ଅଜମେର, ୨୯।୬ : ରାଜସ୍ଥାନର ଉଦୟପୁରରେ ଜଣେ ଟେଲରଙ୍କ ହତ୍ୟା ଘଟଣାକୁ ନିନ୍ଦା କରି ଅଜମେର ଦରଗାହ ଦିୱାନ ଜୈନୁଲ ଆବେଦିନ ଅଲି ଖାନ କହିଛନ୍ତି ଯେ ଭାରତୀୟ ମୁସଲମାନମାନେ ଦେଶରେ ତାଲିବାନ ମାନସିକତାକୁ କଦାପି ଗ୍ରହଣ କରିବେ ନାହିଁ।
ଉଦୟପୁରରେ, ଜୁନ ୨୮ରେ ଦୁଇଜଣ ବ୍ୟକ୍ତି ତୀକ୍ଷ୍ ଣ ଅସ୍ତ୍ରରେ ଜଣେ ଟେଲରକୁ ହତ୍ୟା କରି ଇସଲାମ ପ୍ରତି ଅପମାନର ପ୍ରତିଶୋଧ ନେଉଥିବାର ଭିଡିଓକୁ ସାର୍ବଜନୀନ କରିଥିଲେ।
ଅଜମେର ସରିଫ ଦରଗାହଙ୍କର ଦିୱାନ ଖାନ ଏକ ବିବୃତ୍ତିରେ କହିଛନ୍ତି ଯେ କୌଣସି ଧର୍ମ ମାନବିକତା ବିରୁଦ୍ଧରେ ହିଂସାକୁ ଉତ୍ସାହିତ କରେ ନାହିଁ। ବିଶେଷ କରି ଇସଲାମରେ, ସମସ୍ତ ଶିକ୍ଷା ଶାନ୍ତିର ଉତ୍ସ ଭାବରେ କାର୍ଯ୍ୟ କରିଥାଏ। ଖାନ କହିଛନ୍ତି ଯେ ଅଭିଯୁକ୍ତମାନେ ହିଂସା ମାଧ୍ୟମରେ ସମାଧାନ ଚାହୁଁଥିବା କେତେକ ମୌଳବାଦୀ ଗୋଷ୍ଠୀର ସଦସ୍ୟ ବୋଲି ସେ କହିଛନ୍ତି।
ଜାମିଆ ଉଲେମା-ଇ-ହିନ୍ଦର ସାଧାରଣ ସମ୍ପାଦକ ମୌଲାନା ହାକିମୁଦ୍ଦିନ କାସମି ମଧ୍ୟ ଏହି ହତ୍ୟାକାଣ୍ଡକୁ ନିନ୍ଦା କରିଛନ୍ତି। ସେ ଏକ ବିବୃତ୍ତିରେ କହିଛନ୍ତି ଯେ ଯିଏ ଏହି ଘୃଣ୍ୟ ଘଟଣା ଘଟାଇଛନ୍ତି ତାଙ୍କୁ କେବେ ମଧ୍ୟ କ୍ଷମା କରାଯାଇ ପାରିବ ନାହିଁ। ଏହା ଦେଶର ଆଇନ ତଥା ଇସଲାମ ଧର୍ମର ବିରୋଧୀ। ଦେଶରେ ଆଇନର ବ୍ୟବସ୍ଥା ରହିଛି। କାହାକୁ ଆଇନକୁ ନିଜ ହାତକୁ ନେବାର ଅଧିକାର ନାହିଁ। ମୌଲାନା ହାକିମୁଦ୍ଦିନ କାସମି ଦେଶର ସମସ୍ତ ନାଗରିକଙ୍କୁ ସେମାନଙ୍କ ଭାବନାକୁ ନିୟନ୍ତ୍ରଣ କରିବାକୁ ଏବଂ ଦେଶରେ ଆଇନ ଶୃଙ୍ଖଳା ରକ୍ଷା କରିବାରେ ସେମାନଙ୍କର ଭୂମିକା ଗ୍ରହଣ କରିବାକୁ ନିବେଦନ କରିଛନ୍ତି।
ସୂଚନାଯୋଗ୍ୟ, ରାଜସ୍ଥାନର ଉଦୟପୁରର ଧନମାଣ୍ଡି ପୋଲିସ ଷ୍ଟେସନରେ ମଙ୍ଗଳବାର ଟେଲର କହ୍ନେୟାଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଥିଲା। ଉଭୟ ଅଭିଯୁକ୍ତଙ୍କୁ ପୋଲିସ ଗିରଫ କରିଛି।
