ଚେନ୍ନାଇ,୨୧।୪ (ପି.ଟି.): କ୍ରମାଗତ ୩ଟି ମ୍ୟାଚ୍ରେ ପରାଜୟ ବରଣ କରିବା ପରେ ସନରାଇଜର୍ସ ହାଇଦ୍ରାବାଦ ଏବେ ପ୍ରତ୍ୟାବର୍ତ୍ତନ କରିବା ଲକ୍ଷ୍ୟରେ ରହିଛି। ବୁଧବାର ଖେଳାଯିବାକୁ ଥିବା ପ୍ରଥମ ମ୍ୟାଚ୍ରେ ଡେଭିଡ୍ ଓ୍ବାର୍ନରଙ୍କ ହାଇଦ୍ରାବାଦ ଓ ଲୋକେଶ ରାହୁଲଙ୍କ ନେତୃତ୍ୱାଧୀନ ପଞ୍ଜାବ କିଙ୍ଗ୍ସ ପରସ୍ପରକୁ ଭେଟିବେ। ଏଥର ହାଇଦ୍ରାବାଦର ଆରମ୍ଭ ନିହାତି ନୈରାଶ୍ୟଜନକ ରହିଛି। ହ୍ୟାଟ୍ରିକ ପରାଜୟ ହାଇଦ୍ରାବାଦ ଟିମ୍ ମ୍ୟାନେଜମେଣ୍ଟ ପାଇଁ ଚିନ୍ତା ସୃଷ୍ଟି କରିଛି। ପ୍ରଥମ ମ୍ୟାଚ୍ରେ ହାଇଦ୍ରାବାଦ କୋଲକାତା ନାଇଟ ରାଇଡର୍ସଠାରୁ ୧୦, ଦ୍ୱିତୀୟ ମ୍ୟାଚ୍ରେ ବାଙ୍ଗାଲୋରଠାରୁ ୬ ଓ ତୃତୀୟ ମୁକାବିଲାରେ ମୁମ୍ବାଇ ଇଣ୍ଡିଆନ୍ସଠାରୁ ୧୩ ରନରେ ପରାସ୍ତ ହୋଇଛି। ୩ଟି ମ୍ୟାଚ୍ରେ ରନ୍ ଚେଜ୍ କରିବାରେ ହାଇଦ୍ରାବାଦ ବିଫଳ ହୋଇଛି।
ଅପରପକ୍ଷରେ ପଞ୍ଜାବ ଟୁର୍ନାମେଣ୍ଟରେ ଏପର୍ଯ୍ୟନ୍ତ ୩ଟି ମ୍ୟାଚ୍ ଖେଳି କେବଳ ଗୋଟିଏ ବିଜୟ ହାସଲ କରି ପଏଣ୍ଟ ତାଲିକାର ସପ୍ତମ ସ୍ଥାନରେ ରହିଛି। ଅନ୍ୟପଟେ ହାଇଦ୍ରାବାଦ ଖାତା ଖୋଲି ନ ପାରି ଅନ୍ତିମ ଅର୍ଥାତ୍ ଅଷ୍ଟମ ସ୍ଥାନରେ ରହିଛି। ପଞ୍ଜାବ ପ୍ରଥମ ମ୍ୟାଚ୍ରେ ରାଜସ୍ଥାନ ରୟାଲ୍ସକୁ ୪ ରନରେ ପରାସ୍ତ କରିଥିଲା। ତେବେ ଦ୍ୱିତୀୟ ମ୍ୟାଚ୍ରେ ଚେନ୍ନାଇ ୨୬ଟି ବଲ ବାକି ରଖି ୬ ଉଇକେଟରେ ପଞ୍ଜାବକୁ ହରାଇଥିଲା। ସେହିପରି ତୃତୀୟ ମ୍ୟାଚରେ ଦିଲ୍ଲୀ କ୍ୟାପିଟାଲ୍ସଠାରୁ ୬ ଉଇକେଟରେ ପରାସ୍ତ ହୋଇଥିଲା। ହାଇଦ୍ରାବାଦ ଦଳରେ ସେତେଟା ଗଭୀରତା ନାହିଁ। ଦଳରେ ଭାରତୀୟ ଖେଳାଳିଙ୍କ ବେଞ୍ଚ୍ ଷ୍ଟ୍ରେନ୍ଥ ସେତେଟା ଦୃଢ ମଧ୍ୟ ନାହିଁ। ଏପରିସ୍ଥଳେ ଅଧିନାୟକ ଓ୍ବାର୍ନରଙ୍କ ଗୁରୁତ୍ୱ ଆହୁରି ବଢିଯାଇଛି। ଆଗରେ ରହି ନେତୃତ୍ୱ ନେବା ସହ ଦୃଷ୍ଟାନ୍ତମୂଳକ ପ୍ରଦର୍ଶନ କରି ସାଥୀ ଖେଳାଳିଙ୍କୁ ସେ ଭଲ ଖେଳିବାକୁ ପ୍ରେରଣା ଦେବେ ବୋଲି ଆଶା କରାଯାଉଛି। ୩ଟି ମ୍ୟାଚ୍ ଖେଳି ଓ୍ବାର୍ନର ମାତ୍ର ୯୩ ରନ ସଂଗ୍ରହ କରିଛନ୍ତି। ବାଙ୍ଗାଲୋର ବିପକ୍ଷରେ ସେ ସର୍ବାଧିକ ୫୪ ରନ ସଂଗ୍ରହ କରିଛନ୍ତି। ତେଣୁ ଓ୍ବାର୍ନରଙ୍କୁ ପଞ୍ଜାବ ବିପକ୍ଷରେ ଏକ ବଡ଼ ଇନିଂସ ଖେଳିବାର ଆବଶ୍ୟକତା ରହିଛି। କେବଳ ସେତିକୁ ନୁହେଁ ଅନ୍ତିମ ଏକାଦଶ ଚୟନ କରିବା ପୂର୍ବରୁ ଓ୍ବାର୍ନର ଭଲ ଭାବେ ଆଗପଛ ଚିନ୍ତା କରିବାର ଆବଶ୍ୟକତା ରହିଛି। ବିଦେଶୀ ଖେଳାଳିଭାବେ ଓ୍ବାର୍ନର ଓ ସ୍ପିନର ରସିଦ ଖାଁ ଖେଳିବା ନିଶ୍ଚିତ। ପୁଣି ନିର୍ଭରଯୋଗ୍ୟ କେନ୍ ଓ୍ବିଲିୟମସନଙ୍କ ଅନୁପସ୍ଥିତି ଦଳ ପାଇଁ ବେଶ୍ ମହଙ୍ଗା ସାବ୍ୟସ୍ତ ହୋଇଛି। ଦଳର ମିଡଲ୍ ଅର୍ଡର ନିହାତି ଦୁର୍ବଳ ମନେହେଉଛି। ଫଳରେ ଦଳ କ୍ରମାଗତ ଭାବେ ୩ଟି ଚେଜ୍ରେ ବିଫଳ ହୋଇଛି। ରିଦ୍ଧିମାନ ଶାହା ଦୁର୍ବଳ ଫର୍ମ ଦେଇ ଗତିକରୁଛନ୍ତି। ଉଇକେଟକିପର ବ୍ୟାଟ୍ସମ୍ୟାନ ଜନି ବେୟାରଷ୍ଟୋ ଦଳ ପାଇଁ ଉପଯୋଗୀ ସାବ୍ୟସ୍ତ ହେବେ ବୋଲି ଆଶା କରାଯାଉଛି। ବ୍ୟାଟିଂରେ ଭାରତୀୟ ଖେଳାଳିଙ୍କ ବିଫଳତା ଓ୍ବାର୍ନରଙ୍କ ଚିନ୍ତା ବଢାଇଛି। ମନୀଷ ପାଣ୍ଡେ, ବିଜୟ ଶଙ୍କର, ଅଭିଷେକ ଶର୍ମା ଓ ଅବଦୁଲ ସମାଦ ଆଶାନୁରୂପ ପ୍ରଦର୍ଶନ କରିପାରି ନାହାନ୍ତି। ଅଭିଜ୍ଞ କେଦାର ଯାଦବ ଓ ପ୍ରିୟମ ଗର୍ଗଙ୍କୁ ଏ ପର୍ଯ୍ୟନ୍ତ ସୁଯୋଗ ମିଳିନାହିଁ। ଦ୍ରୁତ ବୋଲର ଭୁବନେଶ୍ୱର କୁମାର ଓ ଟି. ନଟରାଜନ ମଧ୍ୟ ଦୁର୍ବଳ ପ୍ରଦର୍ଶନ ଜାରି ରଖିଛନ୍ତି। ଗତ ମ୍ୟାଚ୍ରେ ନଟରାଜନଙ୍କ ବଦଳରେ ଖଲିଲ ଅହମ୍ମଦଙ୍କୁ ସୁଯୋଗ ମିଳିଥିଲା ଓ ସେ ଭଲ ପ୍ରଦର୍ଶନ କରିଥିଲେ ଓ ମୁମ୍ବାଇକୁ ରୋକିବାରେ ବିଫଳ ହୋଇଥିଲେ। ରସିଦ୍ ସ୍ବଳ୍ପ ରନ ବ୍ୟୟ କରିଥିଲେ ମଧ୍ୟ ପୁରୁଣା ପ୍ରଦର୍ଶନକୁ ଦୋହରାଇବାରେ ବିଫଳ ହୋଇଛନ୍ତି।
ଅପରପକ୍ଷରେ ପଞ୍ଜାବ ପ୍ରଥମ ମ୍ୟାଚ୍ରେ ବିଜୟୀ ହୋଇଥିଲେ ମଧ୍ୟ ପରବର୍ତ୍ତୀ ୨ଟି ମ୍ୟାଚ୍ରେ ପରାସ୍ତ ହୋଇଛି। ଚେନ୍ନାଇ ବିପକ୍ଷରେ ପଞ୍ଜାବ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। କିନ୍ତୁ ଦିଲ୍ଲୀ ବିପକ୍ଷରେ ରାହୁଲ ୬୧ ଓ ମୟଙ୍କ ଅଗ୍ରଓ୍ବାଲ ୬୯ ରନର ଅର୍ଦ୍ଧଶତକୀୟ ପାଳି ଖେଳି ୧୯୫ ରନର ବଡ଼ ସ୍କୋର ହାସଲ କରିଥିଲେ। ତେବେ ବୋଲରଙ୍କ ଦୁର୍ବଳ ପ୍ରଦର୍ଶନ ପାଇଁ ଦଳ ପରାଜୟ ବରଣ କରିଥିଲା। ମହମ୍ମଦ ସାମି ଭଲ ପ୍ରଦର୍ଶନ କରିଥିଲେ ମଧ୍ୟ ଦୁଇ ଅଷ୍ଟ୍ରେଲୀୟ ଦ୍ରୁତ ବୋଲର ଝେ ରିଚାର୍ଡସନ ଓ ରିଲେ ମେରେଡିଥ୍ ବେଶ୍ ମହଙ୍ଗା ସାବ୍ୟସ୍ତ ହୋଇଛନ୍ତି। ସବୁ ମ୍ୟାଚ୍ରେ ଏହି ଦୁଇ ବୋଲର ବହୁ ରନ ବ୍ୟୟ କରିଛନ୍ତି। ତେଣୁ କ୍ରିସ୍ ଜୋର୍ଡାନଙ୍କୁ ଦଳରେ ସାମିଲ କରିବାକୁ ରାହୁଲ ନିଷ୍ପତ୍ତି ନେବା ଉଚିତ ହେବ। ଯୁବ ଦ୍ରୁତ ବୋଲର ଅର୍ଶଦୀପ ସିଂ ପଞ୍ଜାବ ପାଇଁ ପ୍ରଭାବୀ ପ୍ରଦର୍ଶନ କରିଛନ୍ତି। ପଞ୍ଜାବ ଅପେକ୍ଷା ହାଇଦ୍ରାବାଦ ଅଧିକ ସମସ୍ୟାରେ ରହିଛି। ଏହି ମ୍ୟାଚ୍ ରୋମାଞ୍ଚକ ହେବ ବୋଲି ଆଶା କରାଯାଉଛି।
ହାଇଦ୍ରାବାଦ ଦଳ:
ଡେଭିଡ ଓ୍ବାର୍ନର (ଅଧିନାୟକ), କେନ୍ ଓ୍ବିଲିୟମସନ, ବିରାଟ ସିଂ, ମନୀଷ ପାଣ୍ଡେ, ପ୍ରିୟମ ଗର୍ଗ, ରିଦ୍ଧିମାନ ଶାହ, ଜନି ବେୟାରଷ୍ଟୋ, ଜାସନ ରୟ, ଶ୍ରୀବତ୍ସ ଗୋସ୍ବାମୀ, ବିଜୟ ଶଙ୍କର, ମହମ୍ମଦ ନବି, କେଦାର ଯାଦବ, ଜେ. ସୁଚିତ, ଜାସନ ହୋଲ୍ଡର, ଅଭିଷେକ ଶର୍ମା, ରସିଦ ଖାଁ, ଟି. ନଟରାଜନ, ସନ୍ଦୀପ ଶର୍ମା, ଅବଦୁଲ ସମଦ, ଖଲିଲ ଅହମ୍ମଦ, ସିଦ୍ଧାର୍ଥ କାଉଲ, ବାସିଲ ଥମ୍ପି, ଶାହାବାଜ ନଦିମ ଓ ମୁଜିବ- ଉର ରହମାନ।
ପଞ୍ଜାବ କିଙ୍ଗ୍ସ ଦଳ:
କେ.ଏଲ୍. ରାହୁଲ (ଅଧିନାୟକ/ଉଇକେଟକିପର), ମୟଙ୍କ ଅଗ୍ରଓ୍ବାଲ, କ୍ରିସ୍ ଗେଲ୍, ମନଦୀପ ସିଂ, ପ୍ରବ୍ସିିମରନ ସିଂ, ନିକୋଲାସ ପୁରାନ (ଉଇକେଟକିପର), ସର୍ଫରାଜ ଖାନ୍, ଦୀପକ ହୁଦା, ମୁରୁଗାନ ଅଶ୍ୱିନ, ରବି ବିଷ୍ଣୋଇ, ହରପ୍ରୀତ ବ୍ରାର୍, ମହମ୍ମଦ ସାମି, ଆକାଶଦୀପ ସିଂ, ଇଶାନ ପୋରେଲ, ଦର୍ଶନ ନାଲକାଣ୍ଡେ, କ୍ରିସ୍ ଜୋର୍ଡାନ, ଡାଓ୍ବିଡ ମାଲାନ, ଝେ ରିଚାର୍ଡସନ, ଶାହରୁଖ ଖାନ୍, ରିଲେ ମର୍ଡିଥ୍, ମୋଇସେସ୍ ହେନରିକ୍, ଜଲଜ ସାକ୍ସେନା, ଉତ୍କର୍ଷ ସିଂ, ଫାବିଏନ୍ ଆଲେନ୍ ଓ ସୌରଭ କୁମାର।
