ୍ଷା ଓ ଇଣ୍ଟରଭ୍ୟୁ ସମୟରେ ଲକ୍ଷାଧିକ ଟଙ୍କାର କାରବାର କରାଯାଇଛି। ଏପରି କି ଏହି ବ୍ୟାଙ୍କ ଅନ୍ତର୍ଗତ ବେଗୁନିଆ ବ୍ଲକ ରାଉତପଡ଼ା ଶାଖାରେ ୨କୋଟିରୁ ଊର୍ଦ୍ଧ୍ୱ ଟଙ୍କା ଆତ୍ମସାତ ହୋଇଛି। ଜିଲାପାଳ ସମବାୟ ବ୍ୟାଙ୍କର ମୁଖ୍ୟ ପ୍ରଶାସକ ରହିଥିବା ସତ୍ତ୍ୱେ ଏପର୍ଯ୍ୟନ୍ତ ହେରଫେର ଘଟଣାର ତଦନ୍ତ କିମ୍ବା କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ସିଇଓ ସାମଲ ଏଠାରେ କାର୍ଯ୍ୟରତ ଦିନଠାରୁ କୌଣସି ବ୍ୟାଙ୍କ ଶାଖା ପରିଦର୍ଶନ କରୁନାହାନ୍ତି। ଏହି ଘଟଣାର ତଦନ୍ତ ସହ ବୃହତ୍ତର ସ୍ବାର୍ଥ ଦୃଷ୍ଟିରୁ ସିଇଓଙ୍କୁ ଏଠାରୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ବିଧାୟକ ମିତ୍ର ଶାସନ ସଚିିବଙ୍କୁ ଲେଖିଥିବା ଚିଠିରେ ଉଲ୍ଲେଖ କରିଛନ୍ତି। ଅନ୍ୟପଟେ ସିିିଇଓ ସାମଲ କହିଛନ୍ତି, ବିଧାୟକଙ୍କ ଅଭିଯୋଗ ଭିତ୍ତିହୀନ ଓ ଏଥିରେ କୌଣସି ସତ୍ୟତା ନାହିଁ। ସବୁ ପ୍ରକାର ତଦନ୍ତର ସମ୍ମୁଖୀନ ହେବାକୁ ପ୍ରସ୍ତୁତ ଅଛି। ୨୦୧୯ରେ ବ୍ୟାଙ୍କିଙ୍ଗ ଆସିଷ୍ଟାଣ୍ଟ ପଦବୀ ଲାଗି ସିଲେକ୍ସନ ହୋଇଥିଲା। ୨୦୨୧ରେ ଏହାର ପରୀକ୍ଷା କରାଯାଇଥିଲା। ଏହି ପରୀକ୍ଷା ଓ ଇଣ୍ଟରଭ୍ୟୁ ଜିଲାପାଳଙ୍କ ଅଧ୍ୟକ୍ଷତାରେ କରାଯାଇଥିଲା। ଓଏସ୍ଇବିର ଗାଇଡ୍ଲାଇନ ଅନୁସାରେ ବୋର୍ଡ ଦ୍ୱାରା ୪ଜଣ ପ୍ରଶାସନିକ ଅଧିକାରୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କରାଯାଇଥିଲା। ଏଥିରେ ମୋର କୌଣସି ସମ୍ପୃୃକ୍ତି ନାହିିଁ। ବିଧାୟକ କେଉଁ ତଥ୍ୟ ଆଧାରରେ ଏହି ଅଭିଯୋଗ ଆଣିଛନ୍ତି, ସେ ଜାଣିଥିବେ। ମୁଁ ବିଧାୟକଙ୍କ ସମ୍ପର୍କରେ କିଛି କହିବାକୁ ଚାହେଁ ନାହିଁ ବୋଲି ସିଇଓ ସାମଲ ପ୍ରକାଶ କରିଛନ୍ତି।
