ସିଙ୍ଗାପୁର,୯।୧୦- ଭାରତ ଓ ସିଙ୍ଗାପୁର ମଧ୍ୟରେ ଗୁରୁବାର ଖେଳାଯାଇଥିବା ଏଏଫ୍ସି ଏସିଆନ କପ୍ କ୍ୱାଲିଫାଇଙ୍ଗ ଗ୍ରୁପ୍ ସି’ ମ୍ୟାଚ୍ ୧-୧ ଗୋଲରେ ଡ୍ର’ ରହିଛି। ମ୍ୟାଚ୍ଟି ଡ୍ର’ ଭାବେ ଶେଷ ହୋଇଥିବାରୁ ୨୦୨୭ ଏଏଫ୍ସି ଏସିଆନ କପ୍ ମୁଖ୍ୟ ଇଭେଣ୍ଟ ଲାଗି ଭାରତର ଯୋଗ୍ୟତା ହାସଲ କରିବାର ଆଶା ଉଜ୍ଜୀବିତ ରହିଛି।
ଏହି ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ମ୍ୟାଚ୍ର ପ୍ରଥମାର୍ଦ୍ଧ ପ୍ରାୟତଃ ଗୋଲ ଶୂନ୍ୟ ରହିଥିଲା। ପ୍ରଥମାର୍ଦ୍ଧର ଇଞ୍ଜୁରି ଟାଇମରେ ସିଙ୍ଗାପୁର ଲାଗି ଇଖସାନ ଫାଣ୍ଡି (୪୫+୧) ଗୋଲ ସ୍କୋର କରିଥିଲେ। ଦ୍ୱିତୀୟାର୍ଦ୍ଧର ୪୭ତମ ମିନିଟ୍ରେ ଭାରତୀୟ ଦଳର ମୁଖ୍ୟ ଡିଫେଣ୍ଡର ସନ୍ଦେଶ ଝିଙ୍ଗାନଙ୍କୁ ଦ୍ୱିତୀୟ ୟେଲୋ କାର୍ଡ ଦିଆଯାଇଥିଲା।
ଫଳରେ ୧୦ ଖେଳାଳିଙ୍କ ସହ ଭାରତୀୟ ଦଳକୁ ପ୍ରାୟ ଦ୍ୱିତୀୟାର୍ଦ୍ଧ ଖେଳିବାକୁ ପଡ଼ିଥିଲା। କିନ୍ତୁ ୯୦ତମ ମିନିଟ୍ରେ ସିଙ୍ଗାପୁର ଦଳର ଜୋର୍ଡାନ ଏମାଭିଓ୍ବେ ଏକ ସାଙ୍ଘାତିକ ତ୍ରୁଟି କରିଥିଲେ, ଯାହାର ଫାଇଦା ଉଠାଇ ଭାରତର ରହିମ ଅଲୀ ଗୋଲ ସ୍କୋର କରି ମ୍ୟାଚ୍କୁ ବରାବର କରିଥିଲେ। ମ୍ୟାଚ୍ ଡ୍ର’ ହେବାରୁ ଭାରତ ୧ ପଏଣ୍ଟ ପାଇଛି। ଏବେ ୪ ଦଳ ବିଶିଷ୍ଟ ଗ୍ରୁପ୍ ସି’ରେ ଭାରତ ୩ ମ୍ୟାଚ୍ରେ ୨ ପଏଣ୍ଟ ଓହ ଚତୁର୍ଥ ସ୍ଥାନରେ ରହିଛି। ଏସିଆନ୍ କପର ମୁଖ୍ୟ ଇଭେଣ୍ଟ ଲାଗି ଯୋଗ୍ୟତା ହାସଲ କରିବା ପାଇଁ ଭାରତକୁ ଗ୍ରୁପ୍ରେ ଶୀର୍ଷ ସ୍ଥାନ ଅଧିକାର କରିବାକୁ ପଡ଼ିବ। ବର୍ତ୍ତମାନ ସିଙ୍ଗାପୁର ୩ ମ୍ୟାଚ୍ରେ ୫ ପଏଣ୍ଟ ସହ ଶୀର୍ଷରେ ରହିଛି। ଦୁଇ ଦଳ ଆସନ୍ତା ୧୪ ତାରିଖରେ ଗୋଆର ମାର୍ଗାଓଠାରେ ପୁଣି ଥରେ ପରସ୍ପରକୁ ଭେଟିବେ।
Dharitri – Odisha’s No.1 Odia Daily
