ଗାଙ୍ଗଝୋ,୨୫।୯: ଏସିଆନ୍ ଗେମ୍ସର ଦ୍ୱିତୀୟ ଦିନରେ ଭାରତ ଭଲ ଆରମ୍ଭ କରିଥିଲା। ଶୁଟିଂରେ ଦେଶକୁ ସ୍ବର୍ଣ୍ଣ ପଦକ ମିଳିଛି। ୧୦ ମିଟର ଏୟାର ରାଇଫଲ ଇଭେଣ୍ଟରେ ଐଶ୍ୱର୍ଯ୍ୟ ପ୍ରତାପ ସିଂ ତୋମର, ରୁଦ୍ରଙ୍କେଶ ଏବଂ ଦିବ୍ୟାଂଶ ଦେଶ ପାଇଁ ସ୍ବର୍ଣ୍ଣ ପଦକ ଜିତିଛନ୍ତି। ଦେଶକୁ ପ୍ରଥମ ସ୍ବର୍ଣ୍ଣ ପଦକ ପ୍ରଦାନ କରିବା ସହ ଏହି ୩ ଜଣ ବିଶ୍ୱ ରେକର୍ଡ ମଧ୍ୟ ସୃଷ୍ଟି କରିଛି।
ପୁରୁଷ ୧୦ ମିଟର ଏୟାର ରାଇଫଲ ବିଭାଗରେ ଭାରତୀୟ ଦଳ ମୋଟ ୧୮୯୩.୭ ସ୍କୋର କରି ବିଶ୍ୱ ରେକର୍ଡ ଭାଙ୍ଗିଛି। ଏହାପୂର୍ବରୁ ଶୁଟିଂ ଦଳ ଇଭେଣ୍ଟରେ ସର୍ବାଧିକ ସ୍କୋର ଚାଇନା ନାମରେ ହୋଇଥିଲା। ଗତ ମାସରେ ବାକୁ ବିଶ୍ୱ ଚାମ୍ପିଅନସିପରେ ଚାଇନାର ଖେଳାଳିମାନେ ୧୮୯୩.୩ ସ୍କୋର ହାସଲ କରିଥିଲେ। ଚାଇନା ତୁଳନାରେ ଭାରତୀୟ ଦଳ ୦.୪ ପଏଣ୍ଟ ଅଧିକ ସ୍କୋର କରିଛି।
ଭାରତୀୟ ଶୁଟରଙ୍କ ଚମତ୍କାର ପ୍ରଦର୍ଶନ ପରେ ଚାଇନା ମଧ୍ୟ ଏସୀୟ ରେକର୍ଡ ଏବଂ ଗେମ୍ସ ରେକର୍ଡ ଚାର୍ଟରେ ନିଜର ସ୍ଥାନ ହରାଇଛି। ବର୍ତ୍ତମାନ ଟିମ ଇଣ୍ଡିଆର ନାମ ଇତିହାସରେ ଯୋଡି ହୋଇଛି।
ଏହାସହ ଭାରତର ପଦକ ସଂଖ୍ୟ ୭ରେ ପହଞ୍ଚିଛି। ଭାରତ ବର୍ତ୍ତମାନ ଗୋଟିଏ ସ୍ବର୍ଣ୍ଣ, ୩ ରୌପ୍ୟ ଏବଂ ୩ ବ୍ରୋଞ୍ଚ ପଦକ ମିଳିଛି। ବର୍ତ୍ତମାନ ମହିଳା କ୍ରିକେଟ ଦଳ ଦେଶ ପାଇଁ ଆଉ ଏକ ସ୍ବର୍ଣ୍ଣ ପଦକ ଜିତିବାର ସମ୍ଭାବନା ରହିଛି। ଏହା ବ୍ୟତୀତ ଶୁଟିଂ ଏବଂ ନୌକାଚାଳନାରେ ଅନେକ ପଦକ ଆଶା କରାଯାଏ। ପ୍ରଥମ ଦିନରେ ଭାରତ ପାଞ୍ଚଟି ପଦକ ପାଇଥିଲା।
