ମୁମ୍ବାଇ,୧୧।୪: ଆଇପିଏଲ୍ ୨୦୨୨ରେ ରାଜସ୍ଥାନ ରୟାଲ୍ସର ଦ୍ରୁତ ବୋଲର କୁଲଦୀପ ସେନ ତାଙ୍କର ପ୍ରଥମ ଆଇପିଏଲ ମ୍ୟାଚର ଶେଷ ଓଭରରେ ଚମତ୍କାର ବୋଲିଂ କରିଥିବାରୁ ତାଙ୍କୁ ପ୍ରଶଂସା କରାଯାଉଛି। ଲକ୍ଷ୍ନୌ ସୁପର ଜିଆଣ୍ଟ୍ସ ବିପକ୍ଷରେ ମାର୍କସ ଷ୍ଟୋଇନିସଙ୍କ ପରି ବ୍ୟାଟ୍ସମ୍ୟାନ୍ଙ୍କ ଆଗରେ ୧୫ ରନ ରକ୍ଷା କରିବାକୁ କୁଲଦୀପଙ୍କୁ ଦାୟିତ୍ୱ ଦିଆଯାଇଥିଲା, ଯାହା ସେ କରି ଦେଖାଇଥିଲେ। ୨୫ ବର୍ଷୀୟ କୂଲଦୀପ ୬ଟି ବଲରେ ମାତ୍ର ୧୧ ରନ ଦେଇଥିଲେ ଏବଂ ତାଙ୍କ ଦଳକୁ ୩ ରନ୍ର ରୋମାଞ୍ଚକର ବିଜୟ ପ୍ରଦାନ କରିଥିଲେ।
କୁଲଦୀପ ସେନ ମଧ୍ୟପ୍ରଦେଶର ରେୱା ଜିଲାର ହରିହରପୁର ଗାଁରୁ ଆସିଛନ୍ତି। ତାଙ୍କ ପିତା ରାମପାଲ ସେନ ସହରର ସିର୍ମାଉର୍ ସ୍କୋୟାରରେ ଏକ ଛୋଟ ସେଲୁନ ଦୋକାନ କରିଛନ୍ତି। ରାମପାଲ ଏବଂ ଗୀତା ସେନଙ୍କର ୫ ସନ୍ତାନ ଅଛନ୍ତି। ତିନି ଭାଇଙ୍କ ମଧ୍ୟରେ କୁଲଦୀପ ଜ୍ୟେଷ୍ଠ।
ଡାହାଣହାତୀ ପେସର୍ କୁଲଦୀପ ଏକ ଦଶନ୍ଧି ପୂର୍ବରୁ ବିନ୍ଦୁ କ୍ରିକେଟ ଏକାଡେମୀ (ଭିସିଏ) କ୍ଲବ ସହିତ ନିଜର କ୍ରିକେଟ କ୍ୟାରିଅର୍ ଆରମ୍ଭ କରିଥିଲେ। ଏହି ଏକାଡେମୀ କୁଲଦୀପଙ୍କ ଫି’ ଛାଡ କରିଥିଲା। ୨୦୧୮ରେ କୁଲଦୀପ ମଧ୍ୟପ୍ରଦେଶ ପାଇଁ ନିଜର ରଣଜୀ ଟ୍ରଫି ଡେବ୍ୟୁ କରିଥିଲେ। ସେ ପଞ୍ଜାବ ବିପକ୍ଷ ଇନିଂସରେ ୫ ଉଇକେଟ ନେଇଥିଲେ। କୁଲଦୀପ ମୋଟ ୧୫ ଉଇକେଟ ନେଇ ଡେବ୍ୟୁ ସିଜନ ଶେଷ କରିଥିଲେ। କୁଲଦୀପ କେବଳ ୧୩୫ରୁ ୧୪୦ କିଲୋମିଟର ବେଗରେ ବୋଲିଂ ନୁହେଁ, ସେ ମଧ୍ୟ ଭଲ ବ୍ୟାଟିଂ କରିପାରିବାର କ୍ଷମତା ରଖିଛନ୍ତି।
