କଲମ୍ବୋ,୨୯।୭: ଶ୍ରୀଲଙ୍କା ବିପକ୍ଷ ଦ୍ୱିତୀୟ ଟି-୨୦ରେ ପରାଜିତ ହୋଇଛି ଭାରତ। ଭାରତୀୟ ଦଳ ଏହି ମ୍ୟାଚ୍କୁ ଶେଷ ପର୍ଯ୍ୟନ୍ତ ନେବାରେ ସଫଳ ହୋଇଥିଲେ ହେଁ ହାର୍କୁ ଏଡାଇ ପାରି ନ ଥିଲା। ତେବେ କୋଭିଡ ସଂକ୍ରମିତ ହେବାର ଗୋଟିଏ ମାମଲା ଏହିଭଳି ଦଳକୁ ମହଙ୍ଗା ପଡ଼ିପାରେ ବୋଲି ଚର୍ଚ୍ଚା ହେଉଛି। କୋଚ୍ ରାହୁଲ ଦ୍ରାବିଡ ମଧ୍ୟ ତାଙ୍କର ଏକ ବିବୃତ୍ତିରେ ଏହା ସ୍ପଷ୍ଟ କରିଛନ୍ତି। ଏହାଛଡ଼ା ଦ୍ୱିତୀୟ ଟି-୨୦ରେ ପରାଜୟ ପରେ ଆଉ ଏକ ନୂଆ ସମସ୍ୟା ସୃଷ୍ଟି ହୋଇଛି।
ମ୍ୟାଚ୍ ପୂର୍ବରୁ ଟିମ୍ ଇଣ୍ଡିଆର କୋଚ୍ ଦ୍ରାବିଡଙ୍କୁ କିଏ ଫିଲ୍ଡିଂ କରିବାକୁ ଯାଉଛନ୍ତି ତାହା ପଚରାଯାଇଥିଲା। ଏଥିରେ ସେ ହସି ‘ଚୟନ ପାଇଁ ଆମର କେବଳ ୧୧ଜଣ ଖେଳାଳି ଥିଲେ। ସମସ୍ତେ ପଡ଼ିଆକୁ ଓହ୍ଲାଇବେ’ ବୋଲି ସେ କହିଥିଲେ। ଦେଖିବାକୁ ଗଲେ କ୍ରୁନାଲ ପାଣ୍ଡ୍ୟା କୋଭିଡ ପଜିଟିଭ୍ ହେବା ପରେ ୯ଜଣ ଖେଳାଳି କ୍ୱାରାଣ୍ଟାଇନ୍ରେ ଅଛନ୍ତି। ଏଣୁ ଚୟନ ପାଇଁ ୧୫ ଖେଳାଳି ବାକିଥିଲେ। ସେଥିରେ ମୁଖ୍ୟ ଟିମ୍ର ସମସ୍ତ ଚାରୋଟି ନେଟ୍ ବୋଲରଙ୍କୁ ଅନ୍ତର୍ଭୁକ୍ତ କରାଯାଇଥିଲେ।
ଅପରପକ୍ଷେ ଦ୍ୱିତୀୟ ଟି-୨୦ ମ୍ୟାଚ୍ର ଓଭରରେ ମାତ୍ର କିଛି ମିନିଟ୍ ବାକିଥିବା ବେଳେ ନବଦୀପ ସଇନି କ୍ୟାଚ୍ ଧରିବାକୁ ପ୍ରୟାସ କରୁଥିବା ବେଳେ ଆହତ ହୋଇଥିଲେ। ଏହାପରେ ଫିଜିଓଙ୍କୁ ପଡ଼ିଆକୁ ଆସିବାକୁ ପଡ଼ିଥିଲା। ଏଭଳିସ୍ଥିତିରେ ଯଦି ଗୁରୁବାର ଖେଳାଯିବାକୁ ଥିବା ତୃତୀୟ ଟି୨୦ ମ୍ୟାଚ୍ ଖେଳାଯାଏ ତେବେ ଦଳ ପାଇଁ ବଡ ସମସ୍ୟା ଦେଖାଦେବ। ସାଇନି ଫିଲ୍ଡିଂ କରିବାକୁ ସକ୍ଷମ ନ ହେଲେ ଦଳକୁ ଜଣେ ନେଟ ବୋଲରଙ୍କୁ ସୁଯୋଗ ଦେବାକୁ ହେବ।
ଭାରତୀୟ ଦଳ ସହ ଯାଇଥିବା ନେଟ୍ ବୋଲରଙ୍କ ମଧ୍ୟରେ ଇଶାନ୍ ପୋରେଲ୍, ସନ୍ଦୀପ ଓ୍ବାରିଅର୍, ସିମରଜିତ ସିଂହ, ଆର୍ ସାଇ କିଶୋର ଅଛନ୍ତି। ଏମାନଙ୍କର ଅନ୍ତର୍ଜାତୀୟ କ୍ରିକେଟରେ ଅଭିଜ୍ଞତା ନାହିଁ। ତଥାପି ଆବଶ୍ୟକ ପଡ଼ିଲେ ଦଳ ଏମାନଙ୍କ ମଧ୍ୟରୁ ଜଣଙ୍କୁ ସୁଯୋଗ ଦେବ।
