ରାଞ୍ଚି,୧୯।୧୧: ଚଳିତ ଟି୨୦ ବିଶ୍ୱକପରେ ନୈରାଶ୍ୟଜନକ ପ୍ରଦର୍ଶନ କରିଥିବା ଟିମ୍ ଇଣ୍ଡିଆ ସ୍ବଦେଶରେ ୩ ମ୍ୟାଚ ବିଶିଷ୍ଟ ଟି୨୦ ସିରିଜକୁ ୨-୦ରେ ଜିତି ନେଇଛି। ସ୍ଥାନୀୟ ଜେଏସ୍ସିଏ ଅନ୍ତର୍ଜାତୀୟ ଷ୍ଟାଡିୟମରେ ଶୁକ୍ରବାର ଖେଳାଯାଇଥିବା ଦ୍ୱିତୀୟ ଟି୨୦ ମ୍ୟାଚ୍ରେ ଭାରତ ୭ ଉଇକେଟରେ ନ୍ୟୁଜିଲାଣ୍ଡରକୁ ପରାସ୍ତ କରିଛି।
ନିକଟରେ ଶେଷ ହୋଇଥିବା ଟି୨୦ ବିଶ୍ୱକପର ଗ୍ରୁପ ପର୍ଯ୍ୟାୟରେ ଭାରତକୁ ନ୍ୟୁଜିଲାଣ୍ଡ ପରାସ୍ତ କରିଥିଲା। ଭାରତ ନକ୍ଆଉଟରେ ପ୍ରବେଶ କରି ନ ପାରିବାର ଏହା ଅନ୍ୟତମ କାରଣ ଥିଲା। ତେଣୁ ଏଠାରେ ସିରିଜ ବିଜୟୀ ହୋଇ ଭାରତ ଏହାର ମଧୁର ପ୍ରତିଶୋଧ ନେଇଛି।
୧୫୪ ରନ ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଭାରତର ଦୁଇ ଓପନର ଲୋକେଶ ରାହୁଲ ଓ ରୋହିତ ଶର୍ମା ପ୍ରଥମ ଉଇକେଟ ଯୋଡ଼ିରେ ୮୦ ବଲ୍ରୁ ୧୧୭ ରନ ସଂଗ୍ରହ କରି ବିଜୟ ପାଇଁ ପ୍ଲାଟଫର୍ମ ପ୍ରସ୍ତୁତ କରିଥିଲେ। ୧୪ତମ ଓଭରର ଦ୍ୱିତୀୟ ବଲ୍ରେ ରାହୁଲଙ୍କୁ ଆଉଟ କରି ନ୍ୟୁଜିଲାଣ୍ଡକୁ ବ୍ରେକ୍ ଥ୍ରୁ ଦେଇଥିଲେ ଅଧିନାୟକ ଟିମ୍ ସୌଦୀ। ମାତ୍ର ସେତେବେଳକୁ ବହୁ ବିଳମ୍ବ ହୋଇ ଯାଇଥିଲା। ୪୯ଟି ବଲ୍ର ସମ୍ମୁଖୀନ ହୋଇଥିବା ରାହୁଲ ୬ ଚୌକା ଓ ୨ ଛକା ସହାୟତାରେ ୬୫ ରନ କରିଥିଲେ। ରୋହିତ ମଧ୍ୟ ଅର୍ଦ୍ଧଶତକ ହାସଲ କରିଥିଲେ। ସେ ୩୬ ବଲ୍ରୁ ୧ ଚୌକା ଓ ୫ ଛକା ସହ ୫୫ ରନ କରଥିଲେ। ସୌଦୀ ୧୬ତମ ଓଭରରେ ରୋହିତ ଓ ସୂର୍ଯ୍ୟକୁମାର ଯାଦବ (୧)ଙ୍କୁ ଆଉଟ କରି ଭାରତକୁ ଡବଲ ଝଟ୍କା ଦେଇଥିଲେ। ତେବେ ରିଷଭ ପନ୍ତ ୬ ବଲ୍ରୁ ୧୨(୨ ଛକା) ଓ ଭେଙ୍କଟେଶ ଆୟାର ୧୧ ବଲ୍ରୁ ୧୨ ରନରେ ଅପରାଜିତ ରହି ଦଳକୁ ଜିତାଇଥିଲେ।
