ବାମ୍ବୋଲିମ,୬।୨(ପି.ଟି.): ଚଳିତ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ଓଡ଼ିଶା ଏଫ୍ସି ଏବେ କର ବା ମର ସ୍ଥିତିର ସମ୍ମୁଖୀନ ହୋଇଛି। ହେଡ୍ କୋଚ୍ ଷ୍ଟୁଆର୍ଟ ବକ୍ସଟରଙ୍କୁ ବିବାଦୀୟ ଢଙ୍ଗରେ ବହିଷ୍କାର କରାଯିବା ପରେ ଇଡ଼ିଶା ପଏଣ୍ଟ ତାଲିକାର ସର୍ବନିମ୍ନ ସ୍ଥାନରେ ରହିଛି। ସ୍ଥାନୀୟ ଜିଏମ୍ସି ଷ୍ଟାଡିୟମରେ ଓଡ଼ିଶା ଶନିବାର ଏଟିକେ ମୋହନ ବାଗାନକୁ ଭେଟିବାକୁ ଯାଉଛି। ଏହି ମ୍ୟାଚ୍ରେ ଓଡ଼ିଶା ନିଶ୍ଚିତ ବିଜୟ ହାସଲ କରିବା ସ୍ଥିତିରେ ପଡିଛି।
ଚଳିତ ସେସନରେ ଓଡ଼ିଶା ଆଶାନୁରୂପ ପ୍ରଦର୍ଶନ କରି ନ ପାରି ସଂଘର୍ଷ କରୁଛି। ଏ ପର୍ଯ୍ୟନ୍ତ ଓଡ଼ିଶା ୧୪ ମ୍ୟାଚ୍ ଖେଳି ଗୋଟିଏ ବିଜୟ, ୫ ଡ୍ର ଓ ୮ ପରାଜୟ ସହ ୮ ପଏଣ୍ଟ ପାଇ ତାଲିକାର ୧୧ତମ ତଥା ସର୍ବନିମ୍ନ ସ୍ଥାନରେ ରହିଛି। ଓଡ଼ିଶା ୨୧ଟି ଗୋଲ ବରଣ କରିଛି। ଏହି ଲିଗ୍ ଦ୍ୱିତୀୟ ସର୍ବାଧିକ ଖରାପ ରେକର୍ଡ ସାବ୍ୟସ୍ତ ହୋଇଛି। ଗୋଟିଏ ଆତ୍ମଘାତୀ ଗୋଲକୁ ବାଦ୍ ଦେଲେ ଓଡ଼ିଶା ୧୧ଟି ଗୋଲ ସ୍କୋର କରିଛି ଓ ଏହା ଯୁଗ୍ମ ସର୍ବନିମ୍ନ ସାବ୍ୟସ୍ତ ହୋଇଛି।
ସୋମବାର ଜାମସେଦପୁର ଏଫ୍ସି ବିପକ୍ଷ ମ୍ୟାଚ୍ ପରେ ରେପ୍ ମନ୍ତବ୍ୟ ଦେଇ କୋଚ୍ ବକ୍ସଟର ବିଦା ହେବା ପରେ ଓଡ଼ିଶା ଉପରେ ଅତିରିକ୍ତ ଚାପ ବୃଦ୍ଧି ପାଇଛି। ଅନ୍ତରୀଣ କୋଚ୍ ଗେରାଲ୍ଡ ପେଟୋନଙ୍କ ତତ୍ତ୍ୱାବଧାନରେ ବାକିଥିବା ୬ଟି ମ୍ୟାଚ୍ରେ ଓଡ଼ିଶା ବିଜୟଧାରାକୁ ଫେରି କିଛି ଚମତ୍କାର ଆଶାରେ ରହିଛି। ଅନ୍ତିମ ମ୍ୟାଚ୍ଗୁଡିକରେ ଆମେ ସକାରାତ୍ମକ ମନୋଭାବ ନେଇ ପଡିଆକୁ ଓହ୍ଲାଇବୁ ଓ ଯେତେ ସମ୍ଭବ ଗୋଲ କରିବାକୁ ପ୍ରୟାସ କରିବୁ ବୋଲି ପେଟୋନ କହିଛନ୍ତି। ଗତ କେତୋଟି ମ୍ୟାଚ୍ରେ ଆମେ ଭଲ ପ୍ରଦର୍ଶନ କରିଛୁ ଓ ପ୍ରଭାବ ବିସ୍ତାର କରି ଖେଳିଛୁ। ତେବେ ଅଳ୍ପକେ ବିଜୟ ସୁଯୋଗ ହାତଛଡ଼ା କରିଛୁ। ଓଡ଼ିଶା ଅଧିନାୟକ ଷ୍ଟିଭେନ ଟେଲର ସସ୍ପେନସନରେ ରହିବେ କାରଣ ଓଡ଼ିଶା ନୂଆ କିଛି କରି ଦେଖାଇବା ଆଶାରେ ରହିଛି।
ଅପରପକ୍ଷରେ ଦ୍ୱିତୀୟ ସ୍ଥାନରେ ଥିବା ମୋହନବାଗାନ ଏହି ମ୍ୟାଚ୍ ଜିତି ଟେବୁଲ ଟପ୍ପର ମୁମ୍ବାଇ ସିଟି ଏଫ୍ସି ମଧ୍ୟରେ ଅନ୍ତର କମ କରିବାକୁ ପ୍ରୟାସ କରିବ। ବାଗାନ କୋଚ୍ ଆଣ୍ଟୋନିଓ ଲୋପେଜ ହାବାସ ଓଡ଼ିଶା ବିଜୟ ବ୍ୟଗ୍ର ଅଛି ବୋଲି ଅବଗତ ରହିଛନ୍ତି। ମୁମ୍ବାଇ ଭଳି ଓଡ଼ିଶାକୁ ମଧ୍ୟ ଆମେ ସମାନ ଗୁରୁତ୍ୱ ଦେଇ ଖେଳିବୁ ବୋଲି ସେ କହିଛନ୍ତି। ନୂଆ କୋଚ୍ଙ୍କ ତତ୍ତ୍ୱାବଧାନରେ ଓଡ଼ିଶା ନିଶ୍ଚିତ ଭାବେ ଭଲ ପ୍ରଦର୍ଶନ କରିବାକୁ ଚେଷ୍ଟା କରିବ। ତେଣୁ ମୁକାବିଲା ରୋମାଞ୍ଚକ ହେବ ବୋଲି ଆଶା କରାଯାଉଛି।
