ଭଞ୍ଜନଗର,୨୯।୧୨(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡ ହସ୍ପିଟାଲର ଡାକ୍ତର ପଦବୀ ଇତିମଧ୍ୟରେ ରାଜ୍ୟ ସରକାର ବୃଦ୍ଧି କରିଥିବା ଯୋଗୁଁ ତାହା ୩୮ ରେ ପହଞ୍ଚିଛି। କିନ୍ତୁ ବର୍ତ୍ତମାନ ସୁପରିନଟେଣ୍ଡେଣ୍ଟ ସମେତ ୧୦ ଜଣ ଡାକ୍ତର କାର୍ଯ୍ୟରତ ଅଛନ୍ତି। ଆଉ ୭ ଜଣ ଡାକ୍ତର ବିଗତ କିଛି ଦିନ ମଧ୍ୟରେ ଏଠାରୁ ବଦଳି ହୋଇ ଅନ୍ୟତ୍ର ଚାଲି ଯାଇଛନ୍ତି। ବର୍ତ୍ତମାନ ୨୮ଟି ଡାକ୍ତର ପଦବୀ ଖାଲି ଯୋଗୁଁ ରୋଗୀ ସେବା ବିପର୍ଯ୍ୟସ୍ତ ହୋଇପଡିଛି। ତେଣୁ ଅଧିକାଂଶ ସମୟ ରୋଗୀମାନେ ବ୍ରହ୍ମପୁର ଚିକିତ୍ସା ହେବା ପାଇଁ ଯାଉଛନ୍ତି। ସର୍ଜରୀ, ଅସ୍ଥିସଲ୍ୟ ଭଳି ଗୁରୁତ୍ୱପୂର୍ଣ୍ଣ ବିଶେଷଜ୍ଞ ପଦବୀଗୁଡିକ ବର୍ଷ ବର୍ଷ ଧରି ଖାଲି ପଡିଛି। ନିଶ୍ଚେତକ ଡାକ୍ତର ବହୁଦିନ ହେବ ଛୁଟିରେ ଅଛନ୍ତି। ଉକ୍ତ ପଦବୀଗୁଡିକ ତୁରନ୍ତ ପୂରଣ କରିବା ଆବଶ୍ୟକତା ରହିଛି। ଅନ୍ୟପଟେ ମେଡିକାଲର ଭିତ୍ତିଭୂମି ସୁଦୃଢ ପାଇଁ ୫-ଟି ମାଧ୍ୟମରେ କୋଟି କୋଟି ଟଙ୍କା ଅନୁଦାନ ଆସିଛି। ଆଗାମୀ ଦିନରେ ଭଞ୍ଜନଗର ଅଞ୍ଚଳର ଜନସାଧାରଣଙ୍କୁ ଉତ୍ତମ ସ୍ବାସ୍ଥ୍ୟ ସେବା ଯୋଗାଇ ଦେବା ପାଇଁ ଅତ୍ୟାଧୁନିକ ଭିତ୍ତିଭୂମି ପ୍ରସ୍ତୁତ କରାଯାଉଛି। ତାହାର କାମ ଦ୍ରୁତ ଗତିରେ ଚାଲିଛି। କିନ୍ତୁ ସ୍ବାସ୍ଥ୍ୟ ସେବାକୁ ସୁଧାରିବାକୁ ହେଲେ ଭିତ୍ତିଭୂମି ସୁଦୃଢ ସହ ଖାଲିଥିବା ଡାକ୍ତର ସମେତ ଅନ୍ୟାନ୍ୟ ପଦବୀଗୁଡିକୁ ପୂରଣ କରିବାକୁ ପଡିବ। ଅପରପକ୍ଷେ ଗୁରୁବାର ରାଜ୍ୟ ସରକାର ସ୍ବାସ୍ଥ୍ୟ ବିଭାଗରେ ୨୪୭୩ ଜଣ ନୁତନ ଡାକ୍ତରଙ୍କୁ ନିଯୁକ୍ତି ଦେଇଛନ୍ତି। ସେଥିମଧ୍ୟରୁ ଭଞ୍ଜନଗର ମେଡିକାଲକୁ ୧୦ଟି ଡାକ୍ତର ଦେବା ପାଇଁ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଅନୁରୋଧ କରାଯାଇଛି। ସେହିଭଳି ଜିଲା ପାଇଁ ୨୪୦ ଜଣ ଡାକ୍ତର ଦେବା ପାଇଁ ଅନୁରୋଧ କରାଯାଇଛି। ଆଜି ନିଯୁକ୍ତି ପର୍ବ ସରିବା ପରେ ଖୁବ ଶୀଘ୍ର ସେମାନଙ୍କୁ ମେଡିକାଲ ଗୁଡିକରେ ନିଯୁକ୍ତି ଦିଆଯିବ। ଭଞ୍ଜନଗର ମେଡିକାଲର ଆବଶ୍ୟକତାକୁ ଦେଖି ସରକାର ୧୦ ଟି ନୂତନ ଡାକ୍ତର ଦେବାପାଇଁ ସାଧାରଣରେ ଦାବି ହୋଇଛି। ଏଥିସହ ଖାଲିଥିବା ଅନ୍ୟ ପଦବୀଗୁଡିକୁ ମଧ୍ୟ ପୂରଣ କରିବା ପାଇଁ ଦାବି ହୋଇଛି।
ସୂଚନାଯୋଗ୍ୟଯେ ଭଞ୍ଜନଗର ଉପଖଣ୍ଡ ମେଡିକାଲ ଉପରେ ଭଞ୍ଜନଗର ଉପଖଣ୍ଡର ୮ ଟି ବ୍ଲକ ଓ ଭଞ୍ଜନଗର, ବେଲଗୁଣ୍ଠା, ବୁଗୁଡ଼ା, ସୋରଡ଼ା ଏନଏସି ସମେତ କନ୍ଧମାଳ ଜିଲା ରାଇକିଆ, ଜି.ଉଦୟଗିରି, ଚକାପାଦ ବ୍ଲକ ଜନସାଧାରଣ ଏବଂ ନୟାଗଡ଼ ଜିଲାର ଦଶପଲ୍ଲା ଏବଂ ଓ ଅଞ୍ଚଳର ରୋଗୀମାନେ ସ୍ବାସ୍ଥ୍ୟ ସେବା ପାଇବା ପାଇଁ ନିର୍ଭରଶୀଳ। ତେଣୁ ଦୈନନ୍ଦିନ ବହୁ ଲୋକ ସ୍ବାସ୍ଥ୍ୟ ସେବା ପାଇବା ପାଇଁ ଭଞ୍ଜନଗର ହସ୍ପିଟାଲକୁ ଆସିଥାନ୍ତି। କିନ୍ତୁ ଏଠାରେ ଡାକ୍ତର ପଦବୀ ଖାଲି ପଡିଥିବା ଯୋଗୁଁ ରୋଗୀମାନେ ଆବଶ୍ୟକ ସ୍ବାସ୍ଥ୍ୟ ସେବା ପାଇ ପାରୁନାହାନ୍ତି। ଏନେଇ ମେଡିକାଲ ପରିଚାଳକ ବିଚିତ୍ର ପାଣିଗ୍ରାହୀଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ ଖାଲିଥିବା ପଦବୀ ଗୁଡିକ ପୂରଣ ପାଇଁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଚିଠି ଲେଖାଯାଇଛି। ଆଗାମୀ ଦିନରେ ସମସ୍ୟାର ସମାଧାନ ହୋଇଯିବ।
