ମୁମ୍ବାଇ,୧୦।୩: ଭାରତୀୟ ନୌସେନାର ଶକ୍ତି ବୃଦ୍ଧି ପାଇଛି। ବୁଧବାର ନୌସେନାରେ ଆଧୁନିକ ଜ୍ଞାନକୌଶଳରେ ନିର୍ମିତ ସବ୍ମେରାଇନ୍ ଆଇଏନ୍ଏସ୍ କରଞ୍ଜକୁ ମୁମ୍ବାଇର ନାଭାଲ ଡକ୍ ୟାର୍ଡରେ ଏକ ଉତ୍ସବରେ ସାମିଲ୍ କରାଯାଇଛି। ଏହି ଅବସରରେ ଚିଫ୍ ଅଫ୍ ନାଭାଲ ଷ୍ଟାଫ୍ ଆଡମିରାଲ କରମବୀର ସିଂ ଏବଂ ଅବସରପ୍ରାପ୍ତ ଆଡମିରାଲ ଭି.ଏସ୍. ଶେଖାଓ୍ବତ ଉପସ୍ଥିତ ଥିଲେ। ଫ୍ରାନ୍ସର ସହାୟତାରେ ନିର୍ମିତ ହୋଇଥିବା ଏହି ସବ୍ମେରାଇନ୍ ସାଇଲେଣ୍ଟ୍ କିଲର ଭାବେ ପରିଚିତ। ଏହା ୪୫ରୁ ୫୦ ଦିନ ପର୍ଯ୍ୟନ୍ତ ପାଣି ତଳେ ରହି ପାରିବ। ଏଥିରେ ସ୍ଟିଲଥ୍ ଜ୍ଞାନକୌଶଳ ବ୍ୟବହାର ହୋଇଥିବାରୁ ଏହା ସହଜରେ ଶତ୍ରୁର ରାଡାରରେ ଧରାପଡ଼ିବ ନାହିଁ। କରଞ୍ଜ୍ ପାଣି ତଳେ ୩୫୦ ମିଟର ତଳେ କାର୍ଯ୍ୟ କରିବାକୁ ସକ୍ଷମ। ଏହାର ଲମ୍ବ ୨୨୧ ଫୁଟ ଥିବାବେଳେ ଉଚ୍ଚତା ୪୦ଫୁଟ ରହିଛି। ସବ୍ମେରାଇନ୍ର ଗଭୀରତା ୧୯ ଫୁଟ। ସେହିପରି ଏହାର ଓଜନ ୧୫୬୫ ଟନ୍। ଏହାର ଆଭ୍ୟନ୍ତରରେ ୧୧ କିଲୋମିଟର ଲମ୍ବର ପାଇପ୍ ଏବଂ ୬୦ କିଲୋମିଟର ଲମ୍ବର କେବୁଲ ଫିଟିଙ୍ଗ୍ କରାଯାଇଛି। ଏଥିରେ ୩୬୦ ବ୍ୟାଟେରୀ ସେଲ ରହିଛି। ପ୍ରତି ସେଲର ଓଜନ ପ୍ରାୟ ୭୫୦ କିଲୋଗ୍ରାମ୍। ସେହିପରି ଏଥିରେ ୧୨୫୦ କିଲୋଓ୍ବାଟର ଡିଜେଲ ଇଞ୍ଜିନ୍ ରହିଛି। ସବ୍ମେରାଇନ୍ର ଥରକେ ୧୨୦୦୦ କିଲୋମିଟର ଯାତ୍ରା କରିବାର କ୍ଷମତା ରହିଛି। ଭାରତୀୟ ନୌସେନାରେ କରଞ୍ଜ ସାମିଲ ହେବା ପରେ ଚାଇନା ଏବଂ ପାକିସ୍ତାନର ଚିନ୍ତା ବଢ଼ିବାରେ ଲାଗିଛି।
