ବେଙ୍ଗାଲୁରୁ,୧୨।୩: ସ୍ଥାନୀୟ ଚିନ୍ନାସ୍ବାମୀ ଷ୍ଟାଡିୟମରେ ଶନିବାରଠାରୁ ଭାରତ ଓ ଶ୍ରୀଲଙ୍କା ମଧ୍ୟରେ ଦ୍ୱିତୀୟ ଟେଷ୍ଟ ମ୍ୟାଚ୍ ଆରମ୍ଭ ହେବ। ଏହି ଦିବାରାତ୍ର ମ୍ୟାଚ୍ ଫ୍ଲଡଲାଇଟ୍ରେ ଖେଳାଯିବ। ତେବେ ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟକୁ ମାତ୍ର ୩ ଦିନରେ ଜିତିନେଇଥିବା ଟିମ୍ ଇଣ୍ଡିଆ ପିଙ୍କ ବଲ୍ ଟେଷ୍ଟରେ ଭଲ ପ୍ରଦର୍ଶନ କରିବ ବୋଲି ଆଶା କରାଯାଉଛି। ମ୍ୟାଚ୍କୁ ଜିତି ସିରିଜ ଉପରେ କବ୍ଜା କରିବା ଲକ୍ଷ୍ୟରେ ମଇଦାନକୁ ଓହ୍ଲାଇବ ଦଳ। ସେହିଭଳି ଏହି ପିଚ୍ରେ ଖେଳପ୍ରେମୀମାନେ ଷ୍ଟାର ବ୍ୟାଟ୍ସମ୍ୟାନ ବିରାଟ କୋହଲିଙ୍କଠାରୁ ଏକ ଶତକ ଆଶା କରୁଛନ୍ତି। ଭାରତର ପୂର୍ବତନ ଅଧିନାୟକ ୧୮ ମାସ ହେଲା ଏକ ଅନ୍ତର୍ଜାତୀୟ ଶତକ ହାସଲ କରିପାରି ନାହାନ୍ତି। କୋହଲି ବର୍ତ୍ତମାନ ଚିନ୍ନାସ୍ବାମୀ ଷ୍ଟାଡିୟମକୁ ଫେରିଛନ୍ତି, ଯାହାକୁ ଦଶନ୍ଧି ଧରି ତାଙ୍କ ଆଇପିଏଲ ଦଳ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଦଳର ବେସ୍ କ୍ୟାମ୍ପ ରହି ଆସିଛି। ତେଣୁ ସେଠିକାର ଜଳବାୟୁ ସହିତ ସେ ବେଶ୍ ଅଭ୍ୟସ୍ତ ଥିବାରୁ ତାଙ୍କଠାରୁ ଭଲ ପ୍ରଦର୍ଶନ ଆଶା କରାଯାଉଛି।
ଦ୍ୱିତୀୟ ଟେଷ୍ଟ ଦିବାରାତ୍ର ବିଶିଷ୍ଟ ହୋଇଥିବାରୁ ଟିମ୍ ମ୍ୟାନେଜମେଣ୍ଟକୁ ଦଳର କମ୍ବିନେଶନକୁ ନେଇ ଚିନ୍ତା କରିବାକୁ ହେବ। ଜୟନ୍ତ ଯାଦବଙ୍କ ସ୍ଥାନରେ ସ୍ପିନ ଅଲରାଉଣ୍ଡର ଅକ୍ଷର ପଟେଲ କିମ୍ବା ପେସ୍ ବୋଲର ମହମ୍ମଦ ସିରାଜଙ୍କୁ ଚୂଡ଼ାନ୍ତ ଏକାଦଶରେ ସ୍ଥାନ ମିଳିପାରେ। ପିଚ୍ରେ ଯଦି ଘାସ ରୁହେ ତେବେ ଅଧିନାୟକ ରୋହିତ ଶର୍ମା ସିରାଜଙ୍କୁ ଦଳରେ ନେବାକୁ ପସନ୍ଦ କରିପାରନ୍ତି।
ଅପରପକ୍ଷରେ ଭାରତୀୟ ଦଳରେ ରହିଥିବା ପ୍ରତିଭାମାନଙ୍କୁ ଚ୍ୟାଲେଞ୍ଜ ଦେବା ଭଳି ସମ୍ବଳ ଶ୍ରୀଲଙ୍କା ପାଖରେ ନାହିଁ। ଦଳ ଏବେ ଇଞ୍ଜୁରି ସମସ୍ୟାରେ ରହିଛି। ହାମଷ୍ଟ୍ରିଙ୍ଗ ଇଞ୍ଜୁରି ଯୋଗୁ ପେସ୍ ବୋଲର ଲାହିରୁ କୁମାର ଶନିବାର ମ୍ୟାଚ ପାଇଁ ଉପଲବ୍ଧ ହେବେ ନାହିଁ। ଗୋଇଠିରେ ଇଞ୍ଜୁରି ଯୋଗୁ ପେସର ଦୁଷ୍ମନ୍ତ ଚାମିରାଙ୍କ ସ୍ଥାନରେ ଭ୍ରମଣକାରୀ ଦଳରେ ଚାମିକା କରୁଣାରତ୍ନେଙ୍କୁ ସାମିଲ କରାଯାଇଛି। ଗତ ମ୍ୟାଚରେ ଭଲ ପ୍ରଦର୍ଶନ କରିଥିବା ପାଥୁମ ନିଶାଙ୍କା ଆଘାତପ୍ରାପ୍ତ ହୋଇଥିବାରୁ ତାଙ୍କ ସ୍ଥାନରେ ଦୀନେଶ ଚାଣ୍ଡିମଲ ଖେଳିବେ। ମ୍ୟାଚରେ ଭଲ କରିବାକୁ ହେଲେ ଅଧିନାୟକ ଦିମୁଥ କରୁଣାରତ୍ନେଙ୍କୁ ଅସାଧାରଣ ପ୍ରଦର୍ଶନ କରିବାକୁ ପଡ଼ିବ। ଗତ ମ୍ୟାଚର ଉଭୟ ଇନିଂସରେ ସେ ଭଲ ଆରମ୍ଭ କରିଥିଲ ମଧ୍ୟ ରୂପାନ୍ତର କରିପାରି ନ ଥିଲେ।
