ଜୟପୁର,୧୩।୧: ରାଜସ୍ଥାନର ଜାଲୋର ଜିଲାରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଆହୋର ଥାନା ଅଞ୍ଚଳର ଗୋଦନ ଗାଁରେ ୨୧ ବର୍ଷୀୟ ସୁରେଶ କୁମାର ମେଘୱାଲ ୨୯ ନଭେମ୍ବର ୨୦୨୫ରେ ଘରେ ପଙ୍ଖାରେ ଫାଶୀ ଲଗାଇ ଆତ୍ମହତ୍ୟା କରିଥିଲେ। ପ୍ରାରମ୍ଭିକ ତଦନ୍ତରେ ଏହାକୁ ଆତ୍ମହତ୍ୟା ଭାବରେ ମାନି ମାମଲାକୁ ବନ୍ଦ କରିଦିଆଯାଇଥିଲା। କିନ୍ତୁ ପ୍ରାୟ ଦେଢ଼ ମାସ (ଅର୍ଥାତ ଜାନୁଆରୀ ୨୦୨୬ରେ) ସୁରେଶଙ୍କ ବାପା ଦୂଦାରାମ ତାଙ୍କ କୋଠରୀର ଆଲମାରୀ ସଫା କରୁଥିବା ବେଳେ ଏକ ସୁଇସାଇଡ୍ ନୋଟ ପାଇଥିଲେ। ଯେଉଁଥିରୁ ସୁରେଶଙ୍କ ମୃତ୍ୟୁର ପ୍ରକୃତ କାରଣ ଜଣାପଡ଼ିଥିଲା।
ସୁଇସାଇଡ୍ ନୋଟ୍ରେ ସୁରେଶ ତାଙ୍କ ପ୍ରେମିକାଙ୍କୁ ସମ୍ବୋଧନ କରି ଭାବୁକ ଭାବରେ ‘କୋଇ ବାତ୍ ନେହିଁ ମେରି ଜାନ୍..ଅବ୍ ମେ’ ଅଲବିଦା କହ ରହାଁ ହୁଁ’ ଲେଖିଥିବା ଦେଖା ଯାଇଥିଲା। ସେ ତାଙ୍କ ପ୍ରେମିକାଙ୍କୁ ତାଙ୍କର ପ୍ରଥମ ଏବଂ ଶେଷ ପ୍ରେମ ବୋଲି ବର୍ଣ୍ଣନା କରିଥିଲେ। ସେ ଲେଖିଥିଲେ ଯେ ସେ ତାଙ୍କୁ ତାଙ୍କ ସ୍ତ୍ରୀ ବୋଲି ମାନୁଥିଲେ ଏବଂ ତାଙ୍କ ସହିତ ଭବିଷ୍ୟତର ସ୍ୱପ୍ନ ଦେଖିଥିଲେ। ନୋଟରେ ଏହା ମଧ୍ୟ ଉଲ୍ଲେଖ ଥିଲା ଯେ ସେ ତାଙ୍କ ସହ କଥା ନ ହେବାରୁ ସାରା ରାତି କାନ୍ଦିଥିଲେ। ଏହି ନୋଟ୍ ଦେଖି ସୁରେଶଙ୍କ ବାପା ଅତ୍ୟନ୍ତ ଆଶ୍ଚର୍ଯ୍ୟ ହୋଇଯାଇଥିଲେ। ତାଙ୍କ କହିବାନୁସାରେ ସୁରେଶ ଓ ତାଙ୍କ ପ୍ରେମିକା ସମ୍ପର୍କୀୟ ହୋଇଥିବାରୁ ଦୁଇ ପରିବାର ସମ୍ପର୍କକୁ ବିରୋଧ କରୁଥିଲେ। ହେଲେ ପ୍ରେମିକା ବାରମ୍ବାର ସୁରେଶଙ୍କୁ ମେସେଜ କରୁଥିଲେ। ସୁରେଶଙ୍କ ମା’ ମଧ୍ୟ ସେହି ଯୁବତୀଙ୍କ ଘରକୁ ଯାଇ ବାରମ୍ବାର ଯୋଗାଯୋଗ ନ କରିବାକୁ ବୁଝାଇସାରିଥିଲେ।
ସୁରେଶ ଆତ୍ମହତ୍ୟା କରିବାର ଗୋଟିଏ ଦିନ ଆଗରୁ ପ୍ରେମିକା ସୁରେଶଙ୍କୁ ବିଷ ବୋତଲର ଫଟୋ ପଠାଇ ମେସେଜ ଲେଖିଥିଲେ‘ବାୟ ବାୟ ଡିକୁ, ଖୁଶ ରେହନା। ମୈ ବହୁତ ପରେଶାନ କରତୀ ହୁଁ ନା। ଅବ ତୁମ୍କୋ ଜୋ ଠିକ ଲଗେ, ବୋ କର ଲେନା। ଜବ ମୈ ହି ନହିଁ ରହୁଙ୍ଗି ତୋ….’। ଏହି ମେସେଜ ଦେଖି ସୁରେଶ ଭାବିଥିଲେ ଯେ ତାଙ୍କ ପ୍ରେମିକା ବିଷ ଖାଇ ଆତ୍ମହତ୍ୟା କରିବାକୁ ଯାଉଛନ୍ତି। ଫଳରେ ସେ ନିଜେ ଫାଶୀ ଲଗାଇ ଜୀବନ ତ୍ୟାଗ କରିଦେଲେ।
ସୁରେଶଙ୍କ ବାପା ଏବେ ଆତ୍ମହତ୍ୟା ପାଇଁ ଉକସାଇବା (abetment to suicide) ଅଭିଯୋଗରେ ପ୍ରେମିକାଙ୍କ ବିରୋଧରେ FIR ରୁଜୁ କରାଇଛନ୍ତି। ପୋଲିସ ସୁସାଇଡ ନୋଟ୍, ମୋବାଇଲ ଚାଟ୍ ଓ ହ୍ୟାଣ୍ଡ୍ରାଇଟିଂ ପରୀକ୍ଷା କରୁଛି। ଏହି ଘଟଣାରୁ ପ୍ରେମ ସମ୍ପର୍କ, ପାରିବାରିକ ବିରୋଧ ଯୋଗୁ ମାନସିକ ଚାପରେ ପଡ଼ି ଯୁବକ-ଯୁବତୀ କେତେ ଶୀଘ୍ର ନିଜର ଜୀବନ ନେଇ ନେବାର ନିଷ୍ପତ୍ତି ନେଇ ଯାଆନ୍ତି ତାହା ଚର୍ଚ୍ଚାରେ ରହିଛି।
