ବାମ୍ବୋଲିନ୍,୩।୧: ଚଳିତ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ଶନିବାର ଖେଳଯାଇଥିବା ମ୍ୟାଚରେ ମୁମ୍ବାଇ ସିଟି ଏଫ୍ସି ୨-୦ ଗୋଲରେ କେରଳ ବ୍ଲାଷ୍ଟର୍ସକୁ ପରାସ୍ତ କରିଛି। ମୁମ୍ବାଇ ସମ୍ପୂର୍ଣ୍ଣ ପ୍ରଭାବ ବିସ୍ତାର କରି ଖେଳିବା ସହ କେରଳକୁ ଗୋଲ ସ୍କୋର କରିବାର ସୁଯୋଗ ଦେଇ ନ ଥିଲା। ଦଳ ତରଫରୁ ମ୍ୟାଚର ତୃତୀୟ ମିନିଟ୍ରେ ଇଂଲଣ୍ଡ ଷ୍ଟ୍ରାଇକର ଆଡାମ ଲେ’ ଫୋଣ୍ଡ୍ରେ ପେନାଲ୍ଟି ଜରିଆରେ ପ୍ରଥମ ଗୋଲ ସ୍କୋର କରି ଦଳକୁ ଅଗ୍ରଣୀ କରାଇଥିଲେ। ଏହାର ଠିକ୍ ୭ ମିନିଟ୍ ପରେ ଫ୍ରାନ୍ସ ମିଡ୍ଫିଲ୍ଡର ହୁଗୋ ବୋମସ ଏକ ସୁନ୍ଦର ଗୋଲ ସ୍କୋର କରି ମୁମ୍ବାଇକୁ ୨-୦ରେ ଅଗ୍ରଣୀ କରାଇଥିଲେ। ପାଖାପାଖି ୧୦ ମିନିଟ୍ରେ ଦୁଇଟି ଗୋଲ ସ୍କୋର କରି ମୁମ୍ବାଇ କେରଳକୁ ଜବରଦସ୍ତ ଝଟ୍କା ଦେଇଥିଲା। ଏହାପରେ ମ୍ୟାଚ ସାରା ସଂଘର୍ଷ ଦେଖିବାକୁ ମିଳିଥିଲା। ତେବେ କେରଳ ଗୋଲ ଦେବାକୁ ସକ୍ଷମ ହୋଇପାରି ନ ଥିଲା। ବଲ ପଜେଶନ, ପାସ, ପାସ୍ ଆକ୍ୟୁରେସିରେ ମୁମ୍ବାଇ ଦୁଇପାଦ ଆଗରେ ରହିଥିଲା। ଇଞ୍ଜୁରି ଟାଇମ ବାବଦରେ ୮ ମିନିଟ୍ ଖେଳ ହୋଇଥିଲା। ପ୍ରାରମ୍ଭିକ ତ୍ରୁଟିକୁ କେରଳ ପରେ ସୁଧାରିବାରେ ସକ୍ଷମ ହୋଇପାରି ନ ଥିଲା। ମ୍ୟାଚରେ ଉଭୟ ଦଳ ଏକାଧିକ ସୁଯୋଗ ହାସଲ କରିଥିଲେ ମଧ୍ୟ ପରେ ଗୋଲ ଦେଇପାରି ନ ଥିଲେ।
ଏଥିସହିତ ମୁମ୍ବାଇ ଏପର୍ଯ୍ୟନ୍ତ ୮ଟି ମ୍ୟାଚ ଖେଳି ୬ ବିଜୟ, ଗୋଟିଏ ଲେଖାଏ ଡ୍ର ଓ ପରାଜୟ ସହ ୧୯ ପଏଣ୍ଟ ହାସଲ କରି ତାଲିକାରେ ତା’ର ଶୀର୍ଷ ସ୍ଥାନକୁ ଆହୁରି ମଜଭୁତ କରିଛି। ଅନ୍ୟପଟେ କେରଳ ୮ଟି ମ୍ୟାଚ ଖେଳି ଗୋଟିଏ ବିଜୟ, ୩ ଡ୍ର ଓ ୪ ପରାଜୟ ସହ ୬ ପଏଣ୍ଟ ହାସଲ କରି ତାଲିକାର ନବମ ସ୍ଥାନରେ ରହିଛି।
