ଯାଜପୁର ଅଫିସ/ଜେନାପୁର(ଡି.ଏନ.ଏ.),୭ା୧୧: ପ୍ରଦୂଷଣ ନିୟନ୍ତ୍ରଣ ପାଇଁ ନିୟୋଜିତ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ(ଏସପିସିବି) ଅଧିକାରୀମାନେ ଯାଜପୁର ଜିଲା ପାଇଁ ଆଖି ବୁଜିଦେଇଛନ୍ତି। ଜିଲାର କଳିଙ୍ଗନଗର ଶିଳ୍ପାଞ୍ଚଳ ଏବଂ ଧର୍ମଶାଳା ତହସିଲ ଅଞ୍ଚଳରେ ବିନା ପରିବେଶ ମଞ୍ଜୁରୀରେ ଜଙ୍ଗଲ ଜମିରେ ଏକାଧିକ ଛୋଟବଡ଼ ଶିଳ୍ପ ଗଢ଼ିଉଠିଥିବା ଦେଖିବାକୁ ମିଳିଛି। ଧର୍ମଶାଳା ବ୍ଲକ ସାହାଣିଡିହ ପଞ୍ଚାୟତ ଅନ୍ତର୍ଗତ ଲୁଣିବର ଗ୍ରାମ ନିକଟରେ ଥିବା କଳିଙ୍ଗ କମ୍ବାଇନ୍ସ ପ୍ରାଇଭେଟ ଲିଃ ପିଚୁ ପ୍ଲାଣ୍ଟ ପରେ ଏବେ ଅଞ୍ଜିରା ପଞ୍ଚାୟତ ଅଧୀନ ମାଣ୍ଡିଆଗଡାଠାରେ ବ୍ରେଚର୍ସ ଟେକ୍ନୋ ଇଣ୍ଡିଆ ନାମକ ଏକ ଲୁହା ତରଳା କାରଖାନା ବିନା ଅନୁମତିରେ ଜଙ୍ଗଲ ଜମିରେ ଚାଲିଛି। ଏହି କାରବାରରେ ସମ୍ପୃକ୍ତ କେତେଜଣ ପ୍ରଭାବଶାଳୀିଙ୍କ ଚାପରେ ଏସ୍ପିସିବି କର୍ତ୍ତୃପକ୍ଷ ହାତ ଟେକି ଦେଇଛନ୍ତି ବୋଲି ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି। ଏହି କାରଣରୁ ମୁରାରିପୁର, ବାଲିସାହି, ଭେଜିଗୋଠ ପ୍ରଭୃତି ଗ୍ରାମବାସୀ ବାୟୁ ପ୍ରଦୂଷଣରେ ରୁନ୍ଧି ହେଉଥିବା ଅଭିଯୋଗ କରିଛନ୍ତି।
ଉତ୍କଟ ପ୍ରଦୂଷଣରୁ ମୁକ୍ତ ରଖିବାକୁ ପ୍ରତ୍ୟେକ ଶିଳ୍ପାଞ୍ଚଳରେ ଏସ୍୍ପିସିବିର ଆଞ୍ଚଳିକ କାର୍ଯ୍ୟାଳୟଗୁଡ଼ିକରେ ବୈଜ୍ଞାନିକମାନ କାମ କରୁଛନ୍ତି। ଏମାନଙ୍କ ଦରମା ବାବଦକୁ ସରକାର ମାସିକ ଲକ୍ଷାଧିକ ଟଙ୍କା ବ୍ୟୟ କରୁଛନ୍ତି। ହେଲେ ଯାଜପୁର ଜିଲା କଳିଙ୍ଗନଗର ଶିଳ୍ପାଞ୍ଚଳରେ ରହିଥିବା ଏସ୍ପିସିବିର ଆଞ୍ଚଳିକ କାର୍ଯ୍ୟାଳୟ ତା’ର ଦାୟିତ୍ୱକୁ ଭୁଲିଯାଇଛି। ବାୟୁ ଓ ଜଳ ପ୍ରଦୂଷଣ ସୃଷ୍ଟି କରୁଥିବା ବିଭିନ୍ନ କାରଖାନା ମାଲିକମାନଙ୍କଠାରୁ ମୋଟା ଅଙ୍କର ହାତଗୁଞ୍ଜା ନେଇ ପ୍ରଭାବିତ ଲୋକଙ୍କ ଜୀବନକୁ ବିପଦରେ ପକାଯାଇଛି। ଏହିକ୍ରମରେ ଅଞ୍ଜିରା ମୌଜାର ଶାବକ ଖାତା ୪୧୬ କିସମ ଜଙ୍ଗଲ ଜମିରେ ପ୍ରତିଷ୍ଠିତ ବ୍ରେଚର୍ସ ଟେକ୍ନୋ ଇଣ୍ଡିଆ ସମସ୍ତ ପରିବେଶ ଆଇନ କାନୁନକୁ ଭୁଲିଯାଇଛି। ଏଥିରେ ଏସ୍ପିସିବି କର୍ତ୍ତୃପକ୍ଷ ସହଯୋଗୀ ହୋଇଛନ୍ତି। ଏଠାରେ ବିନା ସୁରକ୍ଷା ଉପକରଣରେ ଅତ୍ୟନ୍ତ ବିପଦ ପୂର୍ଣ୍ଣ ଭାବେ ଲୁହା ତରଳା ଯାଉଛି। କବାଡ଼ିଆଙ୍କଠାରୁ କମ୍ ଦାମରେ ଲୁହା ସାମଗ୍ରୀ ଅଣାଯାଇ ଏଠାରେ ତରଳା ଯାଇ କ୍ରଶର ପାର୍ଟ ଓ ଅନ୍ୟାନ୍ୟ ଯନ୍ତ୍ର ତିଆରି ହେଉଛି। ଏହି କାରଖାନାର ଚିମିନିରୁ ବିଷାକ୍ତ ଧୁଆଁ ଛଡ଼ାଯାଉଛି। ଏହାବାଦ୍ ରାସାୟନିକ ତରଳ ପଦାର୍ଥ ବ୍ୟବହାର ହେଉଥିବାରୁ ଆଖପାଖ ଲୋକ ଅଣନିଃଶ୍ୱାସୀ ହେଉଥିବା ଅଭିଯୋଗ ହେଉଛି। ଏସ୍ପିସିବିର ସର୍ତ୍ତ ଅନୁସାରେ କାରଖାନା ଓ ଏହାର ଆଖପାଖ ଅଞ୍ଚଳରେ ଆବଶ୍ୟକ ସବୁଜ ବଳୟ ନାହିଁ । ଫଳରେ କାରଖାନାରୁ ନିର୍ଗତ କଳା ପାଉଁଶର ଆସ୍ତରଣ ସମଗ୍ର ଅଞ୍ଚଳକୁ ଆଚ୍ଛାଦିତ କରୁଛି। ଏ ସଂକ୍ରାନ୍ତରେ ଏସ୍ପିସିବି କଳିଙ୍ଗନଗର ଆଞ୍ଚଳିକ ଅଧିକାରୀ ପ୍ରମୋଦ କୁମାର ବେହେରାଙ୍କୁ ପଚାରିବାରେ ସେ କହିଛନ୍ତି, ସେମିତି ନଁାରେ କୌଣସି ଲୁହା ତରଳା କାରଖାନା ଥିବା ତାଙ୍କର ମନେ ନାହିଁ। କାଗଜପତ୍ର ଦେଖି ଯାହା କିଛି କହିହେବ।
