କୋଲକାତା,୨୪ା୧: ନିୟନ୍ତ୍ରଣରେଖା (ଏଲ୍ଓସି)ରୁ ନେଇ ପ୍ରକୃତ ନିୟନ୍ତ୍ରଣରେଖା (ଏଲ୍ଏସି) ପର୍ଯ୍ୟନ୍ତ ସବୁଠି ଭାରତ ଶକ୍ତିଶାଳୀ ହେବାରେ ଲାଗିଛି। ନେତାଜୀ ସୁଭାଷ ଚନ୍ଦ୍ର ବୋଷ ଜୀବିତ ଥିଲେ ତାଙ୍କ ପଦାଙ୍କ ଅନୁସରଣ କରି ଏହା ସମ୍ଭବ ହୋଇପାରିଥିବା ଦେଖି ଗର୍ବ ଅନୁଭବ କରିଥାଆନ୍ତେ ବୋଲି ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୃଢ଼ୋକ୍ତି ବାଢ଼ିଛନ୍ତି।
କୋଲକାତାରେ ନେତାଜୀ ଜୟନ୍ତୀ ପାଳନ ଅବସରରେ ଆୟୋଜିତ କାର୍ଯ୍ୟକ୍ରମକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ, ପାକିସ୍ତାନ ସଂଲଗ୍ନ ଏଲ୍ଓସି ଏବଂ ଚାଇନାକୁ ଲାଗି ରହିଥିବା ସୀମା ଏଲ୍ଏସି ପର୍ଯ୍ୟନ୍ତ ଭାରତ ନେତାଜୀଙ୍କ ପଥ ଅନୁସରଣ କରୁଛି। ଦୁଇ ସୀମାରେ ଭାରତୀୟ ସେନାର ଶକ୍ତି ବଢ଼ିଛି। ଭାରତର ସାର୍ବଭୌମତ୍ୱ ପ୍ରତି ଯେତେବେଳେ ବି ଆହ୍ବାନ ସୃଷ୍ଟି ହୋଇଛି ତା’ର ମୁହଁତୋଡ଼ ଜବାବ ଦିଆଯାଇଛି। କରୋନା ମହାମାରୀର ଭାକ୍ସିନ ଭାରତ ଦ୍ୱାରା ବିକଶିତ ହୋଇଛି।
ଭାରତ ପାଖରେ ଏବେ ଏକ ଶକ୍ତିଶାଳୀ ସେନା ରହିଛି। ସେନା ପାଖରେ ତେଜସ୍ ଓ ରାଫାଲ ଭଳି ଆଧୁନିକ ଯୁଦ୍ଧବିମାନ ରହିଛି। ନେତାଜୀଙ୍କ ସ୍ବପ୍ନର ଶକ୍ତିଶାଳୀ ଭାରତ କିପରି ଆଗକୁ ବଢ଼ୁଛି ତାହା ଦେଖି ସେ ଗର୍ବିତ ହୋଇଥାଆନ୍ତେ। ନେତାଜୀ ଏପରି ଜଣେ ବ୍ୟକ୍ତି ଥିଲେ, ଯିଏ ବିଶ୍ୱର ସର୍ବବୃହତ୍ ସାମ୍ରାଜ୍ୟବାଦୀ ବଳର ମୁକାବିଲା କରି ଘୋଷଣା କରିଥିଲେ ଯେ ସେ ସ୍ବାଧୀନତା ମାଗିବେ ନାହିଁ, ବରଂ ଏଥିପାଇଁ ସଂଗ୍ରାମ କରିବେ। ତେଣୁ ଦେଶ ତାଙ୍କ ଜନ୍ମଦିନ ଜାନୁୟାରୀ ୨୩କୁ ପରାକ୍ରମ ଦିବସ ଭାବେ ପାଳନ କରିବାକୁ ନିଷ୍ପତ୍ତି ନେଇଛି। ଏହି ଅବସରରେ ପ୍ରଧାନମନ୍ତ୍ରୀ ନେତାଜୀଙ୍କ ଉଦ୍ଦେଶ୍ୟରେ ଏନ୍ଡିଏ ସରକାରଙ୍କ ପକ୍ଷରୁ କରାଯାଇଥିବା କିଛି କାର୍ଯ୍ୟକୁ ନେଇ ଉପସ୍ଥିତ ଜନତାଙ୍କୁ ସ୍ମରଣ କରାଇଥିଲେ।
କେନ୍ଦ୍ର ସରକାରଙ୍କ ପକ୍ଷରୁ ଆୟୋଜିତ ଉକ୍ତ ସାଂସ୍କୃତିକ କାର୍ଯ୍ୟକ୍ରମରେ ନେତାଜୀଙ୍କ ଉପରେ ପ୍ରଧାନମନ୍ତ୍ରୀ ଏକ ସ୍ଥାୟୀ ପ୍ରଦର୍ଶନୀ ଓ ପ୍ରୋଜେକ୍ସନ ମ୍ୟାପିଂ ଶୋ ଉଦ୍ଘାଟନ କରିଥିଲେ। ଏକ ମୁଦ୍ରା ଓ ‘ଲେଟର ଅଫ୍ ନେତାଜୀ’ ଶୀର୍ଷକ ପୁସ୍ତକ ମଧ୍ୟ ଉନ୍ମୋଚନ କରାଯାଇଥିଲା। ଆଜାଦ୍ ହିନ୍ଦ୍ ଫୌଜର ଯବାନ ଓ ସ୍ବାଧୀନତା ସଂଗ୍ରାମୀମାନଙ୍କୁ ମୋଦି ସମ୍ବର୍ଦ୍ଧନା ଜଣାଇଥିଲେ।
