କାନବେରା, ୨।୧୨(ପି.ଟି.)- ଉରୁସନ୍ଧିଆ ଆଘାତ ଜନିତ ସମସ୍ୟା ଯୋଗୁ ଡେଭିଡ ଓ୍ବାର୍ନର ଭାରତ ବିପକ୍ଷ ଅବଶିଷ୍ଟ ସୀମିତ ଓଭର କ୍ରିକେଟ ମ୍ୟାଚ ସହିତ ଅତିକମ୍ରେ ପ୍ରଥମ ଟେଷ୍ଟରେ ଖେଳି ପାରିବେନି। ସାମୟିକଭାବେ ଖାଲିପଡ଼ିଥିବା ଓପନିଂ ସ୍ଲଟ ଅନ୍ୟମାନଙ୍କୁ ପାଇଁ ସୁଯୋଗ ଆଣିବ ବୋଲି କୋଚ୍ ଜଷ୍ଟିନ ଲାଙ୍ଗର ପ୍ରକାଶ କରିଛନ୍ତି। ବିଶେଷ କରି ଭାରତ ବିପକ୍ଷ ଓ୍ବାର୍ମଅପ୍ ମ୍ୟାଚରେ ଭଲ ପ୍ରଦର୍ଶନକାରୀଙ୍କୁ ପ୍ରଥମ ଟେଷ୍ଟରେ ସୁଯୋଗ ମିଳିବ ବୋଲି ସେ ସୂଚନା ଦେଇଛନ୍ତି। ଭାରତ-ଅଷ୍ଟ୍ରେଲିଆ ଟେଷ୍ଟ ସିରିଜ ପାଇଁ ଓ୍ବାର୍ନରଙ୍କ ଓପନିଂ ପାର୍ଟନରଙ୍କୁ ନେଇ ଅନେକ ଆଲୋଚନା ହୋଇ ଯାଇଛି। ରନ ପାଇଁ ସଂଘର୍ଷ କରୁଥିବା ଜୋ ବନର୍ସ ସ୍ଥାନ ବଜାୟ ରଖିବା ଉପରେ କେତେକ ଗୁରୁତ୍ୱ ଦେଇଥିବାବେଳେ ଅନ୍ୟ କେତେଜଣ ଯୁବ ଖେଳାଳି ଓ୍ବିଲିୟମ ପୁକୋଭସ୍କିଙ୍କ ସପକ୍ଷରେ ଯୁକ୍ତି ବାଢ଼ିଥିଲେ। ମାତ୍ର ଏବେ ଓ୍ବାର୍ନର ଆହତ ହୋଇଥିବାରୁ ଦୃଶ୍ୟପଟ ବଦଳି ଯାଇଛି। ଉଭୟ ବନର୍ସ ଓ ପୁକୋଭସ୍କି ଅଷ୍ଟ୍ରେଲିଆ ପକ୍ଷରୁ ଇନିଂସ ଓପନ କରିବା ସମ୍ଭାବନା ବଢ଼ିଯାଇଛି। ଟେଷ୍ଟ ସିରିଜ ପୂର୍ବରୁ ଡିସେମ୍ବର ୬ରୁ ଭାରତ ‘ଏ’ ଓ ଅଷ୍ଟ୍ରେଲିଆ ‘ଏ’ ଏବଂ ୧୧ରୁ ଅଷ୍ଟ୍ରେଲିଆ ‘ଏ’ ଓ ଭାରତୀୟ ସିନିୟର ଦଳ ମଧ୍ୟରେ ଓ୍ବାର୍ମଅପ୍ ମ୍ୟାଚ ଆରମ୍ଭ ହେବ। ଡିସେମ୍ବର ୧୭ରୁ ଆଡିଲେଡ୍ଠାରେ ଭାରତ-ଅଷ୍ଟ୍ରେଲିଆ ଦିବାରାତ୍ର ଟେଷ୍ଟ ଆରମ୍ଭ ହେବ। ଯଦି ବନର୍ସଙ୍କ ଓପନିଂ ପାର୍ଟନର ପୁକୋଭସ୍କି ହୁଅନ୍ତି ତେବେ ଦିବାରାତ୍ର ଟେଷ୍ଟରେ କ୍ୟାରିୟର ଆରମ୍ଭ କରିବାରେ ମାଥ୍ୟୁ ରେନ୍ଶ, ପିଟର ହ୍ୟାଣ୍ଡ୍ସକମ୍ବ ଓ ନିକ୍ ମାଡିନସନଙ୍କ କ୍ଲବରେ ସାମିଲ ହେବେ। ଏହି ୩ ଜଣ ୨୦୧୬ରେ ଦକ୍ଷିଣ ଆଫ୍ରିକା ବିପକ୍ଷରେ ପିଙ୍କବଲ୍ରେ ଟେଷ୍ଟ କ୍ୟାରିୟର ଆରମ୍ଭ କରିଥିଲେ। ରିପୋର୍ଟରୁ ଯାହା ଜଣାପଡ଼ୁଛି ଓ୍ବାର୍ନରଙ୍କ ଆହତ ସମସ୍ୟା ଗୁରୁତର ଥିବାରୁ ଅତିକମ୍ରେ ୪ ସପ୍ତାହ କ୍ରିକେଟରୁ ଦୂରେଇ ରହିବେ। ଫଳରେ ସେ ଭାରତ ବିପକ୍ଷ ପ୍ରଥମ ୨ଟି ଟେଷ୍ଟ ଖେଳିବା ସମ୍ଭାବନା କମ୍। ଭାରତ ବିପକ୍ଷ ଟି୨୦ ସିରିଜ ପାଇଁ ଡି’ଆର୍ସି ଶର୍ଟଙ୍କୁ ଓ୍ବାର୍ନରଙ୍କ ବଦଳ ଖେଳାଳିଭାବେ ନିଆ ଯାଇଛି।
