ଲିଡ୍ସ,୨୫।୮ : ପ୍ରଥମେ ତାରକା ଖଚ୍ଚିତ ବ୍ୟାଟିଂ ଲାଇନ୍ଅପ୍ ଫେଲ୍ ହେବାରୁ ଟିମ୍ ଇଣ୍ଡିଆ ମାତ୍ର ୭୮ ରନ୍ରେ ଅଲଆଉଟ୍ ହୋଇଯାଇଥିଲା। ତା’ ପରେ ଦିନ ତମାମ ପ୍ରୟାସ କରିଥିଲେ ମଧ୍ୟ ବୋଲରଙ୍କୁ ଗୋଟିଏ ହେଲେ ଉଇକେଟ ମିଳି ନାହିଁ। ଫଳରେ ତୃତୀୟ ଟେଷ୍ଟର ପ୍ରଥମ ଦିନ ସୁଦ୍ଧା ଇଂଲଣ୍ଡ ବିନା କ୍ଷତିରେ ୧୨୦ ରନ୍ କରିଛି। ଏଥିସହିତ ପ୍ରଥମ ଇନିଂସରେ ୪୨ ରନ୍ର ଅଗ୍ରଣୀ ହାସଲ କରିଛି ଘରୋଇ ଦଳ।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳକୁ ଆରମ୍ଭରୁ ୩ ଝଟ୍କା ଦେଇଥିଲେ ଇଂଲଣ୍ଡର ଅଭିଜ୍ଞ ପେସର ଜେମ୍ସ ଆଣ୍ଡରସନ। ଐତିହାସିକ ଲଡର୍ସ ଟେଷ୍ଟରେ ଶତକ ହାସଲ କରିଥିବା ରାହୁଲ ଖାତା ଖୋଲି ପାରି ନ ଥିଲେ। ପୂଜାରା ୧ ଓ ୭ ରନ୍ କରି ଆଉଟ୍ ହୋଇଥିଲେ ଅଧିନାୟକ କୋହଲି। ଏହାପରେ ସ୍ଥିତି ସମ୍ଭାଳିବାକୁ ଚେଷ୍ଟା କରିଥିଲେ ରୋହିତ ଓ ରାହାନେଙ୍କ ଯୋଡ଼ି। କିନ୍ତୁ କିଛି ଖାସ କରି ପାରି ନ ଥିଲେ ଦୁହେଁ। ରାହାନେ (୧୮)ଙ୍କ ପଛେ ପଛେ ଦଳର ସମସ୍ତ ବ୍ୟାଟ୍ସମ୍ୟାନ ପ୍ୟାଭିଲିୟନ ଫେରି ଯାଇଥିଲେ। କ୍ରିଜ୍ରେ ଦୀର୍ଘ ସମୟ ଧରି ଛିଡ଼ା ହୋଇଥିବା ରୋହିତ (୧୯) ମଧ୍ୟ ଫେଲ୍ ମାରିବାରୁ ଟିମ୍ ଇଣ୍ଡିଆ ୭୮ ରନ୍ରେ ସୀମିତ ରହିଛି। ଆଣ୍ଡରସନ ଏବଂ କ୍ରେଗ ଓଭରଟନ ୩ ଉଇକେଟ ନେଇଥିବାବେଳେ ଓଲି ରବିନସନ ଓ ସାମ କୁରାନ ୨ ଲେଖାଏ ସଫଳତା ହାତେଇଥିଲେ। ଏହାପରେ ଇଂଲଣ୍ଡ ପାଇଁ ରୋରି ବନର୍ସ ଓ ହାସିଦ ହମିଦଙ୍କ ଓପନିଂ ଯୋଡ଼ି ଭାରତୀୟ ପେସରଙ୍କ ଉଚିତ ମୁକାବିଲା କରିଥିଲେ। ଦୁହେଁ ଦିନ ଶେଷ ପର୍ଯ୍ୟନ୍ତ ପିଚ୍ରେ ଛିଡ଼ା ହୋଇଥିଲେ। ଫଳରେ ଇଂଲଣ୍ଡ ୪୨ ଓଭରରେ ବିନା କ୍ଷତିରେ ୧୨୦ ରନ୍ କରିବାକୁ ସକ୍ଷମ ହୋଇପାରିଛି। ବନର୍ସ ୫୨ ଓ ହାମିଦ ୬୦ ରନ୍ କରି ଅପରାଜିତ ଅଛନ୍ତି।
