କଟକ ଅଫିସ,୯।୮: କଟକ ଯୋବ୍ରା ମଲ୍ଲାସାହି ଅଞ୍ଚଳର ଦୁଇଭାଇ ଶ୍ରୀହର୍ଷ ଶୁକ୍ଲା ଓ ସିଦ୍ଧାର୍ଥ ଶୁକ୍ଲା। ଜନ୍ମରୁ ସେମାନେ କଥା କହିପାରନ୍ତିନି କି ଶୁଣିପାରନ୍ତି ନାହିଁ। ଠାର ମାଧ୍ୟମରେ ସମସ୍ତଙ୍କ ଭାବନା ବୁଝିପାରନ୍ତି। ଏବେ ଏହି ଦୁଇ ଦିବ୍ୟାଙ୍ଗ ଭାଇଙ୍କୁ ସ୍ବତନ୍ତ୍ର ପରିଚୟ ଦେଇଛି ଚିତ୍ରକଳା। ସେମାନେ ପଟ୍ଟଚିତ୍ର, ମର୍ଡନ୍ ଆର୍ଟ, କୋଲାର୍ଜ ଆର୍ଟରେ ନିଜର ନିଆରା ପ୍ରତିଭା ଦେଖାଇଛନ୍ତି। ଦେଶବିଦେଶରେ ଅନେକ ପ୍ରତିଯୋଗିତାରେ ଭାଗ ନେଇ ପୁରସ୍କୃତ ହେବା ସହ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି।
ଜନ୍ମ ହେବାର କିଛି ମାସ ପରେ ଶ୍ରୀହର୍ଷ ଓ ସିଦ୍ଧାର୍ଥ ଦିବ୍ୟାଙ୍ଗ ବୋଲି ମା’ବାପା ଜାଣିବା ପରେ ଅନେକ ସ୍ଥାନରେ ଡାକ୍ତରଙ୍କ ସହ ପରାମର୍ଶ କରିଥିଲେ। ହେଲେ କିଛି ସୁଫଳ ମିଳି ନ ଥିଲା। ୪ବର୍ଷ ବୟସରୁ ସେମାନଙ୍କର ଚିତ୍ରକଳା ପ୍ରତିଭା ବାରି ହୋଇପଡିଥିଲା। କାଗଜରେ ସୁନ୍ଦର ଚିତ୍ର ଆଙ୍କୁଥିବା ଦେଖି ମାଆ କଲ୍ୟାଣୀ ମହାପାତ୍ର ସେମାନଙ୍କୁ ଆଗକୁ ବଢିବା ପାଇଁ ଉତ୍ସାହିତ କରିଥିଲେ। ଏଥିପାଇଁ ଆବଶ୍ୟକ ଉପକରଣ ଯୋଗାଇ ଦେଇଥିଲେ। ପଞ୍ଚମ ଶ୍ରେଣୀରେ ପଢିବାବେଳେ ସେମାନେ ଗୁରୁ ଗଣେଶ୍ୱର ବାରିକଙ୍କଠାରୁ ଚିତ୍ର ଶିଖିବା ଆରମ୍ଭ କରିଥିଲେ। ଉଭୟଙ୍କ ଆକର୍ଷଣୀୟ ଚିତ୍ର ଦେଖି ସ୍ଥାନୀୟ ଲୋକଙ୍କ ପ୍ରଶଂସା ସେମାନଙ୍କୁ ଆହୁରି ପ୍ରେରଣା ଦେଇଥିଲା। ଏହାପରେ ଦୁଇଭାଇ ଅନେକ ଥର ଆଞ୍ଚଳିକ ଓ ରାଜ୍ୟସ୍ତରୀୟ ଚିତ୍ରକଳା ପ୍ରତିଯୋଗିତାରେ ଅଂଶଗ୍ରହଣ କରି ପୁରସ୍କୃତ ହୋଇଛନ୍ତି। ୧୯୯୨ ମସିହାରେ ଦିଲ୍ଲୀର ଭେରି ସ୍ପେଶାଲ ଆଟର୍ସ ଇଣ୍ଡିଆ ପକ୍ଷରୁ ଅନୁଷ୍ଠିତ ଚିତ୍ରକଳା ପ୍ରଦର୍ଶନୀରେ ଭାଗ ନେଇ ଅନେକ ପ୍ରଶଂସା ସାଉଁଣ୍ଟିଥିଲେ। ସେଠାରେ ଆମେରିକାର ଜଣେ ମହିଳା ଫଟୋଗ୍ରାଫର ସେମାନଙ୍କ ଚିତ୍ରକଳାରେ ପ୍ରଭାବିତ ହୋଇ ଆମେରିକାରେ ଅନୁଷ୍ଠିତ ଚିତ୍ରାଙ୍କନ ପ୍ରଦର୍ଶନୀରେ ଅଶଂଗ୍ରହଣ କରିବାକୁ କହିଥିଲେ। ଫଳରେ ଦୁଇଭାଇ ଆମେରିକାର ବିଭିନ୍ନ ଚିତ୍ରକଳା ପ୍ରଦର୍ଶନୀରେ ନିଜ ପ୍ରତିଭା ଦେଖାଇ ବହୁ ପୁରସ୍କାର ହାସଲ କରିଛନ୍ତି। ସେମାନଙ୍କ ଦ୍ୱାରା ପ୍ରସ୍ତୁତ କୋଲାର୍ଜ ଆର୍ଟ ବିଦେଶୀଙ୍କ ମନକୁ ବେଶ୍ ଆକୃଷ୍ଟ କରିଥିଲା। ଏଥିସହ ସେମାନେ ମୁମ୍ବାଇ, ରାଜସ୍ଥାନ, ଫ୍ରାନ୍ସ, ନେପାଳ ଭଳି ଅନେକ ସ୍ଥାନ ଭ୍ରମଣ କରି ସେଠାକର ଦୃଶ୍ୟକ ନିଜ କ୍ୟାମେରାରେ କଏଦ କରିଥାନ୍ତି। ପରେ ସେହି ଫଟୋକୁ ନେଇ ଚିତ୍ର ଆଙ୍କିଥାନ୍ତି। ଏପର୍ଯ୍ୟନ୍ତ ଶ୍ରୀହର୍ଷ ଓ ସିଦ୍ଧାର୍ଥ ଦେଶବିଦେଶରେ ଆୟୋଜିତ ବିଭିନ୍ନ ପ୍ରତିଯୋଗିତାରେ ଭାଗ ନେଇ ୭୦ରୁ ଊର୍ଦ୍ଧ୍ୱ ଥର ପୁରସ୍କୃତ ହୋଇଛନ୍ତି। ଶ୍ରୀହର୍ଷ ଏବେ କଟକ ରେଲୱେ ସେଟଲମେଣ୍ଟ ହାଇସ୍କୁଲ ଓ ସିଦ୍ଧାର୍ଥ ଯୋବ୍ରା ମ୍ୟୁନିସିପାଲ ହାଇସ୍କୁଲରେ ଆର୍ଟ ଟିଚର ଭାବେ କାର୍ଯ୍ୟ କରୁଛନ୍ତି।
ଶ୍ରୀହର୍ଷ ଓ ସିଦ୍ଧାର୍ଥଙ୍କ କହିବା ଅନୁଯାୟୀ, ଦେଶବିଦେଶରେ ସେମାନଙ୍କ ଚିତ୍ରକଳାର ଚାହିଦା ଅଧିକ ରହିଛି। ସେମାନେ ପ୍ରସ୍ତୁତ କରିଥିବା ଚିତ୍ରଗୁଡିକ ଆମେରିକାରେ ଅଧିକ ମାତ୍ରାରେ ବିକ୍ରି ହୋଇଥାଏ ା ଦିବ୍ୟାଙ୍ଗ ହେବାର ଦୁଃଖକୁ ସେ କେବେ ଅନୁଭବ କରିନାହାନ୍ତି।
