ଗୋଆ,୧୧।୨(ପି.ଟି.): ଚଳିତ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ଓଡ଼ିଶା ଏଫ୍ସିର ପ୍ଲେ- ଅଫ୍ ଆଶା ଏକପ୍ରକାର ଶେଷ ହୋଇଛି। ଗୁରୁବାର ସ୍ଥାନୀୟ ଫାଟୋର୍ଡା ଷ୍ଟାଡିୟମରେ ଓଡ଼ିଶା ତା’ର ପରବର୍ତ୍ତୀ ମ୍ୟାଚ୍ରେ କେରଳ ବ୍ଲାଷ୍ଟର୍ସକୁ ଭେଟିବ। ପ୍ଲେ- ଅଫ୍ ଦୌଡ଼ରୁ ବାଦ୍ ପଡିସାରିଥିବା ଓଡ଼ିଶା ସମ୍ମାନ ପାଇଁ ଖେଳିବ। ଲିଗ୍ରେ ଓଡ଼ିଶା ଏ ପର୍ଯ୍ୟନ୍ତ ୧୫ଟି ମ୍ୟାଚ୍ ଖେଳି ଗୋଟିଏ ବିଜୟ, ୫ ଡ୍ର ଓ ୯ ପରାଜୟ ସହ ୮ ପଏଣ୍ଟ ପାଇ ତାଲିକାର ନିମ୍ନତମ ତଥା ୧୧ତମ ସ୍ଥାନରେ ରହିଛି। ସେହିପରି କେରଳ ୧୬ଟି ମ୍ୟାଚ୍ ଖେଳି ୩ ବିଜୟ, ୬ ଡ୍ର ଓ ୭ ପରାଜୟ ସହ ୧୫ ପଏଣ୍ଟ ପାଇ ୧୦ମ ସ୍ଥାନରେ ରହିଛି। ଲିଗ୍ରେ ଓଡ଼ିଶା କେବଳ କେରଳକୁ ହରାଇଛି। ଏ ପର୍ଯ୍ୟନ୍ତ ଦୁଇ ଦଳ ୩ଥର ପରସ୍ପରକୁ ଭେଟିଛନ୍ତି। ତେବେ କେରଳ କେବେ ବି ଓଡ଼ିଶାକୁ ହରାଇ ପାରିନାହିଁ। ଏହି ମ୍ୟାଚ୍ରେ କେରଳ ଓଡ଼ିଶାଠାରୁ ପରାସ୍ତ ହେଲେ ତା’ର ପ୍ଲେ- ଅଫ୍ ଆଶା ଶେଷ ହେବ। ଓଡ଼ିଶା ଭଲ ପ୍ରଦର୍ଶନ କରିବ ବୋଲି କୋଚ୍ ଗେରାଲ୍ଡ ପେଟୋନ କହିଛନ୍ତି।
ଓଡ଼ିଶା ଭଳି କେରଳ ମଧ୍ୟ ଏଥର ଲିଗ୍ରେ ସଂଘର୍ଷ କରୁଛି। ଗତ ୪ଟି ମ୍ୟାଚ୍ରେ କେରଳ ବିଜୟୀ ହୋଇପାରିନାହିଁ। ସିଜନରେ କେରଳ ସର୍ବାଧିକ ୨୭ଟି ଗୋଲ ବରଣ କରିଛି। ଓଡ଼ିଶା ମଧ୍ୟ ଏ ପର୍ଯ୍ୟନ୍ତ ୨୭ଟି ଗୋଲ ବରଣ କରିଛି। ଦୁଇ ଦଳର ଡିଫେନ୍ସ ଦୁର୍ବଳ ଥିବା ସ୍ପଷ୍ଟ ଜଣାପଡୁଛି। ଅବଶ୍ୟ ଗତ କେତୋଟି ମ୍ୟାଚ୍ରେ କେରଳ ଉତ୍ସାହଜନକ ପ୍ରଦର୍ଶନ କରିଛି। କିନ୍ତୁ ଏହାର ଫାଇଦା ଉଠାଇପାରି ନାହିଁ। ଗତ ଏଟିକେ ମୋହନ ବାଗାନ ଓ ମୁମ୍ବାଇ ସିଟି ଏଫ୍ସି ମ୍ୟାଚ୍ରେ କେରଳ ପ୍ରାରମ୍ଭିକ ଗୋଲ ସ୍କୋର କରିଥିଲେ ମଧ୍ୟ ପରାସ୍ତ ହୋଇଥିଲା। କେରଳ ଏବେ ପ୍ଲେ- ଅଫ୍ରେ ପହଞ୍ଚିବା କଷ୍ଟକର ହୋଇପଡିଛି। ତେବେ କୋଚ୍ କିବୁ ଭିକୁନା ଆଶା ଛାଡିନାହାନ୍ତି। ବାକିଥିବା ୪ଟି ମ୍ୟାଚ୍ରୁ ୧୨ ପଏଣ୍ଟ ହାସଲ କରିବା ଆମର ମୂଳ ଲକ୍ଷ୍ୟ ରହିଛି। ତେବେ ପର୍ଯ୍ୟାୟକ୍ରମେ ଏହି ଲକ୍ଷ୍ୟ ହାସଲ କରିବୁ। ଓଡ଼ିଶା ବିପକ୍ଷରେ ବିଜୟୀ ହେବାର ସମ୍ଭାବନା ରହିଛି ଓ ଏଥିରେ ସଫଳ ହେବୁ ବୋଲି ସେ ଆଶାପ୍ରକାଶ କରିଛନ୍ତି।
