ପ୍ରତିବର୍ଷ ଜୁଲାଇ ୧୭ ଆନ୍ତର୍ଜାତିକ ନ୍ୟାୟ ଦିବସ ଭାବେ ପାଳନ କରାଯାଇଥାଏ। ବିଶ୍ୱରେ ଏବେ ଅପରାଧକୁ ପ୍ରତିହତ କରିବା ପାଇଁ ନ୍ୟାୟ ପ୍ରକ୍ରିୟାରେ ଉଲ୍ଲେଖନୀୟ ପରିବର୍ତ୍ତନ ଆସିଛି। ଏହି ସବୁ ପ୍ରକ୍ରିୟାଗୁଡିକୁ ଲୋକଲୋଚନକୁ ଆଣିବାକୁ ଏହି ଦିବସ ପ୍ରୟାସ କରିଥାଏ। ଏହାକୁ ମଧ୍ୟ ଇଣ୍ଟରନ୍ୟାଶନାଲ କ୍ରମିନାଲ ଜଷ୍ଟିସ ଡେ’ ଭାବେ ପାଳନ କରାଯାଏ। ୧୯୯୮ ଜୁଲାଇ ୧୭ରେ ଇଟାଲୀର ରୋମ୍ରେ ଇଣ୍ଟର୍ନ୍ୟାଶନାଲ କ୍ରିମିନାଲ କୋର୍ଟ ଷ୍ଟାଚ୍ୟୁ ବା ରୋମ ଷ୍ଟାଚ୍ୟୁ ବା ସମ୍ବିଧାନ ପ୍ରସ୍ତୁତ କରାଯାଇ ସେଥିରେ ଇଣ୍ଟରନ୍ୟାଶନାଲ କ୍ରିମିନାଲ କୋର୍ଟ (ଆଇସିସି) ର ଭିତ୍ତିଭୂମି ତଥା ପ୍ରଶାସନିକ ଢାଞ୍ଚା ସମ୍ପର୍କରେ ଉଲ୍ଲେଖ କରାଯାଇଥିଲା। ଏହି ଆଇନ ୨୦୦୨ ଜୁଲାଇ ୧ରେ କାର୍ଯ୍ୟକାରୀ ହୋଇଥିଲା ଓ ଏହା ବଳରେ ଇଣ୍ଟରନ୍ୟାଶନାଲ କ୍ରିମିନାଲ କୋର୍ଟ (ଆଇସିସି)ବା ଆନ୍ତର୍ଜାତିକ ଅପରାଧିକ ନ୍ୟାୟାଳୟ ତା କାର୍ଯ୍ୟ ଆରମ୍ଭ କରିଥିଲା। ୨୦୧୯ ନଭେମ୍ବର ସୁଦ୍ଧା ଏହାର ସଦସ୍ୟ ସଂଖ୍ୟା ୧୩୯ରେ ପହଞ୍ଚିଛି। ଏହାର ମୁଖ୍ୟାଳୟ ହଗ୍, ନେଦରଲ୍ୟାଣ୍ଡରେ ରହିଛି। ୨୦୧୦ ଜୁନ୍ ୧ରେ ଉଗାଣ୍ଡାର କମ୍ପାଲାରେ ରୋମ୍ ସମ୍ବିଧାନ ବା ଆଇନର ସମୀକ୍ଷା ସମ୍ମିଳନୀରେ ୧୭ ଜୁଲାଇକୁ ଆନ୍ତର୍ଜାତିକ ନ୍ୟାୟ ଦିବସ ଭାବେ ପାଳନ କରାଯିିବା ଲାଗି ନିଷ୍ପତ୍ତି ନିଆଯାଇଥିଲା। ସେବେଠାରୁ ଏହି ଦିବସ ପ୍ରତିବର୍ଷ ପାଳନ କରାଯାଇଆସୁଛି। ରୋମ ଷ୍ଟାଚ୍ୟୁକୁ ଏହି ଦିବସ ମନେପାକାଇଦିଏ। ଏହି ଦିବସ ଅପରାଧ ବିରୋଧରେ ଲଢେଇ ଜାରି ରଖିବା ଲାଗି ଲୋକମାନଙ୍କୁ ସଚେତନ କରେ। ଯୁଦ୍ଧପୀଡିତ, ମାନବିକତା ବିରୋଧରେ ସଂଘଠିତ ଅପରାଧ, ଅନ୍ୟ ଉପରେ ଆକ୍ରମଣ ଜନିତ ଅପରାଧ ତଥା ହତ୍ୟା ଶିକାର ହେଉଥିବା ଲୋକମାନଙ୍କୁୁ ନ୍ୟାୟ ଦେବା ଉପରେ ଏହି ଦିବସ ଗୁରୁତ୍ୱ ଦେଇ ଆସୁଛି।
ଆଇସିସି ଏବେ ୧୫୦ରୁ ଊର୍ଦ୍ଧ୍ୱ ଦେଶରେ ୨,୫୦୦୦ ସଂଗଠନ ଦ୍ୱାରା କାର୍ଯ୍ୟ କରି ପୀଡିତଙ୍କୁ ନ୍ୟାୟ ପ୍ରଦାନରେ ପ୍ରମୁଖ ଭୂମିକା ନିଭାଉଛି। ପ୍ରତିବର୍ଷ ଆନ୍ତର୍ଜାତିକ ନ୍ୟାୟ ଦିବସରେ ସାରା ବିଶ୍ୱରେ ଆଇସିସିକୁ ସମର୍ଥନ କରିବା ସହ ଆନ୍ତର୍ଜାତିକ ଅପରାଧିକ ନ୍ୟାୟକୁ ପ୍ରୋତ୍ସାହିତ କରିବା ପାଇଁ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ। ବିଶ୍ୱରେ ଏବେ ବିଭିନ୍ନ ପ୍ରକାର ଅପରାଧ ମୁଣ୍ଡ ଟେକିଲାଣି। ସାଇବର ଅପରାଧ ବି ଜଟିଳ ସମସ୍ୟା ସୃଷ୍ଟି କରୁଛି।
