ଜଗତ୍ସିଂହପୁର ଅଫିସ,୧୧ା୨: ଜଗତ୍ସିଂହପୁର ଜିଲା ବାଲିକୁଦା ବ୍ଲକ ଅନ୍ତର୍ଗତ ୪ନଂ. ଜିଲା ପରିଷଦ ଜୋନର ଗୁରୁତ୍ୱ ରହିଛି। କାରଣ ଏହି ଜୋନର ଜିଲା ପରିଷଦ ସଭ୍ୟା ବବିତା ସ୍ବାଇଁ ବାଲିକୁଦା ବ୍ଲକ ଉପାଧ୍ୟକ୍ଷ ଓ ପରେ ଅଧ୍ୟକ୍ଷ ହୋଇଥିଲେ। ଏଥିସହ ରାଜ୍ୟ ବିଜୁ ମହିଳା ଜନତା ଦଳ ଉପସଭାପତି ମଧ୍ୟ ହୋଇଛନ୍ତି। ସେହିପରି ରାଖଲ ଦାସ କୁସୁପୁର ପଞ୍ଚାୟତ ସମିତିସଭ୍ୟ ସାଙ୍ଗକୁ ବାଲିକୁଦା ବ୍ଲକ ଉପାଧ୍ୟକ୍ଷ ଥିଲେ। ବବିତା ଓ ରାଖଲ ଏଥର ଜିଲା ପରିଷଦ ସଭ୍ୟ ପଦବୀ ପାଇଁ ଆଶାୟୀ ଥିବା ଚର୍ଚ୍ଚା ହେଉଥିଲା। କିନ୍ତୁ ଶେଷ ମୁହୂର୍ତ୍ତରେ ତାହା ଫସର ଫାଟି ଯାଇଥିଲା। ଅନ୍ୟପକ୍ଷେ ଗତ ନିର୍ବାଚନରେ ବିଜେଡି ଦଖଲରେ ଜୋନ ଥିଲେ ସୁଦ୍ଧା ଏବେ ଚିତ୍ର ବଦଳିଯାଇଛି। ଭାଜପାର ସଙ୍ଗଠନ ସେଭଳି ନ ଥିଲେ ସୁଦ୍ଧା ଦଳୀୟ ପ୍ରାର୍ଥୀଙ୍କ ଲୋକ ସମ୍ପର୍କ ବିଜେଡି ଓ କଂଗ୍ରେସର ଚିନ୍ତା ବଢାଇ ଦେଇଛି। ଏଥର ଜୋନରେ ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେବାକୁ ଯାଉଥିବା ରାଜନୈତିକ ସମୀକ୍ଷକମାନେ ଆକଳନ କରିଛନ୍ତି।
ବାଲିକୁଦା ୪ନଂ. ଜୋନଟି ଗତଥର ମହିଳାଙ୍କ ପାଇଁ ସଂରକ୍ଷିତ ଥିଲା। କିନ୍ତୁ ଏଥର ଅଣସଂରକ୍ଷିତ କରାଯାଇଛି। ଏହି ଜୋନ ଅନନ୍ତପୁର, ଅପଣ୍ଡରା, ଓଷକଣା, କୁସୁପୁର, ଖାଲଗଁା, ନହରଣା, ବରମୁଣ୍ଡଳୀ ଓ ମରିଚପୁର ପଞ୍ଚାୟତକୁ ନେଇ ଗଠିତ। ଗତ ନିର୍ବାଚନରେ ଜୋନର ଭୋଟର ସଂଖ୍ୟା ୩୫,୫୧୫ ଥିଲା। କିନ୍ତୁ ଏଥର ଅଧିକ ୧,୭୦୫ ଜଣ ଯୋଡି ହୋଇଛନ୍ତି। ୨୦୧୭ ନିର୍ବାଚନ ଫଳାଫଳ ଦେଖିଲେ ଏହି ଜୋନରୁ ବିଜେଡି ପ୍ରାର୍ଥୀ ବବିତା ସ୍ବାଇଁଙ୍କୁ ୧୪,୪୧୩ ଖଣ୍ଡ, ଅର୍ଥାତ୍ ମୋଟ ମତଦାନର ୪୦.୫୮% ଭୋଟ ମିଳିଥିଲା। କଂଗ୍ରେସ ପ୍ରାର୍ଥୀ ଚିନ୍ମୟୀ ସେଠୀଙ୍କ ସପକ୍ଷରେ ୮,୯୬୦ ଖଣ୍ଡ, ଅର୍ଥାତ୍ ୨୫.୨୨% ଭୋଟ ଯାଇଥିଲା। ଭାଜପାର ଜ୍ୟୋତ୍ସ୍ନାରାଣୀ ନାୟକଙ୍କୁ ୫,୧୯୪ ଖଣ୍ଡ, ଅର୍ଥାତ୍ ୧୪.୬୨% ଭୋଟ ମିଳିଥିଲା। ଉକ୍ତ ନିର୍ବାଚନରେ କଂଗ୍ରେସ ପ୍ରାର୍ଥୀ ସେଠୀଙ୍କଠାରୁ ବିଜେଡିର ସ୍ବାଇଁ ଅଧିକ ୫,୪୫୩ ଖଣ୍ଡ ଭୋଟ ପାଇ ଜିତିଥିଲେ। ଆସନ୍ତା ୧୬ ତାରିଖ ଉକ୍ତ ଜୋନରେ ପ୍ରଥମ ପର୍ଯ୍ୟାୟରେ ନିର୍ବାଚନ ହେବ। ଏଥର ବିଜେଡିରୁ ତଟିନା ସ୍ବାଇଁ, କଂଗ୍ରେସରୁ ନୃସିଂହ ଚରଣ ଦାସ, ଭାଜପାରୁ ଡ. ଶଶାଙ୍କ ଶେଖର ସାହାଣୀ, ସ୍ବାଧୀନରୁ ରମେଶ ଚନ୍ଦ୍ର ପାଇଟାଳ ଓ ବୀରବର ଦଳାଇ ପ୍ରାର୍ଥୀ ହୋଇଛନ୍ତି। କିନ୍ତୁ ବିଜେଡି, କଂଗ୍ରେସ ଓ ଭାଜପା ମଧ୍ୟରେ ଲଢେଇ ହେବ। ସ୍ବାଧୀନ ପ୍ରାର୍ଥୀ ପାଇଟାଳ ମଧ୍ୟ ଏହି ନିର୍ବାଚନରେ କେତେକାଂଶରେ ପ୍ରଭାବ ପକାଇ ପାରନ୍ତି। କାରଣ ସେ ଗତ ନିର୍ବାଚନରେ ବିଜେଡି ସମର୍ଥନରେ ଅନନ୍ତପୁର ସରପଞ୍ଚ ହୋଇଥିଲେ। ଏଥର ସେ ବିଜେଡିରୁ ଜିଲା ପରିଷଦ ସଭ୍ୟ ପଦ ପାଇଁ ପ୍ରାର୍ଥୀ ହେବେ ବୋଲି ଆଶା ରଖିଥିଲେ। ଦଳ ତାଙ୍କୁ ନିରାଶ କରିବାରୁ ସେ ବାଧ୍ୟ ହୋଇ ସ୍ବାଧୀନ ଭାବେ ପ୍ରାର୍ଥତ୍ପତ୍ର ଦାଖଲ କରିଛନ୍ତି। ସେହିପରି ଆଇନଜୀବୀ ଯୁଗଳ ମହାନ୍ତି ଏଥର ଜୋନରୁ ବିଜେଡି ଜିଲା ପରିଷଦ ପ୍ରାର୍ଥୀ ହେବା ପାଇଁ ଆଶାୟୀ ଥିଲେ। ତାଙ୍କ ବାପା ମହେଶ୍ୱର ମହାନ୍ତି ସେ ଅଞ୍ଚଳର ଜଣେ ଜଣାଶୁଣା ବ୍ୟକ୍ତିତ୍ୱ। ମହେଶ୍ୱର ବରମୁଣ୍ଡଳୀ ପଞ୍ଚାୟତ ସରପଞ୍ଚ ଥିଲେ। ଶେଷରେ ଯୁଗଳଙ୍କୁ ଉପେକ୍ଷା କରାଯାଇଥିବା ରାଜନୈତିକ ମହଲରେ ଚର୍ଚ୍ଚା ହୋଇଥିଲା। ପୂର୍ବତନ ବିଧାୟକ ତଥା କଂଗ୍ରେସ ନେତା ଲଲାଟେନ୍ଦୁ ମହାପାତ୍ର ଦଳୀୟ ପ୍ରାର୍ଥୀ ସମ୍ପର୍କରେ କହିଛନ୍ତି, ଦାସ ଅପଣ୍ଡରା ପଞ୍ଚାୟତ ସରପଞ୍ଚ ଥିଲେ। ସେ ୩ ଥର ସମବାୟ ସେବା ସମିତି ସଭାପତି ଥିଲେ। ସ୍ଥାନୀୟ ଅଞ୍ଚଳର ଜଣେ ଲୋକପ୍ରିୟ ନେତା ଭାବେ ପରିଚିତ। ତେଣୁ ଜନମତ କଂଗ୍ରେସ ସପକ୍ଷରେ ଯିବ। ବିଜେଡି ଜିଲା ପରିଷଦ ପ୍ରାର୍ଥୀ ପୂର୍ବରୁ କଂଗ୍ରେସରେ ଥିଲେ। ସେ ୨୦୧୨-୧୭ ପର୍ଯ୍ୟନ୍ତ କଂଗ୍ରେସ ସମର୍ଥନରେ ବରମୁଣ୍ଡଳୀ ପଞ୍ଚାୟତ ସରପଞ୍ଚ ଥିଲେ। ୨୦୧୭ ନିର୍ବାଚନରେ ମଧ୍ୟ ଏହି ପଞ୍ଚାୟତ ସମିତି ସଭ୍ୟା ପ୍ରାର୍ଥୀ ହୋଇ ଜିତିଥିଲେ। ନିକଟରେ କଂଗ୍ରେସ ଛାଡି ବିଜେଡିରୁ ଜିଲା ପରିଷଦ ପ୍ରାର୍ଥୀ ହୋଇଛନ୍ତି। ଏହାଦ୍ୱାରା କଂଗ୍ରେସର କୌଣସି କ୍ଷତି ହେବନାହିଁ ବୋଲି ମହାପାତ୍ର କହିଛନ୍ତି। ବିଜେଡି ପ୍ରାର୍ଥୀ ସ୍ବାଇଁ କହିଛନ୍ତି, ରାଜ୍ୟ ସରକାରଙ୍କ ସ୍ବଚ୍ଛ ଶାସନ ଯୋଗୁ ଲୋକେ ଶଙ୍ଖ ଚିହ୍ନକୁ ଭୋଟ ଦେବେ। ଯେହେତୁ ବରମୁଣ୍ଡଳୀ ପଞ୍ଚାୟତରୁ ସେ ନିକଟରେ ୨ ଥର ଲୋକ ପ୍ରତିନିଧି ହୋଇ ପାରିଛନ୍ତି। ତେଣୁ ଏଥର ଜିଲା ପରିଷଦ ପ୍ରାର୍ଥୀ ହିସାବରେ ଅଧିକ ସମର୍ଥନ ପାଇବେ। ବିଶେଷ କରି କୁସୁପୁର ଏବଂ ଓଷକଣା ପଞ୍ଚାୟତରୁ ଅଧିକ ଭୋଟ ପାଇବେ ବୋଲି ସେ ଆଶାବ୍ୟକ୍ତ କରିଛନ୍ତି। ଭାଜପା ପ୍ରାର୍ଥୀ ଡ.ସାହାଣୀ କହିଛନ୍ତି ସେ ଜଣେ ଡାକ୍ତର ହୋଇଥିଲେ ସୁଦ୍ଧା ଅଞ୍ଚଳରେ ଲୋକଙ୍କ ସାଙ୍ଗରେ ରହିଛନ୍ତି। ତଳମାଳ ବିକାଶ ପରିଷଦର ସଭାପତି ଭାବେ ବିଭିନ୍ନ ସମୟରେ ସ୍ଥାନୀୟ ସମସ୍ୟାକୁ ନେଇ ଆନ୍ଦୋଳନ କରିଛନ୍ତି। ଜୋନ ଅନ୍ତର୍ଗତ ନହରଣା, ମରୀଚପୁର, ଅପଣ୍ଡରା, ଓଷକଣା ଓ ବରମୁଣ୍ଡଳୀରୁ ଅଧିକ ଜନମତ ଆସିବ ବୋଲି ସାହାଣୀ କହିଛନ୍ତି। ଆଗକୁ ଦେଖିବାର ଅଛି ସମୀକରଣ ମୋଡ କେଉଁ ଆଡ଼କୁ ଯାଉଛି ।
