ନୂଆଦିଲ୍ଲୀ,୧୩।୧: ଇରାନରେ ଜାରି ରହିଥିବା ରାଜନୈତିକ ଅସ୍ଥିରତା ଓ ଆର୍ଥିକ ସଙ୍କଟ ଯୋଗୁଁ ଭାରତର ବାସୁମତୀ ଚାଉଳ ରପ୍ତାନି ବାଧାପ୍ରାପ୍ତ ହୋଇଛି। ଗୋଟିଏ ସମୟରେ ଭାରତୀୟ ବାସୁମତୀର ସବୁଠାରୁ ବଡ଼ କ୍ରେତା ଥିବା ଇରାନର ଚାହିଦା ଏବେ ବହୁ ପରିମାଣରେ ହ୍ରାସ ପାଇଛି, ଯାହା ରପ୍ତାନିକାରୀଙ୍କ ମଧ୍ୟରେ ଅନିଶ୍ଚିତତା ସୃଷ୍ଟି କରିଛି।
ରିପୋର୍ଟ ଅନୁଯାୟୀ, ପ୍ରାୟ ୧,୫୦୦ କୋଟି ଟଙ୍କାରୁ ଅଧିକ ମୂଲ୍ୟର ବାସୁମତୀ ଚାଉଳ ବର୍ତ୍ତମାନ ଇରାନ ବନ୍ଦରଗୁଡ଼ିକରେ ଅଟକି ରହିଛି। ପେମେଣ୍ଟ ବା ବକେୟା ଟଙ୍କା ମିଳିବାରେ ବିଳମ୍ବ ହେଉଥିବାରୁ ‘ଇଣ୍ଡିଆନ୍ ରାଇସ୍ ଏକ୍ସପୋର୍ଟର୍ସ ଫେଡେରେସନ୍’ (IREF) ରପ୍ତାନିକାରୀଙ୍କୁ ସତର୍କ ରହିବାକୁ ପରାମର୍ଶ ଦେଇଛି।
ଇରାନର ମୁଦ୍ରା ‘ରିଆଲ୍’ର ମୂଲ୍ୟ ଆମେରିକୀୟ ଡଲାର ତୁଳନାରେ ଅତିଶୟ ହ୍ରାସ ପାଇବା ଏବଂ ଦେଶରେ ବଢ଼ୁଥିବା ମୁଦ୍ରାସ୍ଫୀତି ଯୋଗୁଁ ସେଠାକାର ଆମଦାନୀକାରୀମାନେ ଅର୍ଥ ପୈଠ କରିବାରେ ଅସମର୍ଥ ହେଉଛନ୍ତି। ଏହା ସହିତ ଆମେରିକା ପକ୍ଷରୁ ଇରାନ ସହ ବାଣିଜ୍ୟ କରୁଥିବା ଦେଶଗୁଡ଼ିକ ଉପରେ ୨୫% ଶୁଳ୍କ ଲଗାଇବାର ଚେତାବନୀ ପରିସ୍ଥିତିକୁ ଆହୁରି ଜଟିଳ କରିଛି।
ଯଦି ଏହି ସମସ୍ୟାର ସମାଧାନ ଶୀଘ୍ର ନହୁଏ, ତେବେ ହରିୟାଣା ଓ ପଞ୍ଜାବର ଚାଉଳ ମିଲ୍ ମାଲିକମାନେ ପ୍ରଭାବିତ ହେବେ। ଚାହିଦା କମିଲେ ବଜାରରେ ବାସୁମତୀର ଦର ହ୍ରାସ ପାଇବା ଆଶଙ୍କା ରହିଛି, ଯାହାର ସିଧାସଳଖ ପ୍ରଭାବ ଚାଷୀଙ୍କ ଉପରେ ପଡ଼ିବ।
୨୦୨୪-୨୫ରେ ଇରାନକୁ ୬,୩୭୪ କୋଟି ଟଙ୍କାର ବାସୁମତୀ ରପ୍ତାନି ହୋଇଥିଲା। ୨୦୧୮-୧୯ରେ ଭାରତର ମୋଟ ବାସୁମତୀ ରପ୍ତାନିରେ ଇରାନର ଅଂଶ ୩୩% ଥିବାବେଳେ ଏବେ ତାହା ପ୍ରାୟ ୧୨.୭%କୁ ଖସି ଆସିଛି। ଚାଉଳ ବ୍ୟତୀତ ଭାରତୀୟ ଚା’, କଫି ଏବଂ ମସଲା ରପ୍ତାନି ମଧ୍ୟ ପ୍ରଭାବିତ ହେବାର ସମ୍ଭାବନା ରହିଛି।
