ଭୁବନେଶ୍ୱର, ୩୧।୧୦(ବ୍ୟୁରୋ): ରାଜ୍ୟ ସରକାର ଆସନ୍ତା ମାସରେ ମଧ୍ୟ ସବୁ ଶନିବାର ସରକାରୀ ଅଫିସ ବନ୍ଦ ରହିବ ବୋଲି ଘୋଷଣା କରିଛନ୍ତି। ଏନେଇ ଶୁକ୍ରବାର ସାଧାରଣ ପ୍ରଶାସନ ଏବଂ ସାଧାରଣ ଅଭିଯୋଗ ବିଭାଗ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି। ସେଥିରେ ଉଲ୍ଲେଖ କରାଯାଇଛି ଯେ, ଭୁବନେଶ୍ୱର ଏବଂ କଟକର ସମସ୍ତ ସରକାରୀ କାର୍ଯ୍ୟାଳୟ ସହିତ ଏହାର ଅଧସ୍ତନ ବିଭାଗ ୫୦ ପ୍ରତିଶତ ଅଧିକାରୀଙ୍କୁ ନେଇ ଚାଲିବ। ଏଥିରେ ଗ୍ରୁପ-ଏ ଅଧିକାରୀ ମଧ୍ୟ ସାମିଲ ରହିବେ। ଏହାଦ୍ୱାରା ଯେପରି ସରକାରଙ୍କ କାର୍ଯ୍ୟରେ କୌଣସି ପ୍ରକାର ବାଧାପ୍ରାପ୍ତ ନ ହେବ ସେନେଇ ବିଶ୍ୱାସ ଦେବାକୁ କୁହାଯାଇଛି। ଅନ୍ୟପଟେ ରାଜ୍ୟର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିବ। କଟକ ଓ ଭୁବନେଶ୍ୱରର ସବୁ ସରକାରୀ ବିଭାଗ କିମ୍ବା ଏହାର କାର୍ଯ୍ୟାଳୟ ମୁଖ୍ୟ କେଉଁ ୫୦ ପ୍ରତିଶତ କର୍ମଚାରୀ କାର୍ଯ୍ୟରେ ରହିବେ ସେନେଇ ସ୍ପଷ୍ଟ କରିବେ। ଗୁରୁତ୍ୱପୂର୍ଣ୍ଣ କାର୍ଯ୍ୟାଳୟ ଯଥା, ଏସ୍ଆରସି, ଓସ୍ଡମା, ପୋଲିସ, ଅଗ୍ନିଶମ, ସ୍ବାସ୍ଥ୍ୟ ଏବଂ ମ୍ୟୁନିସିପାଲର ସବୁ କର୍ମଚାରୀ କାର୍ଯ୍ୟରେ ରହିବେ। ସବୁ ଅଫିସର କର୍ମଚାରୀ କୋଭିଡ ନିୟମକୁ ଠିକ୍ରେ ପାଳନ କରି କାମ କରିବେ। ଯଦି କୌଣସି କର୍ମଚାରୀଙ୍କ କୋଭିଡ ପଜିଟିଭ ଚିହ୍ନଟ ହୁଅନ୍ତି ତେବେ ସରକାରୀ ପ୍ରୋଟକଲ ଅନୁଯାୟୀ କାମ କରାଯିବ। ରୋଷ୍ଟର ଡ୍ୟୁଟିରେ ନ ଥିବା କର୍ମଚାରୀ ଘରୁ ରହି କାମ କରିବେ। ଯେଉଁମାନେ ଘରୁ ରହି କାମ କରିବେ ସେମାନେ ସବୁ ସମୟରେ ଯେକୌଣସି ଅଫିସ କାମ କରିବାକୁ ପ୍ରସ୍ତୁତ ରହିବେ ଏବଂ ସଙ୍ଗେସଙ୍ଗେ ଟେଲିଫୋନ ଉଠାଇବା ଦରକାର ବୋଲି କୁହାଯାଇଛି।
