ଭୁବନେଶ୍ୱର,୧୭।୫ ଦେଶର ବଡ଼ ବଡ଼ କମ୍ପାନୀ ଓ ହୋଟେଲରେ କାମ କରୁଥିବା ୪ ଓଡ଼ିଆ ଯୁବକ କୋଭିଡ ସଂକ୍ରମଣରେ ନିଜ ଜୀବନ ବଞ୍ଚାଇବା ସହ ଜୀବିକା ପାଇଁ ଚିନ୍ତିତ ଥାଇ ମଧ୍ୟ ଘରକୁ ଚାଲିଆସିଥିଲେ। ହେଲେ ସେମାନେ ଘରେ ବସି ରହିବା ବଦଳରେ ଅନ୍ଲାଇନ ଜରିଆରେ ଭୁବନେଶ୍ୱର ସହରରେ ଖାଦ୍ୟ ଯୋଗାଣ (ଫୁଡ୍ ଡେଲିଭରି) କାର୍ଯ୍ୟ ଆରମ୍ଭ କରିଥିଲେ। ସେହିଭଳି ଅନ୍ଲାଇନ ଖାଦ୍ୟଯୋଗାଣକାରୀ ସଂସ୍ଥା ‘ଜମାଟୋ ଓ ସ୍ବୀଗି’ ଭଳି କମ୍ପାନୀଠାରୁ ମଧ୍ୟ ସେମାନଙ୍କୁ ସ୍ବୀକୃତି ମିଳିଥିଲା। ଏପରିକି ଉକ୍ତ ବ୍ୟବସାୟ ଉତ୍ସାହୀ ଯୁବକଙ୍କୁ ଏକ ନୂଆ ପରିଚୟ ମଧ୍ୟ ଦେଇଛି। ପରେ ସେମାନେ ଏହାକୁ ଏକ ‘ଫୁଡ୍ ଷ୍ଟାର୍ଟଅପ’ ଭାବେ ହୋଟେଲ ‘ଅମ୍ବର’ ଜରିଆରେ କାରବାର କରିଥିଲେ ବୋଲି ଏହାର ପରିଚାଳନା ନିର୍ଦ୍ଦେଶକ ସମ୍ଭବ ଦାସ ମତବ୍ୟକ୍ତ କରିଛନ୍ତି। ସେହିପରି ସୋମବାର ସ୍ଥାନୀୟ ଏମ୍ସ ହସ୍ପିଟାଲ ସମ୍ମୁଖ ବିପୁଲ୍ ଗ୍ରୀନ୍ କ୍ୟାମ୍ପସରେ ଏହାର ଆଉ ଏକ ଶାଖାର ଶୁଭାରମ୍ଭ ହୋଇଯାଇଛି। ଏହି ପରିପ୍ରେକ୍ଷୀରେ କୌଣସି ନେତା କି ଅଭିନେତାଙ୍କ ବଦଳରେ ସ୍ଥାନୀୟ ଆଶା କିରଣ ଅନାଥାଶ୍ରମର ପିଲାମାନେ ମୁଖ୍ୟଅତିଥି ଭାବେ ଯୋଗ ଦେଇ ଏହାର ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ସର୍ବେଶ୍ୱର ଦାସ, ସଚ୍ଚିନ ମହାପାତ୍ରଙ୍କ ସମେତ ଦାସ ପରିବାରର ବହୁ ସଦସ୍ୟ ଉପସ୍ଥିତ ଥିଲେ।
