ନୂଆଦିଲ୍ଲୀ,୮ ।୭: ସୁପ୍ରିମକୋର୍ଟ ଗୁରୁବାର ଏମିତି ୧୩ ଜଣ ଦୋଷୀଙ୍କୁ ଜାମିନ ପ୍ରଦାନ କରିଛନ୍ତି ଯେଉଁମାନେ ଅପରାଧ କରିବା ସମୟରେ ନାବାଳକ ବୋଲି ଘୋଷଣା ହୋଇସାରିଥିଲେ । ଗତ ସପ୍ତାହରେ ସୁପ୍ରିମକୋର୍ଟ ଏହି ମାମଲାରେ ଉତ୍ତର ପ୍ରଦେଶ ସରକାରଙ୍କୁ ନୋଟିସ ଜାରି କରିଥିଲେ । ଜଷ୍ଟିଶ ଇନ୍ଦିରା ବାନାର୍ଜୀଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠର ସମକକ୍ଷ ଉତ୍ତର ପ୍ରଦେଶ ସରକାରଙ୍କ ପକ୍ଷରୁ ଆଡିଶନାଲ ଆଡଭୋକେଟ ଜେନରାଲ ଗରିମା ପ୍ରସାଦ କହିଛନ୍ତି ଏହି ମାମଲାର ତଥ୍ୟକୁ ଯାଞ୍ଚ କରିବା ଦରକାର । ସେ କହିଛନ୍ତି ସମସ୍ତ ଦୋଷୀଙ୍କୁ ମଧ୍ୟବର୍ତ୍ତିକାଳୀନ ଜାମିନ ପ୍ରଦାନ କରାଯାଇପାରେ । ଆଉ ଏହାପରେ ଖଣ୍ଡପୀଠ ସମସ୍ତ ୧୩ ଦୋଷୀଙ୍କ ମଧ୍ୟବର୍ତ୍ତିକାଳୀନ ଜାମିନ ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି । ଏବେ ସୁପ୍ରିମକୋର୍ଟରେ ଉକ୍ତ ୧୩ ଜଣଙ୍କୁ ଶୀଘ୍ର ଜେଲରୁ ମୁକୁଳାଇବାକୁ ଦାବି କରାଯାଇଛି । କାରଣ ଜୁଭେନାଇଲ ଜଷ୍ଟିଶ ବୋର୍ଡ ଦ୍ୱାରା ଅପରାଧ ସମୟରେ ଏମାନଙ୍କୁ ନାବାଳକ ଘୋଷଣା କରାଯାଇଛି । ଏମାନେ ସମସ୍ତେ ଏବେ ଆଗ୍ରା ସେଣ୍ଟ୍ରାଲ ଜେଲରେ ବନ୍ଦୀ ରହିଛନ୍ତି ଓ ବଡ ବଡ ଅପରାଧିଙ୍କ ସହ ଏମାନଙ୍କୁ ରଖାଯାଇଛି ।
