ନୂଆଦିଲ୍ଲୀ,୧।୧୦: ଟ୍ରଫି ବିବାଦ ମଧ୍ୟରେ ଏସୀୟ କ୍ରିକେଟ ପରିଷଦ (ACC) ଏକ ବୈଠକ କରିଥିଲା। ACC ମୁଖ୍ୟ ମୋହସିନ ନକଭିଙ୍କୁ ଭର୍ତ୍ସନା କରିଥିଲା BCCI। BCCI ଉପାଧ୍ୟକ୍ଷ ରାଜୀବ ଶୁକ୍ଳା ନକଭିଙ୍କୁ ଭର୍ତ୍ସନା କରିଥିଲେ। ତାଙ୍କୁ କ୍ଷମା ମାଗିବାକୁ ଏବଂ ଟ୍ରଫି ଫେରାଇବାକୁ ବାଧ୍ୟ କରିଥିଲେ।
ବୈଠକ ଆରମ୍ଭରେ ମୋହସିନ ନକଭି ନିଜର ଅସନ୍ତୋଷ ପ୍ରକାଶ କରି ଘୋଷଣା କରିଥିଲେ, ତୁମର ଖେଳାଳିମାନେ ମୋ ସହିତ ବହୁତ ଖରାପ ବ୍ୟବହାର କରିଥିଲେ। ମୁଁ ସେଠାରେ କାର୍ଟୁନ ପରି ଟ୍ରଫି ଧରି ଠିଆ ହୋଇଥିଲି। ତୁମର ଖେଳାଳିମାନେ ସେମାନଙ୍କର ମୋବାଇଲ ଫୋନ୍ରେ ବ୍ୟସ୍ତ ଥିଲେ, ଭିଡିଓ ଗେମ ଖେଳିଥିଲେ। କିନ୍ତୁ ମୁଁ ସେଠାରେ ଥିବା ସମୟରେ ଟ୍ରଫି ନେବାକୁ ଆସି ଭଦ୍ରତା ମଧ୍ୟ ଦେଖାଇ ନ ଥିଲେ। ମୁଁ ଏପରି ଟ୍ରଫି ହସ୍ତାନ୍ତର କରିବି ନାହିଁ। ତୁମର ଅଧିନାୟକଙ୍କୁ ଦୁବାଇ ପଠାଅ ଏବଂ ତାଙ୍କୁ ମୋ ପାଖରୁ ଏହା ସଂଗ୍ରହ କରିବାକୁ ଦିଅ।
ଏହା ଶୁଣିବା ପରେ, ରାଜୀବ ଶୁକ୍ଳା ତୁରନ୍ତ ଜବାବ ଦେଇ କୁହନ୍ତି, ତୁମେ କିପରି କଳ୍ପନା କରିପାରୁଛ ଯେ, ଆମର ଖେଳାଳିମାନେ ତୁମଠାରୁ ଟ୍ରଫି ଗ୍ରହଣ କରିବେ? ତୁମେ ACC ଅଧ୍ୟକ୍ଷ, PCB ଅଧ୍ୟକ୍ଷ ଏବଂ ପାକିସ୍ତାନର ଗୃହମନ୍ତ୍ରୀ। ତୁମେ ଆମର ଫୁଟବଲ ଖେଳାଳିଙ୍କ ବିମାନକୁ ଗୁଳି କରି ଖସାଇ ଦେବା ଭଳି ଅବାନ୍ତର ଟୁଇଟ୍ କରିଛ। ତେବେ ତୁମେ ଏହି ଭ୍ରମ କିପରି ସୃଷ୍ଟି କଲ? ତୁମେ କ୍ରିକେଟକୁ ରାଜନୀତି ସହିତ ମିଶ୍ରଣ କରିଛ।
ରାଜୀବ ଶୁକ୍ଳା ଆହୁରି କହିଛନ୍ତି,ତୁମେ ପୂର୍ବରୁ ଭାରତୀୟ ବୋର୍ଡ ସହିତ କଥା ହେବା ଉଚିତ୍ ଥିଲା । ତୁମେ ଟ୍ରଫି ପ୍ରଦାନ କରିବା ଉଚିତ କି ନାହିଁ ବୁଝିବାର ଥିଲା। ତୁମେ ଏତେ ସମୟ ଧରି କାହିଁକି ବିବାଦ ସୃଷ୍ଟି କଲ? ଏହା ତୁମକୁ ସୁହାଉନାହିଁ। ଆମର ଅଧିନାୟକ ମୁମ୍ବାଇରେ ଅଛନ୍ତି, ସେ ଏବେ କାହିଁକି ଦୁବାଇ ଆସିବେ? ମୁଁ ପୂର୍ବରୁ ସେମାନଙ୍କୁ ତୁମଠାରୁ ଟ୍ରଫି ଗ୍ରହଣ ନ କରିବାକୁ କହିସାରିଛି। ତୁମେ ACC କିମ୍ବା ICCକୁ ଟ୍ରଫି ପଠାଅ, ଆମେ ସେଠାରୁ ପାଇବୁ।
ଭର୍ତ୍ସନା ପାଇବା ପରେ ନକଭି କହିଥିଲେ,ରାଜୀବ ଜୀ, ଆପଣ ଠିକ କହୁଛନ୍ତି। ଯାହା ଘଟିବା ଉଚିତ୍ ନ ଥିଲା। ମୁଁ ଏଥିପାଇଁ କ୍ଷମା ପ୍ରାର୍ଥନା କରୁଛି। ମୁଁ ICCକୁ ଟ୍ରଫି ପଠାଉଛି, ଆପଣ ସେଠାରୁ ଏହା ପାଇପାରିବେ। ଏଥିରେ ରାଜୀବ ଶୁକ୍ଳା ନକଭିଙ୍କୁ ଧନ୍ୟବାଦ ଜଣାଇ କହିଲେ, ଠିକ ଅଛି। ଆପଣ ଏହା ପୂର୍ବରୁ କରିପାରିଥାନ୍ତେ।
ଭାରତ ଏବଂ ପାକିସ୍ତାନ ମଧ୍ୟରେ ଏସିଆ କପ ଫାଇନାଲ ଖେଳାଯାଇଥିଲା। ଟିମ ଇଣ୍ଡିଆ ୫ ଉଇକେଟରେ ମ୍ୟାଚ ଜିତିଥିଲା। ଏହା ପରେ, ଭାରତୀୟ ଦଳ ପାକିସ୍ତାନ ସରକାରଙ୍କ ମନ୍ତ୍ରୀ ଏବଂ ପାକିସ୍ତାନ କ୍ରିକେଟ ବୋର୍ଡର ସଭାପତି ନକଭିଙ୍କଠାରୁ ଟ୍ରଫି ଗ୍ରହଣ କରିବାକୁ ମନା କରିଦେଇଥିଲା। କୁହାଯାଉଥିଲା ଯେ, ନକଭି ତାଙ୍କ ସହିତ ଟ୍ରଫି ନେଇଯାଇଛନ୍ତି।
