ବେଙ୍ଗାଲୁରୁ,୨୫ା୮: ଜାତୀୟ କ୍ୟାମ୍ପରେ ଟପ୍ ଖେଳାଳିଙ୍କ ଅନୁପସ୍ଥିତି ସତ୍ତ୍ୱେ ଭାରତୀୟ ଫୁଟବଲ ଦଳ ଆଗାମୀ କାଫା ନେଶନ୍ସ କପ୍ ଲାଗି ପ୍ରସ୍ତୁତ ଥିବା ନୂଆ ମୁଖ୍ୟ କୋଚ୍ ଖାଲିଦ ଜମିଲ ସୋମବାର କହିଛନ୍ତି। ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଚାମ୍ପିୟନ ମୋହନ ବାଗାନ ସୁପର ଜାଏଣ୍ଟ କ୍ୟାମ୍ପ ଲାଗି ୭ ଖେଳାଳିଙ୍କୁ ଛାଡ଼ିବାକୁ ମନା କରି ଦେଇଛି। ଆଇଗର ଷ୍ଟିମାକଙ୍କଠାରୁ ଦାୟିତ୍ୱ ସମ୍ଭାଳିଥିବା ଜମିଲଙ୍କ ନେତୃତ୍ୱରେ କ୍ୟାମ୍ପରେ ୨୯ ଖେଳାଳି ଟ୍ରେନିଂ ନେଉଛନ୍ତି।
କ୍ଲବ କିଛି କାରଣରୁ ଖେଳାଳିଙ୍କୁ ଛାଡ଼ୁ ନାହାନ୍ତି। ଏଣୁ ଉପଲବ୍ଧ ଥିବା ଖେଳାଳିଙ୍କ ସହ କାମ କରିବାକୁ ପଡ଼ିବ। ଏହା ମୋ ପାଇଁ ଏକ ବଡ଼ ଚ୍ୟାଲେଞ୍ଜ। ଖେଳାଳିମାନେ ବି ମୋ ସହ ଅଛନ୍ତି। ମୋତେ ସେମାନଙ୍କ ସହ କାମ କରିବାରେ କୌଣସି ଅସୁବିଧା ହେଉ ନାହିଁ। ଏଣୁ ବର୍ତ୍ତମାନ ଆମର ଶ୍ରେଷ୍ଠ ପ୍ରଦର୍ଶନ କରିବାର ସମୟ। କିଛି ଖେଳାଳି ଉପଲବ୍ଧ ନାହାନ୍ତି। ଯେଉଁମାନେ ଫିଟ୍ ଅଛନ୍ତି, ସେମାନଙ୍କୁ ଚୟନ କରୁଛୁ।
ବର୍ତ୍ତମାନ କେବଳ ଟୁର୍ନାମେଣ୍ଟ ସମ୍ପର୍କରେ ଚିନ୍ତା କରାଯାଉଛି। ଖେଳାଳିଙ୍କୁ ମାନସିକ ସ୍ତରରେ ଦୃଢ଼ ହେବାକୁ ପଡ଼ିବ। ନିଜ ଉପରେ ବିଶ୍ୱାସ ରଖି ଖେଳିବାକୁ ପଡ଼ିବ। ଦଳରେ ଏବେ ବି ସନ୍ଦେଶ ଝିଙ୍ଗହାନ, ଗୁରପ୍ରୀତ ସାନ୍ଧୁ, ଅନଓ୍ବର ଅଲୀଙ୍କ ଭଳି ଖଳାଳି ଅଛନ୍ତି। ଭଲ ନୂଆ ଖେଳାଳି ବି ଅଛନ୍ତି। କ୍ୟାମ୍ପରେ ଆମ ଦଳ ଦୁର୍ବଳ ବୋଲି ମୁଁ କଦାପି ଅନୁଭବ କରୁନାହିଁ। ଦଳ ପ୍ରସ୍ତୁତ ଅଛି। ଟୁର୍ନାମେଣ୍ଟ ଆମକୁ ପରବର୍ତ୍ତୀ ୩ ମ୍ୟାଚ୍ ଲାଗି ଉପଯୁକ୍ତ ପ୍ରସ୍ତୁତି ଯୋଗାଇବ ବୋଲି ଖବରଦାତା ସମ୍ମିଳନୀରେ ମୁଖ୍ୟକୋଚ୍ କହିଛନ୍ତି।
