ନୂଆଦିଲ୍ଲୀ,୨୫।୨: ଟି-୨୦ ବିଶ୍ୱକପ୍ର ଏକ ଗୁରୁତ୍ୱପୂର୍ଣ୍ଣ ମ୍ୟାଚ ପୂର୍ବରୁ ଜିମ୍ବାୱେ ଅଲରାଉଣ୍ଡର ରୟାନ ବର୍ଲ ଏକ ବଡ଼ ବୟାନ ଦେଇଛନ୍ତି। ଭାରତୀୟ ମାଟିରେ ଭାରତ ବିରୋଧରେ ଖେଳିବା ଏକ ବଡ଼ ଆହ୍ବାନ ବୋଲି ସେ ସ୍ବୀକାର କରିଥିଲେ ମଧ୍ୟ, ଘରୋଇ ଦର୍ଶକଙ୍କ ସାମ୍ନାରେ ଖେଳିବାର ଅତିରିକ୍ତ ଚାପ ସୂର୍ଯ୍ୟକୁମାର ଯାଦବଙ୍କ ଦଳ ଉପରେ ଭାରି ପଡ଼ିପାରେ ବୋଲି ସେ କହିଛନ୍ତି।
ଦକ୍ଷିଣ ଆଫ୍ରିକା ଏବଂ ୱେଷ୍ଟଇଣ୍ଡିଜ ବିରୋଧରେ ପରାଜୟ ପରେ ସୁପର-୮ର ଏହି ମ୍ୟାଚ ଭାରତ ଏବଂ ଜିମ୍ବାୱେ ଉଭୟଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇପଡ଼ିଛି। ସେମିଫାଇନାଲ ଦୌଡ଼ରେ ରହିବାକୁ ହେଲେ ଗୁରୁବାର ମ୍ୟାଚ ଜିତିବା ଉଭୟ ଦଳ ପାଇଁ ଅପରିହାର୍ଯ୍ୟ।
ସାମ୍ବାଦିକ ସମ୍ମିଳନୀରେ ବର୍ଲ କହିଛନ୍ତି, ଏହା ଆମ ପାଇଁ ଏକ ’କର ବା ମର’ ସ୍ଥିତି, କିନ୍ତୁ ଭାରତର ଅବସ୍ଥା ମଧ୍ୟ ସମାନ। ବିଶ୍ୱକପ ମ୍ୟାଚ ହୋଇଥିବାରୁ ଏଠାରେ ବହୁତ କିଛି ବାଜିରେ ଲାଗିଛି। ଚାପ ଦଳ ଉପରେ ଅଜବ ପ୍ରଭାବ ପକାଇଥାଏ, ଆମେ ଆଶା କରୁଛୁ ଆମର ରଣନୀତି ସଫଳ ହେବ।”
ଭାରତର ଆକ୍ରମଣାତ୍ମକ ବ୍ୟାଟିଂକୁ ରୋକିବା ପାଇଁ ଜିମ୍ବାୱେ ପାଖରେ ଅନେକ ବୋଲିଂ ବିକଳ୍ପ ରହିଛି ବୋଲି ବର୍ଲ ଦାବି କରିଛନ୍ତି। ତାଙ୍କ କହିବା ଅନୁଯାୟୀ, ଦଳରେ ବାମହାତୀ ଓ ଡାହାଣହାତୀ ଦ୍ରୁତ ବୋଲର ଅଛନ୍ତି। ଦୁଇଜଣ ଲେଗ ସ୍ପିନର, ଜଣେ ଅଫ ସ୍ପିନର ଏବଂ ଜଣେ ବାମହାତୀ ଅଫ ସ୍ପିନରଙ୍କୁ ମିଶାଇ ଦଳରେ ବହୁତ ବିବିଧତା ରହିଛି। ପଡ଼ିଆରେ ବ୍ୟାଟରଙ୍କ ସ୍ଥିତି ଦେଖି ବୋଲିଂ କମ୍ବିନେସନ ବ୍ୟବହାର କରାଯିବ।
ଜିମ୍ବାୱେ ପାଇଁ ସବୁଠାରୁ ବଡ଼ ଆଶ୍ୱସ୍ତିର ଖବର ହେଉଛି ଅଧିନାୟକ ସିକନ୍ଦର ରଜାଙ୍କ ଫିଟନେସ। ୱେଷ୍ଟଇଣ୍ଡିଜ ବିରୋଧରେ ଖେଳିବା ସମୟରେ ସେ ଆହତ ହୋଇଥିଲେ ମଧ୍ୟ, ଭାରତ ବିରୋଧରେ ସେ ଖେଳିବା ପାଇଁ ସମ୍ପୂର୍ଣ୍ଣ ଫିଟ ଅଛନ୍ତି ବୋଲି ବର୍ଲ ସ୍ପଷ୍ଟ କରିଛନ୍ତି।
