ବ୍ରହ୍ମପୁର ଅଫିସ,୩୧ା୧୦: ବ୍ରହ୍ମପୁର ସହରରେ ଦୀର୍ଘଦିନ ଧରି ଚାଲିଥିବା ଏକ ବଡ଼ ଧରଣର ଆଇପିଏଲ୍ ବେଟିଂ କାରବାର ପୋଲିସ ଠାବ କରିଛି। ପୋଲିସ ଏହି ର଼୍ୟାକେଟ୍ ଚଳାଉଥିବା ଦୁଇଜଣ ମୁଖ୍ୟଙ୍କୁ ଶୁକ୍ରବାର ଗିରଫ କରିବା ସହ ଅନ୍ଲାଇନ୍ କ୍ରିକେଟ ବେଟିଂର ପର୍ଦ୍ଦାଫାଶ କରିଛି। ଗିରଫ ଅଭିଯୁକ୍ତ ହେଲେ ଗୋଷାଣୀନୂଆଗଁା ଥାନା ଅନ୍ତର୍ଗତ ଗଣେଶନଗର ତୃତୀୟ ଲାଇନର ଆର୍. ଲାଲି ଆଚାରୀ (୫୦) ଓ ଗାନ୍ଧୀନଗର ସାଇ କମ୍ପ୍ଲେକ୍ସର କେ.ପ୍ରଶାନ୍ତ କୁମାର ସୁବୁଦ୍ଧି (୪୩)। ଏ ନେଇ ଦକ୍ଷିଣାଞ୍ଚଳ ରେଞ୍ଜ ଡିଆଇଜି ସତ୍ୟବ୍ରତ ଭୋଇ ଜିଲା ପୋଲିସ ମୁଖ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଏମାନଙ୍କ ନିକଟରୁ ୩୩ ଲକ୍ଷ ୬୧ ହଜାର ୨୦୦ ଟଙ୍କା, ୪ ମୋବାଇଲ୍ ଫୋନ୍ ଏବଂ ୩ ଏଟିଏମ୍ କାର୍ଡ ଜବତ ହୋଇଛି। ଏହି ର଼୍ୟାକେଟର ଆହୁରି କେତେଜଣ ସଦସ୍ୟ ଫେରାର ରହିଛନ୍ତି। ସେମାନଙ୍କୁ ଧରିବା ପାଇଁ ଉଦ୍ୟମ ଜାରି ରହିଥିବା ବ୍ରହ୍ମପୁର ଏସ୍ପି ପିନାକ ମିଶ୍ର ସୂଚନା ଦେଇଛନ୍ତି। ଆଇପିଏଲ୍ ହେବା ଦିନଠାରୁ ଅନ୍ଲାଇନ୍ ବେଟିଂ ଆରମ୍ଭ ହୋଇଯାଇଥିଲା। ବ୍ରହ୍ମପୁର ପୋଲିସ ଏହି ର଼୍ୟାକେଟ୍ ଉପରେ ପ୍ରଥମରୁ ହିଁ ନଜର ରଖିଥିଲା। ଗୋଷାଣୀନୂଆଗଁା ଥାନା ଅଞ୍ଚଳର ଏକ ନିର୍ଦ୍ଦିଷ୍ଟ ସ୍ଥାନରୁ ଏହି କାରବାର ଚାଲିଥିବା ନେଇ ପୋଲିସକୁ ସୂଚନା ମିଳିଥିଲା। କିନ୍ତୁ ଅନ୍ଲାଇନ୍ରେ ଏହି କାରବାର ହେଉଥିବାରୁ ପୋଲିସକୁ ତଦନ୍ତରେ ସମୟ ଲାଗିଥିଲା। ବ୍ରହ୍ମପୁରରୁ ଲାଲି ଓ ପ୍ରଶାନ୍ତ ବେଟିଂ କାରବାର ଅପରେଟ୍ କରି ଜିଲା ସହିତ ବିଭିନ୍ନ ଅଞ୍ଚଳରେ ତାଙ୍କର ଏଜେଣ୍ଟ ରଖିଥିଲେ। ସେହି ଏଜେଣ୍ଟଙ୍କ ମାଧ୍ୟମରେ ଅନ୍ଲାଇନ୍ରେ ବିଭିନ୍ନ ପ୍ରକାର ୱେବ୍ସାଇଟ୍ରେ କ୍ରିକେଟ୍ ମ୍ୟାଚରେ ଟଙ୍କା ଲଗାଉଥିଲେ। ଏମିତିକି ହାର୍ ଜିତ ସହିତ ପ୍ରତ୍ୟେକ ବଲରେ ମଧ୍ୟ ଟଙ୍କା ଲାଗୁଥିଲା ବୋଲି ପୋଲିସ ତଦନ୍ତ ବେଳେ ଜାଣିବାକୁ ପାଇଛି। ଦୀର୍ଘଦିନ ହେଲା ଏହି ଦୁଇଜଣ ମୁଖିଆ ଏଭଳି କାରବାର ଜାରି ରଖିଥିଲେ। କୋଲକାତା, ମୁମ୍ବାଇ, ଦିଲ୍ଲୀ ଏବଂ ଦୁବାଇ ପର୍ଯ୍ୟନ୍ତ ଏମାନଙ୍କର ଲିଙ୍କ୍ ରହିଥିବା ନେଇ ଡିଆଇଜି ଭୋଇ ସୂଚନା ଦେଇଛନ୍ତି। ତେବେ ଏମାନଙ୍କ ଲିଙ୍କରେ ଆଉ କେଉଁ କେଉଁମାନେ ରହିଛନ୍ତି ସେମାନଙ୍କୁ ଖୋଜି ବାହାର କରିବା ପାଇଁ ଉଦ୍ୟମ ଜାରି ରହିଥିବା ପୋଲିସ କହିଛି। ଏ ସଂକ୍ରାନ୍ତରେ ଗୋଷାଣୀନୂଆଗଁା ଥାନାରେ ନମ୍ବର ୧୪୧/୨୦ରେ ଏକ ମାମଲା ରୁଜୁକରି ଉଭୟଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି। ବ୍ରହ୍ମପୁର ଏସ୍ପିଙ୍କ ନେତୃତ୍ୱରେ ଏଏସ୍ପି ପ୍ରଭାତ ରାଉତରାୟ, ଗୋଷାଣୀନୂଆଗଁା ଥାନା ଅଧିକାରୀ ସୁମିତ କୁମାର ସୋରେନ୍, ଟାଉନ୍ ଥାନା ଅଧିକାରୀ ସୁରେଶ କୁମାର ତ୍ରିପାଠୀ ରାକେଟକୁ ଠାବ କରିଥିଲେ।
