ମୁମ୍ବାଇ,୨୮।୪: ଆଇପିଏଲର ୨୨ ତମ ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଏକ ରୋମାଞ୍ଚକର ବିଜୟ ହାସଲ କରିଛି। ଏହି ବିଜୟ ସହିତ ଆରସିବି ଦଳ ପଏଣ୍ଟ ଟେବୁଲର ଶୀର୍ଷରେ ପହଞ୍ଚିଛି। ଏହି ମ୍ୟାଚ୍ର ନାୟକ ଥିଳେ ବିସ୍ଫୋରକ ବ୍ୟାଟ୍ସମ୍ୟାନ ଏବି ଡି ଭିଲିୟର୍ସ। ତାଙ୍କ ଇନିଂଶ ଯୋଗୁ ଆରସିବି ଦିଲ୍ଲୀ ସମ୍ମୁଖରେ ଏକ ଚ୍ୟାଲେଞ୍ଜିଂର ଲକ୍ଷ୍ୟ ରଖିଥିଲା। ପ୍ରଥମେ ବ୍ୟାଟିଂ କରି ଆରସିବି ଧାର୍ଯ୍ୟ ଓଭରରେ ୫ ଉଇକେଟ ହରାଇ ୧୭୧ ରନ ସ୍କୋର କରିଥିଲା। ଏହାର ଜବାବରେ ଦିଲ୍ଲୀ ନିର୍ଦ୍ଧାରିତ ଓଭରରେ ୪ ଉଇକେଟ ହରାଇ ମାତ୍ର ୧୭୦ ରନ ସ୍କୋର କରିଥିଲା। ଡି ଭିଲିୟର୍ସ ୪୨ ବଲରୁ ଅପରାଜିତ ୭୫ ରନ କରିଥିଲେ। ଯେଉଁଥିରେ ସେ ୩ ଚୌକା ଓ ୬ ଛକା ମାରିଥିଲେ। ଏହି ଇନିଂସ ପାଇଁ ତାଙ୍କୁ ମ୍ୟାନ ଅଫ ଦି ମ୍ୟାଚ ପୁରସ୍କାର ଦିଆଯାଇଥିଲା। ଆଇପିଏଲ ଇତିହାସରେ ଏହା ହେଉଛି ଡି ଭିଲିୟର୍ସଙ୍କ ୨୫ ତମ ମ୍ୟାନ ଅଫ ଦି ମ୍ୟାଚ ପୁରସ୍କାର।
ଏହା ସହିତ ସେ ଆଉ ଏକ ବଡ଼ ରେକର୍ଡ ସ୍ଥାପନ କରିଛନ୍ତି। ୨୦୧୧ରୁ ଆରସିବି ଦଳର ଏକ ଗୁରୁତ୍ୱପୂର୍ଣ୍ଣ ଅଂଶ ରହିଥିବା ଡି ଭିଲିୟର୍ସ ଆଇପିଏଲରେ ୫୦୦୦ ରନ ପୂରଣ କରିବାରେ ଦ୍ୱିତୀୟ ବିଦେଶୀ ବ୍ୟାଟ୍ସମ୍ୟାନ ହୋଇଛନ୍ତି। ସେ ଏହି ଲିଗରେ ୫ ହଜାର ୫୩ ରନ କରିଛନ୍ତି। ଡି ଭିଲିୟର୍ସ ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଆଇପିଏଲ ଡେବ୍ୟୁ କରିଥିଲେ ଏବଂ ଏହି ଫ୍ରାଞ୍ଚାଇଜ ସହିତ ପ୍ରଥମ ଖେଳିଥିଲେ। ସେ ଦିଲ୍ଲୀ ପାଇଁ ୨୮ଟି ମ୍ୟାଚରେ ୬୧୭ ରନ ସଂଗ୍ରହ କରିଥିଲେ। ଏଥିସହିତ ସେ ଆରସିବି ପାଇଁ ୪ ହଜାର ୩୮୨ ରନ ସ୍କୋର କରିଛନ୍ତି।
ଡି ଭିଲିୟର୍ସଙ୍କ ବ୍ୟତୀତ ଡେଭିଡ ୱାର୍ଣ୍ଣର ହେଉଛନ୍ତି ପ୍ରଥମ ବିଦେଶୀ ବ୍ୟାଟ୍ସମ୍ୟାନ ଯିଏକି ଆଇପିଏଲରେ ୫୦୦୦ ରନ ପୂରଣ କରିଛନ୍ତି। ସନରାଇଜର୍ସ ହାଇଦ୍ରାବାଦର ଅଧିନାୟକ ୱାର୍ଣ୍ଣର ୫ ହଜାର ୩୯୦ ରନ କରିଛନ୍ତି। ତେବେ ବିରାଟ କୋହଲିଙ୍କ ନାମରେ ଆଇପିଏଲରେ ସର୍ବାଧିକ ରନ ସ୍କୋର କରିବାର ରେକର୍ଡ ରହିଛି। ସେ ହେଉଛନ୍ତି ଏକମାତ୍ର ବ୍ୟାଟ୍ସମ୍ୟାନ ଯିଏ ଏହି ଲିଗରେ ୬ ହଜାରରୁ ଅଧିକ ରନ ସ୍କୋର କରିଛନ୍ତି।
