ତିହିଡ଼ି,୧୫।୬ (କାଳନ୍ଦୀ ବେହେରା): ଭଦ୍ରକ ଜିଲା ଧାମନଗର ବ୍ଲକ ଅଧୀନସ୍ଥ ଧୂଷୁରୀ ହରିହଂସ କୀର୍ତ୍ତନ ମଣ୍ଡପ ପରିସରରେ ଆଜି ହଜାରରୁ ଅଧିକ ମହିଳା ଓ ପୁରୁଷ ଏକତ୍ରିତ ହୋଇ ଧୂଷୁରୀପଙ୍ଗଟା ମୁଖ୍ୟ ରାସ୍ତାରେ ସରକାରୀ ଦେଶୀ ଓ ବିଦେଶୀ ମଦ ଦୋକାନକୁ ପୁନର୍ବାର ସ୍ଥାପନ ନ କରିବା ଦାବିରେ ଏକ ବିଶାଳ ପ୍ରତିବାଦ ସଭା ଆୟୋଜନ କରିଥିଲେ।
ହରିହଂସ, ପଙ୍ଗଟା, ହସନାବାଦ, ବାଲିପାଟଣା, ମଠସାହି, ମମାଦୁଲା, ନୁଆସାହି, ପଣ୍ଡାସାହି, ତିନିଘରିଆ ସମେତ ଆଖପାଖ ଅଞ୍ଚଳର ଲୋକମାନେ ଏହି ଆନ୍ଦୋଳନରେ ସାମିଲ ହୋଇଥିଲେ।
ପ୍ରତିବାଦକାରୀମାନଙ୍କ ଅଭିଯୋଗ ଅନୁସାରେ, ମଦ ଦୋକାନ ଯୋଗୁ ଅଞ୍ଚଳରେ ପାରିବାରିକ ଅଶାନ୍ତି, ମହିଳା ର୍ନିଯାତନା, ଯୁବପିଢ଼ିର ଅବକ୍ଷୟ ଏବଂ ବିଭିନ୍ନ ସାମାଜିକ ସମସ୍ୟା ବୃଦ୍ଧି ପାଇଛି।
ବକ୍ତାମାନେ କହିଥିଲେ ଯେ, ଏହି ରାସ୍ତା ଦେଇ ପ୍ରତିଦିନ ହଜାର ହଜାର ଛାତ୍ରଛାତ୍ରୀ, ମହିଳା ଓ ସାଧାରଣ ଲୋକ ଯାତାୟାତ କରୁଥିବାବେଳେ ରାସ୍ତା କଡ଼ରେ ମଦ ଦୋକାନ ରହିବା ସୁରକ୍ଷା ଓ ସାମାଜିକ ପରିବେଶ ପାଇଁ ବିପଦ ସୃଷ୍ଟି କରୁଛି।
ସଭାରେ ସର୍ବସମ୍ମତିକ୍ରମେ ଦାବି କରାଯାଇଥିଲା ଯେ, ଜନସ୍ବାର୍ଥ, ମହିଳା ସୁରକ୍ଷା, ଯୁବପିଢ଼ିର ଭବିଷ୍ୟତ ଓ ସାମାଜିକ ଶାନ୍ତିକୁ ଦୃଷ୍ଟିରେ ରଖି ପ୍ରଶାସନ ଏବଂ ରାଜ୍ୟ ସରକାର ଓ ପ୍ରଶାସନ ଏହି ଅଞ୍ଚଳରେ ମଦ ଦୋକାନ ପୁନଃ ସ୍ଥାପନ ନିଷ୍ପତ୍ତିକୁ ତୁରନ୍ତ ବାତିଲ କରନ୍ତୁ। ଏହା ନହେଲେ ଆଗାମୀ ଦିନରେ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି।
Dharitri – Odisha’s No.1 Odia Daily
