ନୂଆଦିଲ୍ଲୀ,୨୭।୧: ଅଷ୍ଟ୍ରେଲିଆ ବିପକ୍ଷରେ ଭାରତ ସିରିଜ୍ ଜିତିବାରେ ଶାର୍ଦ୍ଦୁଲ ଠାକୁରଙ୍କ ଅବଦାନ ଉଲ୍ଲେଖନୀୟ ଥିଲା। ଗାବା ଟେଷ୍ଟର ପ୍ରଥମ ଇନିଂସରେ ୬୭ ସ୍କୋର କରି ଭାରତକୁ ପ୍ରତ୍ୟାବର୍ତ୍ତନ କରିଥିବା ଶାର୍ଦ୍ଦୁଲ ଏକ ସାକ୍ଷାତକାରରେ କହିଛନ୍ତି ଯେ, ମୁଁ ହୃଦୟରୁ ପ୍ରାର୍ଥନା କରୁଥିଲି ଯେ ସିରାଜ ୫ ଉଇକେଟ ନିଅନ୍ତୁ। କାରଣ ପିତାଙ୍କ ଦେହାନ୍ତ ପରେ ତାଙ୍କ ପାଇଁ ଅତ୍ୟନ୍ତ ଭାବପ୍ରବଣ ଏବଂ କଷ୍ଟକର ସମୟ ଥିଲା। ପିତାଙ୍କ ସ୍ବପ୍ନକୁ ସାକାର କରିବା ପାଇଁ ସିରାଜ ମୃତ୍ୟୁ ପରେ ମଧ୍ୟ ଭାରତ ଫେରି ନ ଥିଲେ। ତେଣୁ ମହମ୍ମଦ ସିରାଜ ୫ ଉଇକେଟ କ୍ଲବରେ ଯୋଗଦେବାକୁ ସେ ହୃଦୟରୁ ଚାହୁଁଥିଲେ। ଗାବା ଟେଷ୍ଟ ମ୍ୟାଚର ଦ୍ୱିତୀୟ ଇନିଂସରେ ୭୩ ରନ ଦେଇ ସିରାଜ ୫ ଉଇକେଟ ନେଇଥିଲେ। ଟେଷ୍ଟ କ୍ରିକେଟରେ ସିରାଜ ପ୍ରଥମଥର ପାଇଁ ଏକ ଇନିଂସରେ ୫ ଉଇକେଟ ନେଇଥିଲେ। ଏହା ସହ ସେ ମହାନ ଭାରତୀୟ ଦ୍ରୁତ ବୋଲର ଜଭଗଲ ଶ୍ରୀନାଥଙ୍କ ରେକର୍ଡ ମଧ୍ୟ ଭାଙ୍ଗିଛନ୍ତି। ଅଷ୍ଟ୍ରେଲିଆରେ ଡେବ୍ୟୁ ଟେଷ୍ଟ ସିରିଜରେ ସିରାଜ ସର୍ବାଧିକ ଉଇକେଟ ନେଇଛନ୍ତି। ସେ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜରେ ୧୩ ଉଇକେଟ ନେଇଥିଲେ ଏବଂ ଏହା ପୂର୍ବରୁ ଏହି ରେକର୍ଡ ଜଭାଗଲ ଶ୍ରୀନାଥଙ୍କ ନାମରେ ଥିଲା। ୧୯୯୧-୯୨ ମସିହାରେ ଶ୍ରୀନାଥ ୧୦ଟି ଉଇକେଟ ନେଇଥିଲେ।
