ଓ୍ବାଶିଂଟନ୍,୨୨।୨: ଆମେରିକା ସୁପ୍ରିମକୋର୍ଟରୁ ରାଷ୍ଟ୍ରପତି ଟ୍ରମ୍ପଙ୍କୁ ଶକ୍ତ ଝଟ୍କା । ଟାରିଫକୁ ସୁପ୍ରିମକୋର୍ଟ ବେଆଇନ କହିବା ପରେ ବଢ଼ିଲା ଟ୍ରମ୍ପଙ୍କ ଅଡୁଆ । ଭାରତ ଉପରେ ୧୮ ନୁହେଁ, ଏଣିକି ୧୦ ପ୍ରତିଶତ ଟାରିଫ ଲାଗୁ ହେବ । ଆସନ୍ତା ୨୪ ତାରିଖରୁ ଏହି ନୂଆ ଟାରିଫ ଲାଗୁ କରିବାକୁ ଆମେରିକା ରାଷ୍ଟ୍ରପତି ଘୋଷଣା କରିଛନ୍ତି । ଅନ୍ୟପଟେ ଟାରିଫ ବାବଦକୁ ଭାରତରୁ ଆମେରିକା ନେଇଛି ୩୮୭ ନିୟୁତ ଡଲାର । ସେହିପରି ବିଭିନ୍ନ ଦେଶରୁ ୧୭୫ ଆରବ ଡଲାର ନେଇଛି ଆମେରିକା । ଏବେ ପ୍ରଶ୍ନ ଉଠୁଛି ଯେ, ସୁପ୍ରିମକୋର୍ଟଙ୍କ ଛାଟ ପରେ ଏହି ଅର୍ଥ ଫେରାଇବ କି ଆମେରିକା । କାରଣ, ଏହି ଅର୍ଥ ଫେରାଇଲେ ଆମେରିକା ଅର୍ଥନୀତି ଉପରେ ପଡ଼ିବ ବଡ଼ ପ୍ରଭାବ ।
ଆମେରିକା ସୁପ୍ରିମକୋର୍ଟଙ୍କ ଐତିହାସିକ ରାୟ ପରେ ହ୍ବାଇଟ୍ ହାଉସ୍ ପକ୍ଷରୁ ଜାରି ହୋଇଥିବା ନୂଆ ବିଜ୍ଞପ୍ତି ଅନୁଯାୟୀ, ଭାରତୀୟ ଆମଦାନୀ ଉପରେ ଶୁଳ୍କ ୨୫% ରୁ କମି ୧୮ ପ୍ରତିଶତ ହୋଇଥିବା ଟାରିଫ୍ ଏବେ ୧୦% ହୋଇଛି । ରିପୋର୍ଟ ମୁତାବକ, ଭାରତ ପକ୍ଷରୁ ପୂର୍ବରୁ ୧୮% ଶୁଳ୍କ ପାଇଁ ସହମତି ହୋଇଥିଲେ ବି ତାହା ଔପଚାରିକ ଭାବେ ଲାଗୁ ହୋଇ ନଥିଲା । ଏବେ ଟ୍ରମ୍ପ୍ ଭାରତ ସମେତ ଆମେରିକାର ବାଣିଜ୍ୟିକ ସହଯୋଗୀ ଦେଶଗୁଡ଼ିକ ଉପରେ ୧୦% ଟାରିଫ୍ ଲାଗୁ କରିଛନ୍ତି । ଏହି ନିୟମ ଫେବ୍ରୁଆରୀ ୨୪ ତାରିଖ ରାତି ୧୨:୦୧ ରୁ ଲାଗୁ ହେବ । ସୁପ୍ରିମକୋର୍ଟଙ୍କ ଉପରେ କ୍ଷୁବ୍ଧ ହୋଇ ଟ୍ରମ୍ପ୍ ସେକ୍ସନ୍ ୧୨୨ ଅଧୀନରେ ଏଭଳି ନିଷ୍ପତ୍ତି ନେଇଛନ୍ତି ଆମେରିକା ରାଷ୍ଟ୍ରପତି ।
ଗ୍ଲୋବାଲ୍ ଟାରିଫ୍ ୧୦ ପ୍ରତିଶତର ସିଧାସଳଖ ଅର୍ଥ ହେଉଛି, ଆମେରିକାରେ ଆମଦାନୀ ମହଙ୍ଗା ହୋଇଯିବ । ବିଦେଶୀ କମ୍ପାନିଗୁଡ଼ିକର ନିବେଶ ବଢ଼ିବ । ସପ୍ଲାଇ ଟେନ୍ ଉପରେ ଚାପ ପଡ଼ିବ । ଘରୋଇ ଉଦ୍ୟୋଗକୁ କିଛି ସମୟ ପାଇଁ ଫାଇଦା ମିଳିପାରେ । ଟ୍ରେଡ୍ ୱାର୍ର ଆଶଙ୍କା ମଧ୍ୟ ବଢ଼ିପାରେ । ଅନ୍ୟପଟେ ନୂଆ ଟାରିଫ୍ ପରେ ବଦଳିବ ଭାରତର ସ୍ଥିତି । ଇଞ୍ଜିନିୟରିଂ, ଟେକ୍ସଟାଇଲ ଓ କ୍ୟାମିକାଲ ସେକ୍ଟରକୁ ଆଶ୍ବସ୍ତି ମିଳିପାରେ । ଷ୍ଟିଲ୍, ଆଲୁମିନିୟମ ଏବଂ ଅଟୋ ପାର୍ଟ୍ସ୍ ଉପରେ ଟାରିଫ ଜାରି ରହିବ । ୮୦୦ କୋଟିରୁ ଅଧିକ ରପ୍ତାନୀ ଉତ୍ପାଦ ଟାରିଫ୍ ଅଧୀନରେ ରହିବ । ଅଟୋ ଏବଂ ମେଟାଲ ସେକ୍ଟର ଉପରେ ପ୍ରେସର ବଢ଼ିପାରେ । ସେହିପରି ଭାରତ ସହ ଟ୍ରେଡ୍ ଡିଲ୍କୁ ନେଇ ପ୍ରେସିଡେଣ୍ଟ ଟ୍ରମ୍ପ୍ କହିଛନ୍ତି ଯେ, ଭାରତ ସହ ଆମେରିକାର ଡିଲ୍ ପକ୍କା । ପ୍ରଧାନମନ୍ତ୍ରୀ ମୋଦି ଜଣେ ମହାନ ବ୍ୟକ୍ତି, କିନ୍ତୁ ସେ ଆମେରିକାର ନେତାଙ୍କଠାରୁ ଢେର୍ ଗୁଣା ସ୍ମାର୍ଟ । ଯାହାଦ୍ବାରା ଆମେରିକାର ଅନେକ କ୍ଷତି ହେଉଥିଲା । ଏବେ ଆମେ ଡିଲ୍କୁ ଫ୍ଲିପ୍ କରି ଦେଇଛୁ । ଏବେ ଆମେରିକା, ଭାରତକୁ ଟାରିଫ୍ ଦେବ ନାହିଁ, କିନ୍ତୁ ନୂଆଦିଲ୍ଲୀ ୱାସିଂଟନକୁ ଟାରିଫ୍ ଦେବ ବୋଲି ସ୍ପଷ୍ଟ ଭାବେ କହିଛନ୍ତି ଆମେରିକା ରାଷ୍ଟ୍ରପତି ।
