ଦୁବାଇ,୨୫।୮: ଆଇପିଏଲ ୨୦୨୧ର ଦ୍ୱିତୀୟ ପର୍ଯ୍ୟାୟ ପାଇଁ ୟୁଏଇରେ ପହଞ୍ଚିଛି ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱରେ ଚେନ୍ନାଇ ସୁପର କିଙ୍ଗ୍ସ । ଦଳ ମଧ୍ୟ ସେଠାରେ ଅଭ୍ୟାସ ଆରମ୍ଭ କରିଛି। ନେଟ ଅଧିବେଶନରେ କ୍ୟାପଟେନ ଧୋନୀ ମଧ୍ୟ ବହୁତ ଝାଳ ବୁହାଉଛନ୍ତି। ଟୁର୍ନାମେଣ୍ଟ ଆରମ୍ଭ ପୂର୍ବରୁ ସେ ପୂରା ଲୟରେ ଆସିବାକୁ ଚାହୁଁଛନ୍ତି। ସେଥିପାଇଁ ସେ ବେଟ୍ସରେ ଲମ୍ବା ଛକା ମାର୍ୁଛନ୍ତି। ଏହାର ଏକ ଭିଡିଓ ସିଏସ୍କେ ଟୁଇଟର୍ ଆକାଉଣ୍ଟରୁ ଶେୟାର କରାଯାଇଛି। ଏଥିରେ ଧୋନୀ ଗୋଟିଏ ପରେ ଗୋଟିଏ ଛକା ମାରିଛନ୍ତି ଏବଂ ପ୍ରତ୍ୟେକ ଥର ବଲ ପଡ଼ିଆ ବାହାରେ ପଡୁଥିବାର ଦେଖାଯାଉଛି। ଏହି ଭିଡିଓରେ ଧୋନୀଙ୍କ ଦ୍ରୁତ ବ୍ୟାଟିଂ ଦେଖିବା ଅପେକ୍ଷା ଅଧିକ କୌତୁହଳପୂର୍ଣ୍ଣ ଥିଲା ଯେ ଛକା ବର୍ଷା ପରେ ସେ ସାଥୀ ଖେଳାଳିଙ୍କ ସହ ବଲ ଖୋଜିବା ଆରମ୍ଭ କରିଥିଲେ। ସେ ବୁଦା ଭିତରକୁ ଯାଇ ବଲ ଖୋଜିଥିଲେ।
ଗତ ଆଇପିଏଲରେ ଚେନ୍ନାଇ ସୁପର କିଙ୍ଗ୍ସର ପ୍ରଦର୍ଶନ ଖରାପ ଥିଲା। ଲିଗ ଇତିହାସରେ ପ୍ରଥମ ଥର ପାଇଁ ପ୍ଲେ ଅଫ ଯୋଗ୍ୟତା ଅର୍ଜନ କରିବାକୁ ଦଳ ବଞ୍ଚିତ ହୋଇଥିଲା। ଧୋନିଙ୍କ ବ୍ୟାଟ ମଧ୍ୟ ଚୁପ ରହିଥିଲା। ସେ ୧୪ ଟି ମ୍ୟାଚରେ ୨୦୦ ରନ ସ୍କୋର କରିବାରେ ସକ୍ଷମ ହୋଇଥିଲେ। ସେ ମଧ୍ୟ ଅର୍ଦ୍ଧଶତକ ହାସଲ କରିପାରି ନଥିଲେ। ତାଙ୍କ ଦଳ ୧୪ଟି ମଧ୍ୟରୁ ମାତ୍ର ୬ଟି ମ୍ୟାଚ ଜିତିଥିଲା । ତଥାପି, ସେହି ବିଫଳତାକୁ ଭୁଲି ଦଳ ଆଇପିଏଲ୍ ୨୦୨୧ରେ ଏକ ଭଲ ଆରମ୍ଭ କରିଥିଲା।
କରୋନା ଭାଇରସ କାରଣରୁ ଲିଗ ସ୍ଥଗିତ ରଖିବା ପୂର୍ବରୁ ସିଏସ୍କେ ୭ଟି ମ୍ୟାଚ ମଧ୍ୟରୁ ୫ ଟି ଜିତିଛି ଏବଂ ପଏଣ୍ଟ ଟେବୁଲରେ ଦଳ ଦ୍ୱିତୀୟ ସ୍ଥାନରେ ରହିଛି। ତେବେ ଧୋନୀଙ୍କ ବ୍ୟାଟରୁ ରନ ଆସି ନ ଥିଲା। ସେ ୭ଟି ମ୍ୟାଚରେ ମାତ୍ର ୩୭ ରନ ସଂଗ୍ରହ କରିଥିଲେ। ଏଭଳି ପରିସ୍ଥିତିରେ ସେ ଲିଗ ଦ୍ୱିତୀୟ ପର୍ଯ୍ୟାୟରେ ଏହାର କ୍ଷତିପୂରଣ ଦେବାକୁ ଚାହୁଁଛନ୍ତି। ଆଇପିଏଲର ଦ୍ୱିତୀୟ ପର୍ଯ୍ୟାୟ ୟୁଏଇରେ ୧୯ ସେପ୍ଟେମ୍ବରରୁ ଆରମ୍ଭ ହେବ। ପ୍ରଥମ ମ୍ୟାଚ୍ରେ ଚେନ୍ନାଇ ସୁପର କିଙ୍ଗ୍ସ ଡିଫେଣ୍ଡିଂ ଚାମ୍ପିଅନ ମୁମ୍ବାଇ ଇଣ୍ଡିଆନ୍ସକୁ ଭେଟିବ। ଏହି ମ୍ୟାଚ ଦୁବାଇରେ ଖେଳାଯିବ।
