ଖଇରା, ୨୪।୨(ଡି.ଏନ.ଏ.) ବାଲେଶ୍ୱର ଜିଲା ଖଇରା ବ୍ଲକ ଅଧୀନ ମହତୀପୁର-ସୁଣ୍ଢିରା ରାସ୍ତାର ମଝିରେ ନିର୍ମିତ ପକ୍କା ପୋଲର ମରାମତି କାମରେ ବ୍ୟାପକ ଅନିୟମିତତା ହୋଇଥିବା ସ୍ଥାନୀୟ ସୁଣ୍ଢିରା ଗ୍ରାମବାସୀ ଓ ସ୍ଥାନୀୟ ଏମ୍ବି ଡାଇମଣ୍ଡ କ୍ଲବର ପିଲାମାନେ ଅଭିଯୋଗ କରିଛନ୍ତି। ମରାମତିର ୫ଦିନ ନ ପୂରୁଣୁ ଅନେକ ସ୍ଥାନରେ କଂକ୍ରିଟ ଫାଟିଯାଇଥିବାରୁ ଗ୍ରାମବାସୀ ଏହି କାମର ଭିଜିଲାନ୍ସ ତଦନ୍ତ ଦାବି କରିଛନ୍ତି।
ପୋଲର ଉପର କଂକ୍ରିଟ ଢଳାଇ ଓ ପାଚେରି ନିର୍ମାଣ ପାଇଁ ଗ୍ରାମ୍ୟ ଉନ୍ନୟନ ବିଭାଗ ତରଫରୁ ୨ଲକ୍ଷ ୫୬ହଜାର ଟଙ୍କା ପ୍ରଦାନ କରାଯାଇଥିଲା। ଠିକାଦାର ନିମ୍ନମାନର କାମ କରୁଥିବା ବେଳେ ଗ୍ରାମର ରବୀନ୍ଦ୍ର ନାୟକ, ତ୍ରିଲୋଚନ ନାୟକ, ରାଜେନ୍ଦ୍ର ରାୟ, ଜନ୍ମେଜୟ ଦାସଙ୍କ ସମେତ ସ୍ଥାନୀୟ ଏମ୍ବି ଡାଇମଣ୍ଡ କ୍ଲବର ସଦସ୍ୟମାନେ ଏହାକୁ ବନ୍ଦ କରିଥିଲେ। ହେଲେ ସେମାନଙ୍କୁ ଭୟଭୀତ କରି ଏହି କାର୍ଯ୍ୟକୁ ତରବରିଆ ଭାବେ ଶେଷ କରି ପଳାଇଯିବା ପରେ ଏବେ କଂକ୍ରିଟ ଢଳାଇ ନଷ୍ଟ ହେବା ଆରମ୍ଭ ହେଲାଣି। ସେପଟେ ୫ଦିନ ଧରି କାମ ଶେଷ ହୋଇସାରିଥିବା ବେଳେ ଦିନେ ହେଲେ ପାଣି ଦିଆଯାଇ ନ ଥିବା ସମ୍ପୃକ୍ତ ଗ୍ରାମବାସୀଙ୍କ ପକ୍ଷରୁ ଅଭିଯୋଗ ହୋଇଛି। ଏ ସମ୍ପର୍କରେ ଉଭୟ କନିଷ୍ଠଯନ୍ତ୍ରୀ ରଞ୍ଜିତ ଭୂୟାଁ ଓ ସହକାରୀ ଯନ୍ତ୍ରୀ ପ୍ରିୟରଞ୍ଜନ ବେହେରାଙ୍କୁ ଯୋଗାଯୋଗ କରିବାରେ ଅଭିଯୋଗ ପରେ ପାଣି ଢାଳିବା ପାଇଁ ତାକୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି।
