ନାଉଗଁା,୧୦ା୯(ସ୍ବ.ପ୍ର.):ନାଉଗଁା ତହସିଲ ଓ ଥାନା ମଧ୍ୟରେ ଛକାପଞ୍ଝା ଚାଲିଛି। ଏହାର ଫାଇଦା ବାଲି ମାଫିଆ ଉଠାଉଛନ୍ତି। ଫଳରେ ରାଜ୍ୟ ସରକାର ଲକ୍ଷ ଲକ୍ଷ ଟଙ୍କାର ରାଜସ୍ବ ହରାଉଥିବା ନେଇ ସାଧାରଣରେ ଅଭିଯୋଗ ହୋଇଛି।
ନାଉଗାଁ ତହସିଲ ଅଧୀନ ଦେବୀ ନଦୀରେ ତହସିଲ ପକ୍ଷରୁ ୬ ବାଲି ସୈରାତକୁ ନିଲାମ ପ୍ରଦାନ କରାଯାଇଛି। ଉକ୍ତ ସୈରାତ ମଧ୍ୟରେ ଶିଖର, ବଛାଳୋ, ପାଳନ୍ଦି, ଅରଖକୁଦ, ଗଳଦାରୀ ଓ ଏରେଡା ଆଦି ଅନ୍ତର୍ଭୁକ୍ତ। ସୈରାତଗୁଡିକ ନିଲାମ ସରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ବାଲି ସୈରାତରୁ ବାଲି ଉତ୍ତୋଳନ ପାଇଁ ତହସିଲ ପକ୍ଷରୁ ମଞ୍ଜୁରି ଦିଆଯାଇନାହିଁ। ନିଲାମଧାରୀମାନେ କେବଳ ନିଲାମ ପାଇଥିବା ବେଳେ ଆବଶ୍ୟକୀୟ କାଗଜପତ୍ର ଦାଖଲ କରିନାହାନ୍ତି। ସେହିପରି ତହସିଲ ପକ୍ଷରୁ ମଧ୍ୟ କୌଣସି ବାଲି ସୈରାତର ସୀମା ନିର୍ଦ୍ଧାରଣ କରାଯାଇ ନାହିଁ। କିନ୍ତୁ ବାଲି ମାଫିଆ ମାନେ ଦିନ ରାତି ଟ୍ରାକ୍ଟର,ହାଇଓ୍ବା ମମରେ ଶହ ଶହ ଟ୍ରିପ ବାଲି ଲୁଟି ଚାଲିଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲେ ଚଢ଼ାଉ ବେଳେ ତହସିଲ ଓ ଥାନା ମଧ୍ୟରେ ସମନ୍ବୟ ରହୁନାହିଁ।
ତହସିଲ କାର୍ଯ୍ୟାଳୟରୁ ମିଳିଥିବା ସୂଚନାନୁସାରେ, ତହସିଲ ପ୍ରଶାସନ ପକ୍ଷରୁ ଚୋରା ବାଲି ଗାଡି ଧରିବାକୁ ଯିବା ସମୟରେ ବାଲି ମାଫିଆମାନେ ନାନା ପ୍ରକାର ଭୟଭୀତ କରାଉଛନ୍ତି। ଏପରିକି ତହସିଲ ପ୍ରଶାସନ ପକ୍ଷରୁ ଚଢ଼ାଉ ବେଳେ ବାଲି ଚୋରା ଚାଲାଣକାରୀମାନେ ଦ୍ରୁତ ଗତିରେ ଆଗରେ ଗାଡି ନେଇ ଚାଲିଯାଉଛନ୍ତି। ବହୁ ସମୟରେ ସେମାନେ ତହସିଲ ଗାଡିକୁ ଆଗକୁ ଯିବାକୁ ଦେଉନାହାନ୍ତି। ମାତ୍ର ଏହି ସମୟରେ ଥାନା ପକ୍ଷରୁ କୌଣସି ସହଯୋଗ ମିଳୁନାହିଁ। ଫଳରେ ବାଲି ମାଫିଆଙ୍କୁ ଧରି ହେଉନାହିଁ ବୋଲି ତହସିଲଦାର ଜେ.କଳ୍ପନା କହିଛନ୍ତି। ଥାନା ପକ୍ଷରୁ ସହଯୋଗ କରିବା ପାଇଁ ସେ (ଚିଠି ନଂ.୧୦୧, ୧୧୩୧, ୧୧୩୪)ରେ ନାଉଗଁା ଥାନାଧିକାରୀଙ୍କୁ ଲିଖିତ ଭାବେ ଜଣାଇଛନ୍ତି। ଏହାର ନକଲ ଜିଲା ଆରକ୍ଷୀ ଅଧୀକ୍ଷକ ଓ ଜିଲାପାଳଙ୍କୁ ଦେଇଥିବା କହିଛନ୍ତି। କିନ୍ତୁ ନାଉଗାଁ ଥାନା ଅଧିକାରୀ ଅଭୟ କୁମାର ବେହେରା ଏହି ଅଭିଯୋଗକୁ ଖଣ୍ଡନ କରିଛନ୍ତି। ତହସିଲ ପକ୍ଷରୁ ସେପରି କୌଣସି ଚିଠି ଆସି ନ ଥିବା ସେ କହିଛନ୍ତି। ବାଲି ଗାଡି ଧରିବା ତହସିଲଦାର ଓ ଅତିରିକ୍ତ ତହସିଲଦାରଙ୍କ ଦାୟିତ୍ୱ। ଉଭୟ ଗାଡି ଧରିବାକୁ ଯାଉ ନ ଥିବା ବେଳେ ଜଣେ କିରାଣୀଙ୍କୁ ଗାଡି ଧରା କାର୍ଯ୍ୟରେ ନିୟୋଜିତ କରାଯାଇଛି। ତହସିଲ କାର୍ଯ୍ୟାଳୟ ପକ୍ଷରୁ ଯେଉଁ ସମୟରେ ଡକାଯାଉଛି, ସେ ସମୟରେ ଆମର କୋଣସି କାର୍ଯ୍ୟ ଥିଲେ ଆସୁପାରୁନି। ତେବେ ତହସିଲ ପ୍ରଶାସନ ଗାଡି ଆଣି ଆମ ନିକଟରେ ପହଞ୍ଚାଇଲେ ଥାନା ପକ୍ଷରୁ ହେପାଜତରେ ରଖାଯାଇଥାଏ। ଥାନା ଓ ତହସିଲ ପ୍ରଶାସନ ପରସ୍ପର ମଧ୍ୟରେ ସମନ୍ବୟ ରକ୍ଷା କରି ବାଲିି ମାଫିଆମାନଙ୍କୁ ଧରିବା ପାଇଁ ସାଧାରଣରେ ଦାବି ହୋଇଛି।
