ମୁମ୍ବାଇ,୧୩।୭: ଚଳିତ ଆର୍ଥତ୍କ ବର୍ଷରେ ଭାରତର ଅଭିବୃଦ୍ଧି ନକାରାତ୍ମକ ରହିବ। ଏହି ସମୟରେ ଘରୋଇ ବଜାରର ଅଭିବୃଦ୍ଧି -୪.୫% ରହିବ ବୋଲି ଫିକି ପକ୍ଷରୁ ହୋଇଥିବା ସର୍ଭେରେ ପୂର୍ବାନୁମାନ କରାଯାଇଛି। ଏହି ସର୍ଭେରେ କୁହାଯାଇଛି ଯେ, କରୋନା ମାମଲା ବର୍ତ୍ତମାନ ଦ୍ରୁତ ହାରରେ ବଢୁଛି। ଏହାର ପ୍ରଭାବ ବଜାରକୁ ଗଭୀର ଭାବେ କ୍ଷତି ପହଞ୍ଚାଇଛି। ବଜାରରେ ସ୍ବାସ୍ଥ୍ୟ ସଙ୍କଟ ମଧ୍ୟ ସୃଷ୍ଟି ହୋଇଛି। ଚଳିତ ବର୍ଷ ଫିକି ଏହାର ପୂର୍ବାନୁମାନରେ କହିଥିଲା ଯେ, ଭାରତର ଅଭିବୃଦ୍ଧି ହାର ୨୦୨୦-୨୧ ଆର୍ଥତ୍କ ବର୍ଷରେ ୫.୫% ରହିବ। କରୋନା ମହାମାରୀକୁ ନିୟନ୍ତ୍ରଣ କରିବା ଲାଗି ଦେଶ ମଧ୍ୟରେ ହୋଇଥିବା ଲକ୍ଡାଉନ ଯୋଗୁ ଆର୍ଥତ୍କ କାର୍ଯ୍ୟକଳାପ ଠପ୍ ହୋଇଯାଇଛି। ବର୍ତ୍ତମାନ କଟକଣାକୁ ଧୀରେ ଧୀରେ କୋହଳ କରାଯାଉଥିଲେ ମଧ୍ୟ ସବୁ କିଛି ଟ୍ରାକ୍କୁ ଫେରି ପାରିନାହିଁ।
ଦେଶର ଅର୍ଥ ବ୍ୟବସ୍ଥା ଧୀରେ ଧୀରେ ସ୍ଥିତାବସ୍ଥାକୁ ଫେରୁ ଥିବା ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସ ଶନିବାର କହିଛନ୍ତି। ଚଳିତ ଆର୍ଥତ୍କ ବର୍ଷ ଦେଶର ବିକାଶ ହାର ନକାରାତ୍ମକ ରହିବ ବୋଲି ରିଜର୍ଭ ବ୍ୟାଙ୍କ ମେ ମାସରେ ଏହାର ଆକଳନରେ କହିଥିଲା। ବର୍ତ୍ତମାନର ସର୍ଭେରେ ଫିକି ଉଦ୍ୟୋଗ, ବ୍ୟାଙ୍କିଙ୍ଗ ଏବଂ ବିତ୍ତୀୟ ସେବା କ୍ଷେତ୍ର ବିଶେଷଜ୍ଞଙ୍କ ମତାମତ ନିଆଯାଇଛି। ଫିକି ଏହାର ଇକୋନୋମିକ ଆଉଟ୍ଲୁକ ସର୍ଭେରେ କହିଛି ଯେ, ନୂ୍ୟନତମ ଅଭିବୃଦ୍ଧି -୬.୪% ଏବଂ ସର୍ବୋଚ୍ଚ ଅଭିବୃଦ୍ଧି ୧.୫% ରହିପାରେ। ଚଳିତ ଆର୍ଥତ୍କ ବର୍ଷର ପ୍ରଥମ ତ୍ରୈମାସରେ ଜିଡିପି ହାର ୧୪% ଖସିଯିବ ବୋଲି ଆକଳନରେ କୁହାଯାଇଛି। ୨୦୨୦-୨୧ରେ ଦେଶର କୃଷି କ୍ଷେତ୍ର ଅଭିବୃଦ୍ଧି ୨.୭% ରହିବା ନେଇ ରିପୋର୍ଟରେ ଉଲ୍ଲେଖ କରାଯାଇଛି। କେବଳ କୃଷି କ୍ଷେତ୍ର ଉପରେ କରୋନାର ପ୍ରଭାବ ବେଶି ରହିବ ନାହିଁ। ସେହିଭଳି ଦେଶର ଗ୍ରାମାଞ୍ଚଳ ମୋଟ ଚାହିଦା ବୃଦ୍ଧିରେ ଏକ ପ୍ରମୁଖ ଯୋଗଦାନ ରଖିବା ନେଇ ପୂର୍ବାନୁମାନ କରାଯାଇଛି।
ଏହି ସମୟରେ ଶିଳ୍ପ ଏବଂ ସେବା କ୍ଷେତ୍ର ଯଥାକ୍ରମେ ୧୧.୪% ଏବଂ ୨.୮% ହ୍ରାସ ଘଟିପାରେ। ଚାହିଦା ଏବଂ ଶିଳ୍ପ କ୍ଷେତ୍ରର କ୍ଷମତା ଉପଯୋଗ ପୂର୍ବ ସ୍ଥିତିକୁ ଫେରିବାରେ ଅସୁବିଧା ହେଉଛି। ଏହା ନିବେଶକୁ ପ୍ରଭାବିତ କରୁଛି। ଅର୍ଥ ବ୍ୟବସ୍ଥାକୁ ଠିକ୍ କରିବା ଲାଗି ସରକାର ଅଧିକ ପଦକ୍ଷେପ ଗ୍ରହଣ କରିବାର ଆବଶ୍ୟକତା ଉପରେ ବିଶେଷଜ୍ଞ ଗୁରୁତ୍ୱାରୋପ କରିଛନ୍ତି। ସରକାର ଅର୍ଥ ବ୍ୟବସ୍ଥା ଲାଗି ବର୍ତ୍ତମାନ ସୁଦ୍ଧା ୨ଟି ପ୍ୟାକେଜ୍ ଘୋଷଣା କରିଛନ୍ତି। ରିଜର୍ଭ ବ୍ୟାଙ୍କ ମଧ୍ୟ ବିଭିନ୍ନ ପଦକ୍ଷେପ ଗ୍ରହଣ କରିଛି। ଏହା ସତ୍ତ୍ୱେ ବଜାର ଟ୍ରାକ୍କୁ ଫେରିବାକୁ ଅସୁବିଧା ହେଉଛି, କାରଣ କରୋନାର ପ୍ରଭାବ ଗଭୀର ହୋଇଥିବାରୁ ସ୍ଥିତି ସୁଧୁରିବା ଲାଗି ସମୟ ଲାଗିବ।
