ମସ୍କୋ/କ୍ୱିଭ୍,୩।୩ : ଭାରତୀୟ ଛାତ୍ରଙ୍କୁ ୟୁକ୍ରେନ୍ ବନ୍ଧକ ରଖିଛି। ଏଭଳି ଅଭିଯୋଗ ରୁଷିଆ କରିଛି। ତେବେ ଏହାକୁ ଆମେରିକା ପକ୍ଷରୁ ଖଣ୍ଡନ କରାଯାଇଛି।ଯୁଦ୍ଧ ସମୟରେ ଏହା ରୁଷିଆର ଏକ ପ୍ରକାର ମିଥ୍ୟା ପ୍ରଚାର ବୋଲି ଆମେରିକା କହିଛି। ରୁଷିଆର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ୟୁକ୍ରେନ ସହର ଖାର୍କିଭରୁ ଭାରତୀୟ ନାଗରିକମାନଙ୍କୁ ସୁରକ୍ଷିତ ସ୍ଥାନାନ୍ତର ପାଇଁ ଏହାର ସଶସ୍ତ୍ର ବାହିନୀ ସମସ୍ତ ଆବଶ୍ୟକୀୟ ପଦକ୍ଷେପ ନେବାକୁ ପ୍ରସ୍ତୁତ ଅଛନ୍ତି। ମସ୍କୋରେ ଏକ ଗଣମାଧ୍ୟମରେ ସୂଚନା ଦେଇ ପ୍ରତିରକ୍ଷା ମନ୍ତ୍ରଣାଳୟ ଏହା ମଧ୍ୟ ଅଭିଯୋଗ କରିଛି ଯେ ବେଲଗୋରୋଡ ଯିବାକୁ ଇଚ୍ଛା ବିରୁଦ୍ଧରେ ୟୁକ୍ରେନ କର୍ତ୍ତୃପକ୍ଷ ଖାର୍କିଭରେ ଭାରତୀୟ ଛାତ୍ରଙ୍କୁ ବାଧ୍ୟ କରୁଛନ୍ତି।
ଭାରତରେ ଥିବା ରୁଷିଆର ଦୂତାବାସ ଦାବି କରିଛି ଯେ ଛାତ୍ରମାନଙ୍କୁ ୟୁକ୍ରେନ ସୁରକ୍ଷା ବାହିନୀ ଦ୍ୱାରା ବନ୍ଧକ କରାଯାଇଛି। ଦୂତାବାସ ଟୁଇଟ କରି କହିଛି ଯେ ସର୍ବଶେଷ ସୂଚନା ଅନୁଯାୟୀ ଏହି ଛାତ୍ରମାନେ ପ୍ରକୃତରେ ୟୁକ୍ରେନ ସୁରକ୍ଷା ବାହିନୀ ଦ୍ୱାରା ବନ୍ଧକ ରହିଛନ୍ତି।
ଭାରତୀୟମାନଙ୍କୁ ୟୁକ୍ରେନ୍ ବନ୍ଧକ ରଖିଥିବା ରୁଷିଆ ସରକାରଙ୍କ ବିବୃତ୍ତି ଉପରେ ଆମେରିକା ମଧ୍ୟ ପ୍ରତିକ୍ରିୟା ରଖିଛି। ଆମେରିକାର ବୈଦେଶିକ ବିଭାଗର ମୁଖପାତ୍ର ନେଡ୍ ପ୍ରାଇସ୍ କହିଛନ୍ତି ଯେ ସାଧାରଣ ନାଗରିକଙ୍କୁ ମାନବ ଢାଲ ଭାବରେ ବ୍ୟବହାର କରାଯାଉଥିବା ଖବର ମିଥ୍ୟା। ଏହା ହେଉଛି ରୁଷିଆର ମିଥ୍ୟା ପ୍ରଚାର।
ରୁଷିଆ ରାଷ୍ଟ୍ରପତି ବ୍ଲାଡିମୀର ପୁଟିନ ଭାରତର ପ୍ରଧାନମନ୍ତ୍ରୀ ମୋଦିଙ୍କୁ କହିଛନ୍ତି ଯେ ଭାରତୀୟ ଛାତ୍ରମାନଙ୍କୁ ଯୁଦ୍ଧ ଜୋନରୁ ବାହାର କରି ସେମାନଙ୍କୁ ଭାରତ ପଠାଇବା ପାଇଁ ସମସ୍ତ ଆବଶ୍ୟକୀୟ ନିର୍ଦ୍ଦେଶ ଦିଆଯାଇଛି। ଏହି ଦିଗରେ ରୁଷିଆର ସେନା ସମସ୍ତ ପ୍ରକାର ଉଦ୍ୟମ କରୁଛି। ଭାରତୀୟ ଛାତ୍ରମାନଙ୍କୁ ତୁରନ୍ତ ଉଦ୍ଧାର କରିବା ପାଇଁ ରୁଷିଆ ସୈନ୍ୟ ଖାର୍କିଭରୁ ରୁଷିଆ ପର୍ଯ୍ୟନ୍ତ ଏକ ସୁରକ୍ଷିତ କରିଡୋର ନିର୍ମାଣ ଉପରେ ମଧ୍ୟ କାର୍ଯ୍ୟ କରୁଛନ୍ତି।
ରୁଷିଆର ଏହି ଅଭିଯୋଗକୁ ୟୁକ୍ରେନ ପ୍ରତ୍ୟାଖ୍ୟାନ କରିଛି। ଟୁଇଟରରେ ୟୁକ୍ରେନର ବୈଦେଶିକ ବ୍ୟାପାର ମନ୍ତ୍ରଣାଳୟ ଏକ ବିବୃତ୍ତି ଜାରି କରି କହିଛି ଯେ ଆମେ ଭାରତ, ପାକିସ୍ଥାନ, ଚାଇନା ଏବଂ ଅନ୍ୟାନ୍ୟ ଦେଶ ସରକାରଙ୍କୁ ୟୁକ୍ରେନର ଅନ୍ୟ ସହରକୁ ଯିବା ପାଇଁ ସୁରକ୍ଷିତ କରିଡର ପାଇଁ ପ୍ରୟାସ ଜାରି ରଖିଛୁ।
ରୁଷିଆର ଏହି ଅଭିଯୋଗ ଏବଂ ୟୁକ୍ରେନ ପୋଲିସଙ୍କର ଭାରତୀୟଙ୍କ ସହ ଅସଦାଚରଣର ଭିଡିଓ ପରେ, ୟୁକ୍ରେନ୍ର ଏହି ଆଚରଣ ଭାରତ ଜାତିସଂଘରେ ଭୋଟ ନ ଦେଇଥିବାରୁ କରାଯାଉଥିବା ଆଲୋଚନା ହେଉଛି। ତେବେ ଅସନ୍ତୋଷରୁ ଏହା କରାଯାଉନାହିଁ ବୋଲି ୟୁକ୍ରେନ କହିଛି।
