ନୂଆଦିଲ୍ଲୀ, ୭।୪ : ଭାରତୀୟ ପାଓ୍ବାର ଗ୍ରୀଡ୍କୁ ଚାଇନା ହ୍ୟାକର ଟାର୍ଗେଟ କରିଛନ୍ତି। ଏସମ୍ପର୍କରେ ଏକ ରିପୋର୍ଟ ପ୍ରକାଶିତ ହୋଇଛି। ଦେଶର ୭ଟି ପାଓ୍ବାର ଗ୍ରୀଡ୍ ଉପରେ ଚାଇନା ହ୍ୟାକରମାନେ ତୀକ୍ଷ୍ଣ ନଜର ରଖିଛନ୍ତି। ଏସବୁ ଗ୍ରୀଡ୍ ଗୁଡ଼ିକ ଭାରତ ଚାଇନା ସୀମାର ବିବାଦୀୟ ଅଞ୍ଚଳରେ ଲଦାଖଠାରେ ରହିଛି ବୋଲି ଘରୋଇ ଇଣ୍ଟେଲଜେନ୍ସ ଫାର୍ମ ରେକର୍ଡେଡ୍ ଫ୍ୟୁଚର ପକ୍ଷରୁ କୁହାଯାଇଛି।
ଟିଏଜି-୩୮ ନାମକ ଏହି ହ୍ୟାକିଂ ଗ୍ରୁପ ଶ୍ୟାଡପ୍ୟାଡ ନାମକ ଏକ ପ୍ରକାର ଭାଇରସ୍ ସଫ୍ଟୱେର୍ ବ୍ୟବହାର କରିଛି। ଏହା ପୂର୍ବରୁ ଚାଇନାର ପିପୁଲ୍ସ ଲିବରେଶନ ଆର୍ମି ଏବଂ ସୁରକ୍ଷା ମନ୍ତ୍ରଣାଳୟ ସହିତ ଜଡିତ ଥିଲା । ତେବେ ହ୍ୟାକରମାନଙ୍କୁ ଚିହ୍ନଟ କରାଯାଇ ପାରି ନାହିଁ।
ରେକର୍ଡେଡ୍ ଫ୍ୟୁଚରର ବରିଷ୍ଠ ପରିଚାଳକ ଜୋନାଥନ କଣ୍ଡ୍ରା କହିଛନ୍ତି ଯେ ସାଇବର ଆକ୍ରମଣକାରୀମାନେ ଅନୁପ୍ରବେଶ କରିବା ପାଇଁ ବ୍ୟବହାର କରୁଥିବା ପଦ୍ଧତି, ଉପକରଣ ଏବଂ କ୍ୟାମେରା ବିଶେଷ ଧରଣର। ଡାଟାବେସ୍ରେ ଅନୁପ୍ରବେଶ କରିବା ପାଇଁ ବ୍ୟବହୃତ ଉପକରଣଗୁଡ଼ିକ ଦକ୍ଷିଣ କୋରିଆ ଏବଂ ତାଇୱାନରେ ବିକଶିତ ହୋଇଥିବା ସେ କହିଛନ୍ତି।
ଚାଇନା ବୈଦେଶିକ ବ୍ୟାପାର ମନ୍ତ୍ରଣାଳୟ ଏନେଇ କୌଣସି ଉତ୍ତର ଦେଇ ନାହିଁ। ସାଇବର ହ୍ୟାକିଂ କାର୍ଯ୍ୟକଳାପରେ ଚାଇନାର ସମ୍ପୃକ୍ତି ନଥିବା ଚାଇନା ବାରମ୍ବାର ଅସୱୀକାର କରୁଛି। ଚାଇନାର ଏଭଳି ମତାମତ ନେଇ ଭାରତୀୟ କର୍ତ୍ତୃପକ୍ଷ ମଧ୍ୟ କୌଣସି ପ୍ରତିକ୍ରିୟା ଦେଇନାହାଁନ୍ତି।
